Abahize abandi mu gusora bashimiwe, abanyereza imisoro basabwa kwisubiraho (Amafoto)

Yanditswe na Rabbi Malo Umucunguzi
Kuya 30 Ugushyingo 2019 saa 09:12
Yasuwe :
0 0

Ikigo cy’Imisoro n’amahoro, RRA, cyashimiye abikorera bo mu nzego zitandukanye bahize abandi mu kumenyekanisha no kwishyura imisoro ku gihe, abakomeje ibikorwa birimo magendu no kunyereza imisoro basabwa kwisubiraho.

Ni umuhango wabereye mu Intare Conference Arena i Rusororo kuri uyu wa Gatanu, hashimirwa abasora 36 bahize abandi mu byiciro bitandukanye.

Abahembwe batoranyijwe kubera ibikorwa bibyara inyungu bakoze mu 2018/19, harebwe ko batashinjwe uburinganya mu bucuruzi, kuba nta nyandiko ica umusoro ya gasutamo bakorewe no kuba barishyuye umusoro mwinshi, cyane cyane ku basora bari mu cyiciro cy’abasora banini n’abaciriritse.

Komiseri Mukuru wa RRA, Bizimana Ruganintwali Pascal, yavuze ko iyi ibaye inshuro ya 17 hizihizwa umunsi w’abasora beza ku rwego rw’igihugu, nyuma y’ibikorwa binyuranye byabereye mu Ntara zitandukanye, byajyanaga no kumurikira abafatanyabikorwa umusaruro wavuye mu misoro, no kungurana ibitekerezo ku isano iri hagati y’imisoro n’iterambere ry’igihugu.

Umwaka wa 2018/19 RRA yari yahawe intego yo gukusanya umusoro miliyari 1392 na miliyoni 100 z’amafaranga y’u Rwanda, yinjiza miliyari 1422 n’ibihumbi 900 by’amafaranga y’u Rwanda, irenza miliyari 30 na miliyoni 800 Frw bingana na 2.2%, ku ntego yari yahawe.

Yakomeje ati "Ugereranyije n’umwaka wawubanjirije wa 2017/18, amafaranga twakiriye umwaka ushize yiyongereyeho 13.6 %, ni ukuvuga angana na miliyari 170 na miliyoni 700 Frw. Iyi ikaba ari intambwe ishimishije abasora bakwiye kwishimira ndetse no gushimirwa.”

Yavuze ko hari n’imbogamizi zirimo abantu bandikisha ibikorwa byabo ku bandi bikabangamira imisoreshereze, kudatanga inyemezabuguzi za EBM cyangwa bagatanga iziriho ibiciro biri hasi ngo umusoro ugabanuke, n’abasora bakomeje gukora magendu ya caguwa n’inzoga.

Komiseri Ruganintwali yavuze ko mu mwaka wa 2019/20 RRA yahawe intego yo kwinjiza imisoro n’amahoro n’andi mafaranga atari imisoro bingana na miliyari 1579 Frw, hakaba harashyizweho ingamba zizatuma bishoboka.

Zirimo gushishikariza abakora ubucuruzi bose gutanga inyemezabuguzi ya EBM nshya, no kuganira n’abikorera harebwa icyakorwa ngo gusora no gusoresha byorohere buri wese kandi bikorwe mu nzira ziboneye.

Minisitiri w’Imari n’Igenamigambi, Dr Ndagijimana Uzziel, yagaragaje ko uruhare rw’imisoro mu ngengo y’imari y’u Rwanda rukomeje kuzamuka, ashimangira ko hazakomeza ibikorwa bigamije kongerera ubushobozi urwego rw’imisoro.

Yavuze ko nubwo amafaranga aturuka imbere mu gihugu atarabasha kugera ko yo igihugu gikeneye kugira ngo kibashe kwihaza, aho ibintu bihagaze hatanga icyizere kuko nko mu myaka icumi ishize, ingengo y’imari ya leta yavuye kuri miliyari 899 Frw mu 2009/2010 igera kuri miliyari 2876 Frw muri uyu mwaka.

By’umwihariko uruhare rw’imisoro mu ngengo y’imari ya leta rwavuye kuri 41.4% mu 2019/2010, rugera kuri 53.1% mu mwaka ushize wa 2018/2019.

Naho uruhare rw’imisoro ku musaruro mbumbe w’igihugu mu myaka icumi ishize rwavuye kuri 11.3% ubu rugeze kuri 16.3%, intego ni uko rugera kuri 20.4% % mu myaka irindwi iri imbere.

Minisitiri w’Intebe Dr Edouard Ngirente, yavuze ko nubwo hari byinshi bimaze kugerwaho, hagikenewe gutera izindi ntambwe ngo igihugu kigere aho cyifuza.

Ati “Ni muri urwo rwego mbonyeho gusaba abadatanga imisoro neza n’abatayitanga na gato kwisubiraho bagahindura imyumvire, bakumva icyo bagenzi babo bagezeho, kandi bakumva ko imisoro n’amahoro ari inshingano ya twese Abanyarwanda.”

“Mboneyeho kandi umwanya wo gushishikariza abasora neza gukomeza kwitabira gukoresha ikoranabuhanga no kurikoresha neza, gukoresha imashini y’ikoranabuhanga mu gutanga inyemezabuguzi, kandi bakirinda no kunyereza imisoro haba ku bushake cyangwa habayeho ikintu cyo kurangara ho gatoya.”

Yashishikarije abaguzi kwitabira kwaka inyemezabuguzi ya EBM igihe cyose hari ikintu baguze, bityo bakaba batanze umusanzu wo kubaka igihugu, cyane ko imisoro aba bikorera batanga ibagarukira binyuze mu bikorwa remezo bitandukanye.

Uko ibihembo byatanzwe

Komiseri Mukuru wa RRA, Bizimana Ruganintwali Pascal yavuze ko abasora beza hagendewe ku buryo bamenyekanishije kandi bishyuye umusoro ku bikorwa byabo mu mwaka wa 2018.

Mu byibanzweho ni ukuba barakoze imenyekanisha ry’umusoro ku gihe bakanishyura ku gihe, kuba batarashinjwe uburiganya, kuba nta nyandiko ica umusoro (PV) ya gasutamo cyangwa ya EBM bakorewe no kuba barishyuye umusoro mwinshi cyane, cyane cyane ku bari mu cyiciro cy’abasora banini n’abaciriritse.

Abasora beza: Ni abasora bahize abandi mu Ntara zose n’Umujyi wa Kigali, basora neza ku gihe kandi bagatanya umusoro mwinshi.

-  B&G General Supply Ltd (Bugesera)
-  Shapoorji Pallonji and Company Private Limited (Gisagara)
-  Mulindi Factory Company Limited (Gicumbi)
-  Centre d’Accueil St François Xavier (Diyosezi ya Nyundo, Rubavu)
-  Randa Construction Ltd

Abasora bato

-  Jali Investment
-  Crimson Logic (Rwanda) Ltd
-  Vizor International Ltd
-  Africa Lubrificant Manufacturing Company Ltd

Abasora baciriritse

-  Shema Power Lake Kivu Ltd
-  Afriprecast Ltd
-  Pfunda Tea Company

Abasora banini

-  Societe Petroliere Ltd
-  MTN Rwanda cell
-  Skol Brewery Rwanda
-  I&M Bank Rwanda Plc

Abasora bakoresheje neza EBM

-  Hotel Chez Lando
-  Soreco Ltd (Alimentation La Gardienne)
-  Carrefour Supermarket
-  Sawa Citi Ltd

Abasora beza kandi bubahiriza gahunda ya Made Rwanda

-  Imana Steel Rwanda Ltd
-  Ruliba Clays Ltd
-  Minimex Ltd

Abasora neza umusoro ku nyungu z’ubukode: Umwe muri buri Ntara na batatu mu Mujyi wa Kigali

-  Nkundunkundiye Jean Bosco (Gasabo)
-  Ruterana Edouard (Nyarugenge)
-  Murenzi Jean (Kicukiro)
-  Mukagakwerere Veneranda (Huye)
-  Munyaneza Eugene (Musanze)
-  Sinayobye Sylvestre (Rubavu)
-  Gashumba Emmanuel (Bugesera)

Abafatanyabikorwa: Ahanini ni inzego za leta zifasha mu isoresha no gusesengura amakuru

-  RURA
-  Ikigo cy’igihugu Gishinzwe Ubutaka
-  DFID

Abahizi: Ni bo basoze umusoro mwinshi kurusha abandi uyu mwaka mu byiciro bitandukanye

-  Bralirwa
-  Park Inn Kigali by Radisson
-  MM & RJD Company Ltd

Indashyikirwa : Bamaze guhembwa inshuro nyinshi

-  Rusirare Jacques
-  Bank of Kigali
-  Polisi y’u Rwanda
-  Ingabo z’u Rwanda

Abayobozi barimo Komiseri Mukuru wa RRA, Ruganintwali Bizimana Pascal (iburyo); Minisitiri w'Intebe Dr Edouard Ngirente na Minisitiri w'Imari n'Igenamigambi, Dr Uzziel Ndagijimana baririmba Indirimbo y'Igihugu yabimburiye umuhango wo guhemba abasora beza
Minisitiri w'Ubutabera Johnston Busingye, Komiseri Mukuru Wungirije wa Polisi y'u Rwanda Juvenal Marizamunda n'Umunyamabanga wa Leta muri Minisiteri y'Imari n'Igenamigambi Dr Uwera Claudine, baririmba indirimbo y'igihugu
Abakozi ba RRA bateye indirimbo y'igihugu
Minisitiri w'Intebe Dr Edouard Ngirente asoma igitabo cyamuritswe kuri uyu wa Gatanu, gikubiyemo amakuru yose ajyanye n'imisoro
Umuyobozi Mukuru Ushinzwe Imari muri Banki ya Kigali, Nathalie Mpaka yitabiriye umuhango wo gutanga ibihembo ku basora
Umuyobozi Mukuru w'Ikigo cy'Igihugu cy'Iterambere, RDB, Clare Akamanzi yari mu batumirwa
DIGP Marizamunda yari ahagarariye Polisi y'u Rwanda yanahembwe mu Indashyikirwa
Meya w'Umujyi wa Kigali, Pudence Rubingisa nawe yitabiriye uyu muhango
Minisitiri w'Ubucuruzi n'nganda, Soraya Hakuziyaremye yitabiriye uyu muhango anagira uruhare mu gushyikiriza ibihembo bamwe mu basora
Umuyobozi Mukuru w'Ikigo cy'Ibarurishamibare, Yusuf Murangwa yari mu batumirwa
Komiseri Mukuru wa RRA Ruganintwali Pascal, yashimiye abamenyekanishije umusoro kandi bakawishyura ku gihe
Wari umunsi w'ibirori unogeye ijisho
Umuyobozi wungirije w'Urugaga rw'Abikorera, Gishoma Eric, yashimiye bagenzi be basoze neza, ariko anagaragaza ibibazo bagifite birimo gutinda gusubizwa amafaranga baba baratanze mu misoro bikaba ngombwa ko bayasubizwa
Minisitiri w'Ubutegetsi bw'Igihugu, Prof Shyaka Anastase ashyikiriza ibihembo abasora beza bahagarariye Intara n'Umujyi wa Kigali
Centre d’Accueil St François Xavier yahize abasora mu Ntara y'Iburengerazuba
Minisitiri Shyaka ashyikiriza igihembo Rtd Colonel Twahirwa Dodo ukuriye Jali Investment, ari nayo ibamo ikigo gitwara abagenzi cya RFTC
Minisitiri w'Ubucuruzi n'inganda, Soraya Hakuziyaremye ashyikiriza ibihembo bamwe mu basora
Skol Brewery Rwanda yahembwe mu basora banini bahize abandi mu mwaka ushize
Minisitiri Hakuziyaremye ashyikiriza igihembo Umuyobozi Mukuru wa I&M Bank Rwanda Plc, Robin Bairstow
Minisitiri w'Imari n'Igenamigambi Dr Ndagijimana Uzziel ashyikiriza ibihembo bamwe mu basora
Minisitiri w'Intebe Dr Ngirente atanga ishimwe ryagenewe Park Inn Kigali by Radisson
Minisitiri Ndagijimana ashyikiriza igihembo Gashumba Emmanuel wo mu Karere ka Bugesera
Minisitiri w'Intebe ashyikiriza Umuyobozi Mukuru wa Bralirwa, Merid Demissie igihembo bagenewe
Minisitiri Ndagijimana ashyikiriza igihembo Sinayobye Sylvestre w'i Rubavu
Minisitiri Uzziel ashyikiriza igihembo umuyobozi wa Randa Construction Ltd
Minisitiri Nsagijimana ashyikiriza Umuyobozi Mukuru wa RURA, Lt Col Patrick Nyirishema, ishimwe ry'umufatanyabikorwa mwiza mu misoro
Ikigo cy'Igihugu gishinzwe Imicungire n'Imikoreshereze y'Ubutaka nacyo cyahawe ishimwe ry'umufatanyabikorwa mwiza
Ikigega cy'Abongereza cy'iterambere (DFID) cyashimiwe uruhare kigira mu guteza imbere ubumenyi mu bijyanye n'imisoro binyuze mu kongerera ubushobozi abakozi ba RRA
Ni ibirori byitabiriwe n'abantu batandukanye mu Intare Conference Arena
Komiseri Mukuru wungirije wa RRA, Kanyangeyo Agnes, imurikwa ry'igitabo gishya gikubiyemo amakuru yose ajyanye n'imisoro
Guillaume Serge Nzabonimana ukora mu Nteko Ishinga Amategeko ni we wayoboye ibirori
Minisitiri Dr Ndagijimana yashimye uruhare imisoro ikomeje kugira mu kwihaza kw'igihugu nubwo urwego rwifuzwa rutaragerwaho
Minisitiri w'Intebe Dr Ngirente yasabye abakinyereza imisoro kwisubiraho
Minisitiri w'Intebe ashyikiriza ishimwe MM & RJD Company Ltd
Minisitiri w'Intebe Dr Ngirente (hagati) ari kumwe na Nathalie Mpaka ushinzwe imari muri BK (ibumoso) na Rusirare Jacques bashimiwe nk'Indashyikirwa
Abasora bashimiwe bafashe ifoto y'urwibutso na Minisitiri w'Intebe hamwe n'abandi bayobozi

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza