Kwamamaza

Abahatanira gusimbura Senateri Mucyo batangiye kwiyamamaza

Yanditswe kuya 22-11-2016 saa 07:59' na IGIHE


Abakandida batanu barimo abagore batatu n’abagabo babiri batangiye ibikorwa byo kwiyamamariza gusimbura Senateri Mucyo Jean de Dieu witabye Imana mu kwezi gushize.

Dr François Masabo, Monique Mukakarera, Dr Richard Sezibera, Veneranda Mukamuganga na Félicité Muhimakazi; batangiye kwiyamamaza mu ntara y’Amajyepfo, aho ejo kuwa Mbere bahereye mu Karere ka Nyamagabe bakazakomereza no mu tundi tuyigize.

Ubusanzwe Inteko Ishinga Amategeko umutwe wa Sena uba ugizwe n’abasenateri 26 barimo 12 batorwa mu ntara zose n’Umujyi wa Kigali, biyongeraho abahagarariye amashuri makuru na za Kaminuza n’abandi umunani bashyirwaho na Perezida wa Repubulika.

Intara y’Amajyepfo igomba kugira abasenateri batatu ariko ubu hasigaye babiri nyuma y’uko Senateri Mucyo na we wari uyihagarariye yitabye Imana ajya ku kazi.

Umunyamabanga Nshingwabikorwa wa Komisiyo y’Igihugu y’Amatora, Charles Munyaneza, yemeje ko ibikorwa byo kwiyamamaza kuri abo bakandida bagomba gutorwamo usimbura Mucyo byatangiye kandi bizagera mu turere umunani twose tugize iriya ntara muri uku kwezi.

Yagize ati “Abatora barimo abagize njyanama y’akarere bose, batatu baturuka muri biro ya buri murenge aribo Perezida, Visi Perezida n’Umunyamabanga.”

Amatora ateganyijwe kuwa 1 Ukuboza 2016, amajwi y’agateganyo akaba azatangazwa kuwa 6 Ukuboza 2016. Kuwa 13 Ukuboza nibwo bidasubirwaho hazamenyekana umusenateri mushya uhagararira Amajyepfo.

Uwiyamamaza agomba kuba arengeje imyaka 40 y’amavuko kandi afite nibura impamyabumenyi y’icyiciro cya kabiri cya kaminuza, cyangwa yarakoze mu myanya ikomeye mu nzego za leta cyangwa iz’abikorera.

Uzatorwa azasoza manda ya Senateri Mucyo izarangira mu 2019, ari nabwo hateganyijwe andi matora.

Icyo wamenya ku bakandida biyamamaza

Dr François Masabo w’imyaka 57, afite PhD mu bijyanye n’imibanire no gukemura amakimbirane. Ni umuyobozi w’agateganyo mu kigo cyo gukemura amakimbirane (CCM) muri Kaminuza y’u Rwanda ishami rya Huye (CASS).

Monique Mukakarera w’imyaka 55, afite impamyabumenyi y’icyiciro cya kabiri cya kaminuza mu burezi. Ubusanzwe ni umuyobozi w’ishuri ribanza rya Mahembe mu Karere ka Muhanga akaba na Visi Perezida wa njyanama y’akarere.

Dr Richard Sezibera w’imyaka 52 yabaye Umunyamabanga Mukuru w’Umuryango wa Afurika y’Iburasirazuba, EAC, kugeza umwaka ushize. Yabaye Minisitiri w’Ubuzima n’umwe mu bagize Inteko Ishinga Amategeko n’iyindi myanya ikomeye.

Hari kandi Veneranda Mukamuganga w’imyaka 55, afite impamyabumenyi y’icyiciro cya gatatu cya Kaminuza mu buringanire n’iterambere. Ni inzobere mu bijyanye n’uburinganire aho kuri ubu aribyo akora.

Undi mukandida ni Félicité Muhimakazi w’imyaka 53. Afite impamyabumenyi y’icyiciro cya kabiri cya Kaminuza, akaba yikorera ku giti cye.

Bane bagomba gutorwamo uzasimbura Jean de Dieu Mucyo batangiye kwiyamamaza

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved