Kwamamaza

Abahinzi bishimiye impinduka ku micururize y’inyongeramusaruro

Yanditswe kuya 23-09-2016 saa 20:57' na Prudence Kwizera


Nyuma yuko bamwe mu bahinzi bagaragaje ko bagura inyongeramusaruro zirimo ifumbire n’imiti ikoreshwa mu buhinzi bagasanga zitujuje ubuziranenge, byatumye Minisiteri y’Ubuhinzi n’Ubworozi (Minagri) ishyiraho amabwiriza agamije kuvuguta umuti w’iki kibazo kigakemuka burundu.

Ni kenshi abahinzi bo hirya no hino mu gihugu bagaragaje ko haba ubwo baguze ifumbire cyangwa imiti bakoresha mu buhunzi, aho kongera umusaruro wabo nk’uko baba babyiteze, ahubwo ukangirika bakarumbya.

Minagri na yo yemera ko icyo kibazo gihari, ariko ikavuga ko cyaba giterwa n’ubucuruzi bw’inyongeramusaruro bukorwa mu kajagari bigatuma bamwe mu bacuruzi bagurisha ifumbire n’imiti bitemewe cyangwa byarengeje igihe.

Mu gukemura iki kibazo hashyizweho amabwiriza ajyanye n’imicururize y’inyongeramusaruro akubiye mu Iteka rya Minisitiri No 002 ryo kuwa 14 Nyakanga 2016 rigena amabwiriza agenga imiti n’ifumbire mva ruganda ryatangajwe mu Igazeti ya Leta ya Repubulika y’u Rwanda kuwa 25 Nyakanga 2016.

Aya mabwiriza hari aho agaragaza ko urutonde rw’imiti n’ifumbire byemewe gucuruzwa mu Rwanda ndetse n’abemerewe kubicuruza abo aribo. Mu minsi micye akaba azatangira kumanikwa hirya no hino ahahurira abantu benshi ndetse atangarizwe n’abaturage.

Hari aho avuga ko umuntu wese utumiza cyangwa wohereza inyongeramusaruro z’ubuhinzi mu mahanga agomba kuba afite impamyabumenyi y’icyiciro cya kabiri cya Kaminuza (A0) mu bijyanye n’ibinyabuzima n’ubutabire (Biochemistry) cyangwa ubumenyi mu by’ubuhinzi (Agriculturial Sciences), bitaba ibyo akaba afite umukozi ubyujuje.

Ibi ngo bizafasha umuhinzi kuba yahabwa ibisobanuro n’umucuruzi w’ifumbire cyangwa imiti ku mikoreshereze yabyo.

Naho abacuruza inyongeramusaruro mu buryo busanzwe mu gihugu bo icyo basabwa ni ukuba bafite impamyabumenyi y’amashuri yisumbuye A2 mu bijyanye n’ibinyabuzima n’ubutabire cyangwa ubumenyi mu by’ubuhinzi, cyangwa afite umukozi ubyujuje, kandi akagaragaza n’inzu bazabikamo ibicuruzwa.

Ubwo abakozi ba Minagri bari mu gikorwa cyo kuzenguruka uturere tw’igihugu basobanura iby’aya mabwiriza, abahinzi batari bacye bishimiye izi mpinduka, bavuga ko bazitezeho umuti w’ikibazo bafite.

Vedaste Mboneye wo mu karere ka Nyamasgabe avuga ko ahinga ibigori, ingano n’ibirayi, bityo bigatuma agura ifumbire mva ruganda n’imiti yo gukoresha mu buhinzi bwe.

Yagize ati “Nanjye nahoraga mbyifuza kuko waguraga n’umucuruzi ifumbire cyangwa umuti ugasanga atabasha kugusonaurira uko uwukoresha, noneho hakaba nubwo aguhaye ibyapfuye, wagaruka kumubaza akavuga ko atabizi. Ubwo rero ubwo bagiye kuzana ababihugukiye bizadufasha gukorana nabo neza kuko bazaba bazi ibyo bakora”.

Theogene Ndayisenga wo mu karere ka Nyaruguru na we avuga ko asanzwe ahinga akorora n’inzuki, bityo akaba yizeye ko amabwiriza akubiye mu Iteka rya Minisitiri azakemura n’ikibazo cy’imiti yangiza ibihingwa ikica n’inzuki.

Ati “Bakimara kudusobanurira iby’aya mabwiriza nahise numva ko ibibazo dufite bigiye gukemuka, cyane cyane twizetye ko bazatuzanira imiti myiza itangiza imyaka yacu kandi itica n’inzuki”.

Abahinzi bo muri Nyaruguru na Nyamagabe baganiriye na IGIHE icyo bahurizaho ni uko igihe aya mabwiriza azubahirizwa uko bikwiye bizatuma ubuhinzi bwabo bubagirira inyungu.

Umukozi muri Minagri, Dr Emmanuel Ngomiraronka yabwiye aba bahinzi ko amabwiriza akubiye mu Iteka rya Minisitiri agamije guteza imbere ubuhinzi, ndetse no kugira ngo gucuruza inyongeramusaruro bikorwe kinyamwuga.

Dr Ngomiraronka ati “Aya mabwiriza avuga ko ya miti n’amafumbire bitemewe bigomba guhita bivanwa ku isoko bigashyingurwa, noneho tugasigara dukoresha inyongeramusaruro zemewe kandi zakozweho ubushakashatsi. Ibyo rero bizatuma hatongera kubaho ibibazo mu buhinzi biterwa n’imiti cyangwa ifumbire byangiza imyaka y’abahinzi cyangwa bitagize icyo bibafasha”.

Kugirango iyi gahunda yo guca ifumbire mvaruganda n’imiti ikoreshawa mu bihizni itujuje ubuziranenge izagerweho, abahinzi, abayobozi ku nzego zose basabwe umusanzu wabo.

Icyo bakwiye gukora ngo ni ugutanga amakuru kuho babonye hari abacuruzi b’inyongeramusaruro babikora mu buryo butemewe cyangwa bacuruza ibitujuje ubiziranenge.

Hakaba bahagaragajwe ko hari ibihano bikarishye ku muntu wese uzacuruza inyongeramusaruro atabifitiye uruhushya cyangwa uzabikora mu buryo bunyuranyije n’amategeko.

Minagri ikaba yizeza abahinzi ko nihamara gucika akajagari kari mu bucuruzi bw’inyongeramusaruro, ibibazo bahuraga na byo biturutse ku ifumbire n’imiti bitujuje ubuziranenge bizakemuka.

Abahinzi n'abafatanyabikorwa mu buhinzi mu Karere ka Nyamagabe
Abahinzi n'abafatanyabikorwa mu buhinzi bo mu Karere ka Nyaruguru
Abakozi ba Minagri mu Karere ka Nyaruguru baganira n'abahinzi
Ngomiraronka aganira n'abahinzi bo mu Karere ka Nyamagabe
Umukozi muri Minagri, Dr Emmanuel Ngomiraronka

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved