Kwamamaza

Abahoze ari ba Ambasaderi bakuriweho imisoro ku modoka

Yanditswe kuya 20-09-2016 saa 09:34' na Cyprien Niyomwungeri


Ku nshuro ya mbere ba Ambasaderi n’abandi badipolomate bavuye mu butumwa mu mahanga ku bushake, bagiye kujya bakurirwaho imisoro ku modoka baguze.

Bikurikiye icyemezo cy’inama y’Abaminisitiri iheruka yemeje Amabwiriza ya Minisitiri agena ibigenerwa Abakozi ba Leta n’abahagarariye abaturage, mu rwego rwa Politiki yo kuborohereza kuva no kujya ku kazi.

Iryo teka riteganya ko umudipolomate ugarutse mu gihugu akurirwaho umusoro ku modoka yaguze akanishyurirwa amafaranga yose yo kuyikoresha igihe yangiritse.

Uretse abayobozi bakuru bo mu cyiciro cyo hejuru, iki cyiciro gishya ntikizajya cyemererwa amafaranga abayobozi bagenerwa buri kwezi cyangwa ayo bashoboraga gusubizwa igihe bakoze ingendo ndende z’akazi mu gihugu bifashishije imodoka zabo bwite.

Ubusanzwe inguzanyo yo kugura imodoka yahabwaga abarimo ba Minisitiri, Abanyamabanga ba Leta, Abanyamabanga bahoraho, Abasenateri, Abadepite, Abameya, Abayobozi bakuru, ba Visi-Meya, Abanyamabanga Nshingwabikorwa b’Uturere n’abandi bari ku rwego rumwe.

Ikindi cyiciro cyihariye kirimo abaganga b’inzobere bo mu bitaro bya Leta, abarimu bakuru muri Kaminuza n’amashuri makuru, abagoronome n’abaveterineri b’imirenge, abashinzwe uburezi mu turere n’abagenzuzi b’umurimo mu turere bifashisha moto.

Muri aya mabwiriza mashya icyiciro cyihariye cyiyongereyemo inzego eshatu harimo abadipolomate barangije ubutumwa mu mahanga, abajyanama ba Ambasaderi, abashinzwe ubucuruzi n’abajyanama ba mbere muri za Ambasade. Harimo kandi abajyanama ba kabiri muri za Ambasade n’abanyamabanga.

Izi mpinduka ziribanda ku badipolomate bavuye mu butumwa bw’igihugu n’abakozi ba leta bemerewe inguzanyo y’imodoka kuko igihe cyo guhabwa ibyo bagenerwa na Leta cyiyongereyeho imyaka itatu kikava kuri itanu kikagera ku munani.

Umukozi ushinzwe gahunda za Leta muri Minisiteri y’Ibikorwa Remezo, Innocent Kabogoza, yabwiye The New Times ko ibyahindutse ari ibigenerwa abadipolomate n’igihe cyo guhabwa inguzanyo y’imodoka ku bakozi ba Leta babyemerewe cyavuye ku myaka itanu ikaba umunani.

Kabogoza avuga ko uburyo bwari busanzwe umukozi wa Leta yakurirwagaho imisoro y’imodoka mu gihe cy’imyaka itanu akanishyurirwa amafaranga yose yo kuyikoresha igihe yangiritse.

Yagize ati“Kuva ubu bitewe n’ubushake bw’ubigenerwa , inguzanyo y’imodoka ishobora kwiyongeraho imyaka itatu ikava ku myaka itanu yari isanzwe kuko duteganya ko abakozi baba bamaze kwishyura inguzanyo mu myaka itanu.”

Ku rundi ruhande, abo inguzanyo z’imodoka zarangiye bakiri mu kazi bazajya bakomeza kwishyurirwa na leta amafaranga yo kuzikoresha igihe zangiritse.

Amabwiriza anateganya ko Ambasaderi ugarutse mu gihugu ashobora kuzana imodoka itarengeje miliyoni 18 z’amafaranga y’u Rwanda, akayinjiza mu gihugu nta musoro aciwe, ni mu gihe abajyanama be, abashinzwe ubucuruzi, abanyamabanga be bakurirwaho imisoro ku modoka itarengeje agaciro ka miliyoni 10 z’amafaranga y’u Rwanda.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved