Abaharanira uburenganzira bw’abakozi bongeye gutanga impuruza kw’ishyirwaho ry’umushahara fatizo

Yanditswe na Mukaneza M.Ange
Kuya 3 Mata 2018 saa 02:48
Yasuwe :
0 0

Mu gihe u Rwanda rukigendera ku iteka rigena umushahara fatizo ryashyizweho mu myaka igera kuri 38 ishize, Ihuriro ry’imiryango iharanira uburenganzira bw’abakozi, igaragaza ko bikomeje kuba imbogamizi ku izamuka ry’ubukungu bw’abantu ku giti cyabo ndetse n’igihugu muri rusange.

Mu muhango wo gushyira hanze ubushakashatsi ku bijyanye n’ibibazo biri mu kuba nta mushahara fatizo unoze ndetse na pansiyo ikiri hasi bwamuritswe kuri uyu wa 3 Mata 2018, iri huriro ryagaragaje ko hakigenderwa ku iteka ryashyizweho mu 1974 rikaza kuvugururwa mu 1980.

Iri teka ryateganyaga ko umushahara fatizo uba amafaranga 100 ku munsi, ibintu bigira ingaruka mu gutuma umukozi atabasha no kwikemurira ibibazo by’ibanze ndetse uretse kuba we ubwe atabasha kwiteza imbere, atanatanga umusaruro ukwiye.

Umwe mu bagize ihuriro ry’iyi miryango ine, akaba n’Umunyamabanga Mukuru wungirije wa COTRAF, Gasore Séraphin, yavuze ko ubu bushakashatsi bwakozwe mu Ukuboza 2017, bugamije kwerekana ko umushahara fatizo ku bakozi na pansiyo bitakigendanye n’uko isoko rihagaze.

Ati “Guhuza umushaha na pansiyo n’ukuri kuri ku isoko ntabwo bizamura gusa wa mukozi wahawe umushahara na wa wundi wabonye pansiyo, bizamura n’ubukungu busanzwe bw’igihugu kuko abo bantu iyo bahembwe neza, batunga neza imiryango yabo, bava mu manegeka, bishyura mitiweli, bajyana abana babo mu mashuri, babandi bakora imyuga bakabona ababahahira, kubera ko abantu batagihangayikishijwe n’ibyo kurya gusa.”

Muri ubu bushakashatsi iyi miryango iharanira uburenganzira bw’abakozi n’akazi kanoze, igaragaza ko ikurikije uko ibiciro ku isoko hirya no hino mu gihugu bihagaze ndetse n’ibyo umuntu aba akeneye ngo abashe kubaho neza, umushahara fatizo ukwiye kuba nibura 87 285 Frw ku batuye mu cyaro na 126 260Frw ku batuye mu mijyi.

Ku bijyanye na pansiyo iyi miryango ivuga ko yishimira kuba muri Gashyantare uyu mwaka Guverinoma yarafashe umwanzuro wo kongera pansiyo ihabwa abari mu kiruhuko cy’izabukuru, bifuza ko yajya izamurwa ikagendana n’igihe bidasabye gutegereza imyaka myinshi.

Ikigo cy’Ubwiteganyirize mu Rwanda RSSB kigaragaraza ko, abahabwaga amafaranga ari munsi ya 5200 bazahabwa inyongera ya 157,2% agere ku bihumbi 13 by’amafaranga y’u Rwanda naho abahembwaga ari hagati ya 5200 na 10000 bazajya bahabwa ibihumbi bigera kuri 16 Frw, ni ukuvuga ko inyongera yabo igera ku 118%.

Ni mu gihe ku bahabwaga amafaranga y’u Rwanda ari hagati y’ibihumbi 10 na 20 azazamurwa agashyirwa ku bihumbi 25.Abafataga kuva ku bihumbi 20 kugeza kuri 50 amafaranga yabo aziyongeraho 45,5% bafate kuva ku bihumbi 40 kuzamura. Abahembwaga ari hagati y’ibihumbi 50 na 100 bazajya bahabwa kuva kuri 90 kuzamura.

Ubu bushakashatsi bushyizwe hanze mu gihe tariki ya 5 Werurwe, Abadepite bagaragaje ukutanyurwa no kuba kugeza ubu nta teka rya Minisitiri rigena umushahara fatizo ryigeze rishyirwaho kandi byarateganywaga n’itegeko rigenga umurimo ryo mu 2009.

Minisitiri y’Abakozi ba Leta n’Umurimo, Rwanyindo Kayirangwa Fanfan wari wagiye gusobanura umushinga w’itegeko rishya rigenga umurimo risimbura iryo mu 2009, yatangaje batangiye gukora inyigo ku buryo umushahara fatizo uzatangazwa vuba.
Ati “Twaratangiye n’inyigo zimwe zarakozwe kuva 2014, ubu turi kuzuza ayo makuru twafashe. Hanyuma dukomeze n’ibiganiro n’abikorera. Ntabwo bizaba inkuru cyangwa indirimbo ikomeza kuririmbwa, icyo navuga bizakorwa, tuzakora ibishoboka byose bishyirwe mu bikorwa.”

MIFOTRA ivuga ko itegeko rishya ry’umurimo rizateganya ko umushara fatizo uzareba abakozi bakora mu mirimo yanditswe n’itanditswe.

Gasore Seraphin avuga ko kuzamura umushahara fatizo na pansiyo bikagendana n'igihe byagira uruhare mu iterambere ry'abaturage n'igihugu ntigisigare inyuma
Imurikwa ry'ubu bushakashatsi ryitabiriwe n'abahagarariye imiryango itandukanye iharanira uburenganzira bw'abakozi
Phocas Musemakweli wakoze ubu bushakashashatsi afatanyije n'imiryango iharanira uburenganzira bw'abakozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza