Kwamamaza

Abahinde 46 basuye Kibeho batashye basendereye ibyishimo bifitiye inyungu u Rwanda

Yanditswe kuya 12-09-2016 saa 13:21' na Ntakirutimana Deus


Ku butaka butagatifu bwa Kibeho hasurwa n’abantu b’ingeri zose barimo ba mukerarugendo baturuka mu bihugu by’i Burayi, Amerika, Aziya ndetse no muri Afurika, baza kuhizihiriza imwe mu minsi mikuru, bakageza ubutumwa bahavanye ku bandi nabo bakaza kwihera ijisho ukuri kw’impamo kw’ibyo babwiwe.

Amateka yaho yashinze imizi guhera mu 1981, ubwo abakobwa batatu bahigaga babonekerwaga na Bikira Mariya, atuma abaturutse imihanda yose y’Isi baza kuhasengera.

Ku Cyumweru tariki ya 11 Nzeri 2016, itsinda ry’Abahinde 46 bagiriye uruzinduko i Kibeho rwo kureba ibyo byiza, batashye bavuga ko banyuzwe ndetse bashimangira ko abanyarwanda bahiriwe no kugira ahantu hafite amateka akomeye mu myemerere ya Gikirisitu.

Mu rugendo rwabo babanje gusura ibice birimo Bazirika Nto ya Kabgayi, bakomereza i Nyanza ahabereye umuhango wo gutura u Rwanda Kirisitu Umwami barusozereza i Kibeho.

Capt Errol Fernandes, umwe mu bari bayoboye iryo tsinda yavuze ko rigizwe n’abagatolika 35 ndetse n’abasengera mu yandi madini atandukanye ahabarizwa, biyemeje kuza kuhasura nyuma yo kubwirwa amateka yaho.

Fernandes yongeyeho ko baje mu Rwanda mu rwego rwo gukomeza ukwemera kwabo nyuma yo gusura ibindi bice bitandukanye by’Isi byagiye biberamo amabonekerwa birimo Fatima muri Portugal na Guadalupe mu Bufaransa. Nyuma yo gusura aho hantu hatandukanye ngo byongereye ukwemera kwabo.

Ati “Natunguwe cyane na Kibeho, ni ahantu heza hafasha umuntu kwiyunga n’umutima we ndetse no kuruhuka. Urabona Bikira Mariya hano ni ibintu byiza nta cyakurangaza, mu masengesho yawe mu gihe umurangamiye ni nko kumanukirwa n’ijuru”.

Yongeyeho ko mu duce dutandukanye basuye bashimye amateka yaho yatumye bongera ukwemera kwabo, ndetse abafasha kugira inyota yo gushishikariza Abahinde bagenzi be na bo kuza mu Rwanda bakirebera ibyo byiza, nyuma yo gusanga u Rwanda ari nta makemwa.

Ati “ Ngiye kubabwira ko mu Rwanda ari ahantu heza ho gusura, hari ikirere cyiza cyane, abantu bishimira kwakira abashyitsi, igihugu gifite isuku, rwose ni ahantu heza ho kumara igihe, by’umwihariko i Kibeho ku bijyanye no gukomeza kongera ukwemera.”

Callixte Gakire, Umukozi mu ishami rishinzwe Ubukerarugendo mu Kigo cy’igihugu Gishinzwe Iterambere, RDB yavuze ko ubukerarugendo nyobokamana bukunze kwitabirwa n’abantu benshi, cyane i Kibeho ku minsi mikuru ijya ihizihirizwa, kandi ngo bakazakomeza kwiyongera igihe hazaba hageze ibikorwa remezo bitandukanye bihakenewe.

Ubutaka Butagatifu bwa Kibeho n’ingoro ya Bikira Mariya bishinzwe kwitabwaho n’abapadiri b’Aba-Pallottin.

Padiri Tegera Wenceslas , umwe muribo yavuze ko bahura n’ikibazo cyo kwakira abantu bakunze kuhajya ku minsi mikuru, aho usanga abenshi barara ku mbuga ihari abandi bakarara mu kiliziya. Ni muri urwo rwego basaba abikorera na Leta kwitabira gushora imari muri ako gace, biciye mu kuhashyira ibikorwa remezo bitandukanye.

Kibeho igizwe n’ibice bitandukanye by’ahabereye amabonekerwa, ahari iriba ry’amazi y’umugisha Bikira Mariya yasezeranyije ababonekewe n’ingoro yamwitiriwe.

Tariki ya 15 Kanama buri mwaka na 28 Ugushyingo, ni iminsi mikuru irimo uw’Ijyanwa mu ijuru rya Bikira Mariya n’uwo kwibuka amabonekerwa yahabereye aho
mu gihe gisanzwe hasurwa n’abantu bari hagati y’ijana na magana abiri.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved