Abahesha b’Inkiko batunze urutoki ibigo bya Leta byimana amakuru bikadindiza irangizarubanza

Yanditswe na Evariste Nsengimana
Kuya 15 Ugushyingo 2019 saa 11:16
Yasuwe :
0 0

Abahesha b’Inkiko b’umwuga mu Rwanda bashyize mu majwi bimwe mu bigo bya Leta byimana amakuru ajyanye n’imitungo y’abatsinzwe imanza yashingirwaho bashyira mu bikorwa ibyemezo by’Inkiko mu kwishyuza uwatsinzwe.

Ibi babigarutseho mu nama yabahurije i Kigali ku wa 14 Ugushyingo 2019, basobanura ko ibigo bimwe birimo icy’Imisoro n’Amahoro (RRA), abashinzwe serivisi z’ubutaka, bagorana mu kubaha amakuru ajyanye n’imitungo yanditse ku bantu baba batsinzwe.

Aba bahesha b’Inkiko bavuga ko mu gihe nta mbogamizi bagize kubona amakuru y’imitungo yanditse ku muntu bitagomba kurenza nibura amezi atatu ariko kubera imikoranire mibi hagati yabo n’ibyo bigo hari ubwo bifata n’umwaka, bikadindiza ishyirwa mu bikorwa ry’ibyemezo by’inkiko.

Uwitwa Godfrey Musoni yagize ati “Ntabwo numva impamvu Ikigo cy’Imisoro n’Amahoro gitinda gusubiza ubusabe bwacu. Ushobora kubaka amakuru bakazagusubiza nyuma y’umwaka.”

Mugenzi we ukora mu Mujyi wa Kigali, Uwimana Ismael, yashimangiye ko iyo ari imwe mu mbogamizi bakunze kugira ishingiye ku mikoranire mibi hagati yabo n’inzego bireba, bigatuma abantu babatera icyizere, bamwe bagakeka ko bariye ruswa.

Yatanze urugero nk’iyo hari ikinyabiziga umuhesha w’Inkiko yifuza kumenya nyiracyo kugira ngo hashyirwe mu bikorwa umwanzuro w’Urukiko, bidakwiye kurenza amezi atatu ariko inshuro nyinshi usanga biyarenza kubera gutinda guhabwa amakuru na RRA.

Ati “Bakwiye kudufasha natwe tukabona uko turangiza inshingano zacu ku gihe […] Abantu batekereza ko ubwo bukererwe buterwa n’uko twahawe ruswa.”

Perezida w’Ishyirahamwe ry’Abahesha b’Inkiko b’umwuga, Antoine Sebera Nyunga, yavuze ko iki kibazo kigiye kuganirwaho n’inzego bireba kugira ngo gishakirwe umuti.

Ati “Tuzagirana inama n’abayobozi b’Ikigo cy’Imisoro n’amahoro, Polisi n’ibindi bigo kugira ngo turebe uburyo batworohereza mu mirimo yacu.”

Umuyobozi w’ishami rishinzwe kwegerereza abaturage serivisi muri Minisiteri y’Ubutabera, Urujeni Martine, yabijeje ko Minisiteri akorera izakorana n’ibigo birebwa mu kugishakira umuti, anabasaba kongera imbaraga mu kazi bakora n’inyuma ya Kigali.

Mu bahesha b’Inkiko b’umwuga 499 bari mu Rwanda, abakorera muri Kigali ni 239.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza