Abajya mu mitwe y’iterabwoba, abamushinje kubafatiraho imbunda... Ikiganiro na Mufti w’u Rwanda

Yanditswe na Akayezu Jean de Dieu
Kuya 2 Gashyantare 2021 saa 09:18
Yasuwe :
0 0

Mu bice bitandukanye by’igihugu hari aho ugera ugasanga hitwa ‘Mu Cyarabu, Mu Giswayire, Buswahilini, Camp Swahili’ ndetse n’andi mazina wumva afitanye isano n’Ururimi rw’Igiswahili. Umwihariko w’aha hantu ni uko abahatuye nibura 98% ari Abayoboke b’Idini ya Islam.

N’ubwo uyu munsi bisa n’ibyahindutse ariko mu myaka yo hambere, utu duce twabaga dutuwe n’Abanyamahanga wasangaga akenshi bavuga uririmi rw’Igiswahili ndetse Icyarabu [rujya gusa cyane n’Igiswahili], bigatuma abanyarwanda babita Abaswahili cyangwa Abarabu.

Ni amazina ushobora kumva ko yari meza ariko ntabwo ariko biri kuko icyari cyihishe inyuma yayo, ni ivangura ryakorerwaga Abayisilamu bo ku ngoma ya Cyami, Repubulika ya Mbere n’iya Kabiri.

Kimwe n’andi madini cyangwa imiryango ishingiye ku myemerere mu Rwanda, amateka y’Idini ya Islam nayo atangira nyuma gato ya 1894, ubwo Lt Gustav Von Götzen, umusirikare w’Umudage washakishaga isoko y’uruzi rwa Nil yakandagiraga mu Rwagasabo.

Umunyamateka akaba n’umwanditsi, Padiri Alexis Kagame agaragaza ko Von Götzen , waje aturutse muri Tanzania, mu bo yazanye nabo bari Abayisilamu, bityo akavuga ko mu 1895, aribwo Abayisilamu ba mbere bageze mu Rwanda.

Amateka agaragaza ko mu 1913, aribwo Umisigiti ‘Mosque’ wa Mbere wubatswe mu Mujyi wa Kigali rwagati ahasanzwe hazwi nko ku Musigiti [Umusigiti wa mbere wasimbujwe mu 2004], ndetse icyo gihe Abayisilamu bose babarirwaga nko muri 300.

Muri icyo gihe abari abayoboke ba Islam bose bari batuye mu Mujyi wa Kigali, muri aka gace kazwi nka Quartier Commercial, kumanuka kugeza ku Muhima. Nyuma baje kuvanwa muri aka gace bajya gutuzwa i Nyamirambo.

Mufti w’u Rwanda, Sheikh Hitimana Salim, avuga ko Abakoloni bazanye n’idini yabo [Kiliziya Gatolika], ari nabo bagiye bafata Abayisilamu bakajya kubatuza mu nsisiro z’Abavuga Igiswahili.

Ati “Icyo gihe rero abanyarwanda benshi bari bataraba Abayisilamu, rero abatuzwaga muri ziriya nsisiro ni uko bariya bazungu baza mu bihugu byacu kubikoloniza, baje bavuye mu bihugu by’i Burayi ahari hamaze igihe habaye intambara yari izwi nk’iy’Abanyamisaraba n’Abayisilamu.”

Yakomeje agira ati “Baje bafite imyumvire banasobanukiwe cyane Islam icyo aricyo. Bageze aha, ibyo bakoze ni ukugira ngo Abayisilamu babe bari hamwe muri izo nsisiro, bashobora gukurikiranwa neza. Buriya n’Umunyarwanda wabaga Umuyisilamu bamuvanaga hirya mu cyaro bakamuzana muri izo nsisiro.”

Sheikh Hitimana yavuze ko abari batuye muri izo nsisiro hari uburenganzira batahabwaga burimo gutunga ubutaka, guhabwa imirimo, uburezi ndetse nta n’ubwo babaga bemerewe kuvamo uko bashatse ngo bidegembye bisanzure.

Ati “Ibyo twabifashe nko guhohotera uburenganzira bwacu ariko ubu dushimira Imana ko bitakiriho.”

Ahantu hazwi hari izi nsisiro ni muri Nyarugenge, Gatsibo, Kamembe, Rubavu, Rwamagana, Huye na Muhanga.

Mufti w'u Rwanda, Sheikh Hitimana Salim avuga ko Abayisilamu bishimira ko basubijwe uburenganzira muri iyi myaka 27 ishize

Kuki Islam ikunze guhuzwa n’iterabwoba?

Nta barura ryakozwe ariko aha hanze hari umubare munini w’abantu bumva ko uyu n’uyu ari Umuyisilamu bagahita batekereza ubuhezanguni, ubutagondwa burangirira mu kwiturikirizaho ibisasu, ubwicanyi n’ubugome.

Abakora ibyo bikorwa hirya no hino ku Isi bahuzwa cyane n’idini ya Islam, ndetse n’iyo mitwe ivuga ko igendera ku matwara y’Idini ya Islam. Iyo mitwe y’intagondwa irimo za Al-Qaeda yashinzwe na Osama bin Laden, Al-Shabaab ndetse na za Islamic State.

Sheikh Hitimana avuga ko akenshi abagaragara muri ibyo bikorwa by’iterabwoba bakabikora mu izina ry’idini ari abo kwamaganwa kuko Islam yigisha urukundo n’imigirire myiza, bityo abafite iyo myitwarire y’ubutagondwa bakwiye kurwanywa.

Ati “Idini ya Islam yahuye n’ikibazo gikomeye kandi cyayishegeshe, hari abadusanisha n’abantu bafite ayo matwara, mu by’ukuri Idini ya Islam ifite imirongo isobanutse kandi n’Intumwa y’Imana yasize ubutumwa bukangurira Abayisilamu kurangwa n’ibikorwa byiza.”

Yakomeje agira ati “Niba Intumwa y’Imana yarashoboye kubana n’abantu bose, ariko nyuma yaho tukaza kubona abantu bazana ibintu bisobanye, umuntu wa mbere ugomba kumurwanya nitwe. Buriya bariya bantu bakora ubutagondwa, umuntu wa mbere bahohotera ni Umuyisilamu.”

Avuga ko nka Al-Qaeda yatangiranye n’ibi bikorwa by’iterabwoba, iyo urebye Osama Bin Laden wayitangije ari umuntu wari usanzwe arangwa n’ibikorwa by’urugomo, bityo agahitamo gufata ibikorwa bye bibi akabyitirira Islam.

Mu 2016, urubyiruko rw’abantu 40 rwari rwiganjemo urw’Abayisilamu batawe muri yombi bakurikiranyweho ibyaha by’iterabwoba, ubuhezanguni, kujya mu mitwe y’iterabwoba no gushishikariza abandi kuyijyamo.

Mufti w’u Rwanda avuga ko nyuma yo kubona ko hari Abanyarwanda bafite imyumvire n’imigirire ihabanye n’idini, bahise batangira uburyo bwo guhera mu rubyiruko bakora ubukangurambaga babashishikariza guca ukubiri nabyo.

Ati “Twasanze ari ikibazo, kuko niba umuntu yadukana imigirire n’imyifatire udasanzwe uzi, akabikorera mu mbago z’isambu yawe, wowe nibaza ko n’ubwo wakwigira ntibindeba, icyo gihe uri umufatanyacyaha.”

“Icyo nicyo twanze nk’Abayisilamu, twanze ubufatanyacyaha, niba uri intagondwa, ukaba ushaka kuzana imyumvire nk’iyo twebwe twitandukanyije nawe ahubwo turakugaragaza, turakugira inama nibinanirana twitabaze n’abandi.”

Akomeza avuga ko kugeza ubu abagiye bagaragara muri ibyo bikorwa ari bake ndetse n’urwego babikoragaho rwari rukiri hasi ariko badakwiye kwihanganirwa.

Ati “Ku buryo uyu munsi Abayisilamu bose guhera mu 2017, twavuze ko tugomba kurangiza icyo kibazo noneho tugasubira mu buzima nk’ubwo twabagamo ari nabwo buzima Islam itwifuriza, ari nabwo bw’Abemeramana n’abantu bitwa ko bafitanye isano n’Uwiteka."

"Ntabwo bagomba kurangwamo n’urwango, dukwiye kurangwa n’urukundo n’urugwiro. Niyo mpamvu twitwa Islam, Amahoro.”

Sheikh Hitimana avuga ko hanashyizweho uburyo bwihariye bwo guhanahana amakuru ku hantu hose hashobora kugaragara umuyisilamu ushaka kwishobora mu bikorwa by’ubutagondwa n’iterabwoba.

Abashinje Mufti kubafatiraho imbunda…

Muri Kanama 2020, mu Muryango w’Abayisilamu mu Rwanda, hadutse umwuka mubi aho hari bamwe mu ba Sheikh bavugaga ko Mufti abashyiraho iterabwoba ndetse akabafungisha.

Uwitwa Sheikh Nsabimana Issa yashinje Mufti w’u Rwanda, Hitimana Salim, kumufungisha no kumufatiraho imbunda bikozwe n’umurinzi we.

Byabaye nyuma y’uko aba Sheikh bari baherutse gufatwa barenze ku mabwiriza yo kwirinda icyorezo cya Coronavirus ariko nyuma yo kuganirizwa nk’uko bigenda ku bandi baturarwanda bose, baza kurekurwa basubira mu ngo zabo.

Mufti w’u Rwanda, Sheikh Hitimana Salim, yabwiye IGIHE ko ibi byose bikomoka ku mateka mabi yaranze Islam mu bihe byo ha mbere ari nayo mpamvu usanga uyu munsi hari abantu baba bagishaka ko Abayisilamu bayasubiramo.

Ati “Iyo abantu bubaka, twe tugenda tunabibona nko muri izo ngaruka z’amateka y’ibyo twaciyemo, umuntu ntiyari yajya mu murongo neza, ni ukumwihanganira ukamujyana muri urwo rugendo.”

“Bariya ni abantu bafatiwe kutubahiriza amabwiriza ya COVID-19, ariko babikoreraga mu nyubako yacu, barafashwe, ababafashe babajyanye kubagira inama nyuma bararekurwa. Ibyo bavuze byose ni ibinyoma ntazi aho babikuye ariko ntabwo aribyo. Nk’ibyo ni kumwe ushobora kubona n’abantu babiri, batatu bavuga bati Mufti ntitumwishimiye.”

Sheikh Hitimana avuga ko imyitwarire y’aba bantu akenshi ikomoka ku bisigisigi by’amateka mabi yaranze Islam aho nko mu myaka ya mbere ya Jenoside yakorewe Abatutsi, Abayisilamu bo mu Rwanda bahezwaga cyane ku buryo nibura muri iyi myaka 27 ishize aribwo bumva ko bagize ubwisanzure.

Kuva nyuma ya Jenoside yakorewe Abatutsi, Abayisilamu batangiye urugendo rwo kwiyubaka no kwishimira kubaho bisanzuye mu gihugu cyabo, aho nibura kugeza uyu munsi bafite imisigiti igera kuri 675, yiganjemo iyo mu Burasirazuba [irenga 200], Amajyepfo ndetse n’Umujyi wa Kigali.

Imibare yo mu 2020 y’Umuryango w’Abayisilamu mu Rwanda, RMC, igaragaza ko Abayisilamu bagera hafi ku 10% mu gihe ibarura rusange ryo mu 2012 ryo ryerekanye ko ari 3%.

Ubuyobozi bwa RMC bukomeje gutanga umusanzu mu iterambere ry’abaturage kuko nk’Irerero ry’Icyitegererezo ryubatswe mu Rwanda ari irya Islam [riri mu Karere ka Rubavu], bafite kandi amashuri abanza 12, n’ayisumbuye umunani.

Mufti w’u Rwanda atangaza ko bari muri gahunda yo gutangiza amashuri yigisha ibijyanye n’ubumenyingiro bahereye ku ry’icyitegererezo rizubakwa mu Karere ka Bugesera.

Sheikh Hitimana Salim uyobora Abayisilamu mu Rwanda, yavuze ko kuri ubu bunze ubumwe kandi bari mu murongo wo kwiyubaka no kubaka igihugu cyabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .