Abahuguwe ku ishoramari mu buhinzi basabwe kudatindikira ubumenyi bahawe

Yanditswe na Evariste Nsengimana
Kuya 8 Nzeri 2018 saa 11:02
Yasuwe :
0 0

Abakozi 25 b’ibigo bya Leta bitandukanye basoje amahugurwa ku guteza imbere ishoramari mu buhinzi, basabwa kubyaza umusaruro ubumenyi bahakuye no kubukwirakwiza mu baturage.

Aya mahugurwa yatangiye muri Gicuransi uyu mwaka, yasojwe kuri uyu wa 7 Nzeri 2018, akaba yaberaga mu kigo cy’amahugurwa cya Murambi mu Karere ka Muhanga.

Yatanzwe n’ikigo cy’Abanyamerika Gishinzwe Iterambere Mpuzamahanga (USAID), kibinyujije mu mushinga wacyo ugamije iterambere ry’ubuhinzi rishingiye ku bikorera (PSDAG).

Ni ku bufatanye n’Ikigo cy’Igihugu gishinzwe amahugurwa y’imicungire y’abantu n’ibintu (RMI).

Aya mahugurwa yibanze ku gukoresha neza itumanaho, kwamamaza ibyiza bafite, amasezerano, imishyikirano n’ibijyanye n’ibiganiro hagati y’abikorera b’abakorera Leta bigamije kuresha abashoramari mu buhinzi.

Umuyobozi Mukuru wa RMI, Gasamagera Wellars, yababwiye ko ubwo bumenyi batagomba kubupfusha ubusa.

Ati “Mushyire imbaraga mu byo muvanye hano, mubibyaze umusaruro. Ntabwo ari ukugenda ngo mubibike mu kabati kuko bigaragara ko hari icyo mwungutse. Mubikoreshe ndetse mutubere intumwa.”

USAID isanga kubaka ubumenyingiro n’ubumenyi bw’abakozi, mu kureshya ishoramari ry’abikorera, ari inkingi ya mwamba izafasha u Rwanda kugera ku ntego ya gahunda ya Kane yo kwihutisha iterambere mu buhinzi n’ubworozi (PSTA4).

Iyo gahunda igamije kugera no kuguma ku gipimo cy’ubwiyongere bw’umusaruro w’ubuhinzi cya 10% mu 2024.

Umuyobozi w’umushinga PSDAG, Melanie Bittle, yavuze ko “Intego nyamukuru y’uyu mushinga ari ukuzamura ishoramari ry’abikorera mu muhunzi mu gihugu.”

Yasobanuye ko wibandwa cyane kuzana ishoramari ry’imbere mu gihugu n’iry’abanyamahanga, ikaba impamvu ikomeye ituma n’amahugurwa agaruka ku kongerara abakozi ubumenyi bwo kuresha abashoramari.

Umwe mu bahuguwe Mwiseneza Emmanuel, ushinzwe ishoramari mu Karere ka Rubavu, yavuze ko aya mahugurwa aziye igihe kuko abafasha kuzamura ishoramari mu gihugu.

Ati “Uko iminsi yicuma mu ishoramari hari ikigenda gihinduka. Dufite ubuhinzi bukoresha gakondo ariko twifuza kubuvamo tukajya mu bukoresha ikoranabuhanga.”

Yakomeje asobanura ko amasomo azabafasha gusobanurira abashoramari byimbitse amahirwe agaragara mu buhinzi, ibyiza byo kuhashora imari bigatuma babyibonamo.

Aya mahugurwa yahawe abakozi bo muri Minagri, NAEB, RDB, PSF no mu Turere tw’imijyi itandatu yunganira uwa Kigali.

Umushinga PSDAG washowemo miliyoni zisaga 25$ mu gihe cy’imyaka itanu. Uzasozwa mu 2019, hanyuma RMI ikomeze guhugura abandi bakozi.

Abakozi 25 basojwe amahugurwa mu ishoramari mu buhinzi
Umuyobozi Mukuru wa RMI, Wellars Gasamagera atanga impamyabushobozi ku bitabiriye amahugurwa
Umuyobozi w’umushinga PSDAG, Melanie Bittle yavuze ko bifuza kuzamura ishoramari ry'abikorera mu buhinzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza