Abaharanira guteza imbere uburinganire bagaragaje ibizakorwa mu kubaka ubushobozi bw’umugore

Yanditswe na Akayezu Jean de Dieu
Kuya 14 Nzeri 2018 saa 07:30
Yasuwe :
0 0

Imiryango Mpuzamahanga itari iya leta, Sosiyete sivili n’abaharanira ihame ry’uburinganire n’ubwuzuzanye bw’umugabo n’umugore biyemeje kongera ubufatanye na Minisiteri y’uburinganire n’Iterambere ry’Umuryango, Migeprof, mu kubaka ubushobozi bw’umugore.

Inama yahuje abafatanyabikorwa ba Minisiteri y’Uburinganire n’Iterambere ry’Umuryango, kuri uyu wa Kane yagaragaje ibikorwa by’ingenzi biteganyijwe gukorwa mu mwaka w’ingengo y’imari 2018/2019, mu bijyanye no kwimakaza ihame ry’uburinganire.

Umuryango Action Aid Rwanda, wavuze ko uzakoresha amafaranga asaga miliyoni 700Frw mu gutera inkunga abagore by’umwihariko abakora mu mirimo y’ubuhinzi bashyirirwaho aho guhuriza umusaruro wabo no gushakirwa amasoko.

Uwamariya Josephine uyobora Action Aid Rwanda, yavuze ko bakoresha 60% y’ingengo y’imari yose mu bikorwa rusange bigamije kubaka ubushobozi bw’umugore kuko basanga ari we nkingi y’iterambere ry’igihugu.

Yagize ati “Twebwe nka Action Aid, umugore niwe nkingi ya gahunda zose kuko ari we mutima w’urugo kandi akaba ariwe ufite inshingano zikomeye mu iterambere ry’umuryango n’iry’igihugu.”

Migeprof ivuga ko ibyo kwishimira ari byinshi cyane ko uyu munsi abagore 63 % babasha kugera kuri serivisi z’imari binyuze muri za banki, ibigo by’imari n’ubundi buryo butuma bagera kuri serivisi z’imari.

Hari ikindi gice kinini kitarabasha kugera kuri serivisi z’imari abo bashyiriweho ibigega byo kubishingira babifashijwemo n’abajyanama babiri bari kuri buri murenge bashinzwe kubafasha mu bucuruzi.

Mu bakozi 107 bari muri za Minisiteri zitandukanye n’Uturere, 85 ni abagabo mu gihe abagore ari 22.

Umunyamabanga Nshingwabikorwa w’Inama y’Igihugu y’Abagore, Kamanzi Jackline, yavuze ko ibikorwa biri mu ngengo y’imari ya 2018/2019 bizibanda ku bukangurambaga harebwa icyakorwa mu kubaka ubushobozi bw’abagore bari mu nzego zifatirwamo ibyemezo.

Yakomeje agira ati “Ikindi kizakorwa ni ukubaka ubushobozi bw’abagore bari mu nzego zifata ibyemezo kugira ngo bajye babasha kureba mu nyungu rusange ariko hitawe ku ihame ry’uburinganire muri gahunda z’igenamigambi, gukora ingengo y’imari bakareba bati ese ihame ry’uburinganire ryitaweho? izi gahunda zizagera ku mugore n’umugabo ntawe usigaye inyuma?”

Kamanzi yavuze kandi ko hari gutegurwa uburyo bw’inama rusange z’Inama y’Igihugu y’Abagore kugera ku rwego rw’umudugudu zizafasha mu gukomeza ubukangurambaga bugamije gukomeza kubaka ubushobozi bw’umugore.

Iyi nama yitabiriwe n'abafite aho bahuriye no guteza imbere uburinganire
Kamanzi Jackline yavuze ko hagiye gushyirwa ingufu mu guhugura abagore bari mu nzego zifata ibyemezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza