Imfungwa n’abagororwa 16 bahigiye kwitwara neza mu bizamini bya Leta

Yanditswe na Ishimwe Israel
Kuya 7 Ukwakira 2016 saa 07:22
Yasuwe : XX
0

Bwa mbere imfungwa n’abagororwa 16 bari mu Kigo Ngororamuco cya Nyagatare bagiye gukora ibizamini bisoza amashuri abanza n’ay’icyiciro rusange.

Abazakora ibizamini bya Leta mu ntangiriro z’Ugushyingo uyu mwaka barimo batanu basoza icyiciro rusange n’abandi 11 mu mashuri abanza, bashimangira ko barimo gusubiramo amasomo ndetse biteguye neza nta bwoba bibateye nubwo babimenyeshejwe batinze nk’uko The New Times dukesha iyi nkuru ibitangaza.

Ikigo Ngororamuco cya Nyagatare kuri ubu gifite abana 297 bari hagati y’imyaka 14 na 18 baba barahamijwe ibyaha bitandukanye ariko bakaba bafashwa kwiga kugira ngo bizabagirire akamaro ubwo bazaba basoje ibihano byabo.

Olive Niyobyose, ukomoka mu karere ka Kirehe amaze imyaka ibiri mu Kigo ngororamuco cya Nyagatare ,ni umwe mu bazakora ibizami bisoza amasomo y’Icyiciro Rusange.

Yagize ati “Nageze hano nkomeza amasomo yanjye, none niteguye gukora ibizamini bya Leta. Nazanywe hano niga mu mwaka wa mbere w’amashuri yisumbuye. Twajyaga dusaba gukora amarushanwa n’abandi banyeshuri ntibadusubize. Umenya baratekerezaga ko tutiteguye.”

Undi mwana uri mu Kigo ngororamuco, Chaffy Niyonkuru we yatangaje ko abanyeshuri bashyizemo umwete ubwo bari bakimenya ko bemerewe gukora ibizamini bya Leta.

Ati “Nta bwoba dufite bwo kuzatsindwa kuko dufite abarimu beza. Nubwo twabimenyeshejwe dutinze,twatangiye gusubiramo amasomo n’umuhate mwinshi,twiteguye gukora ibizami kandi twizeye gutsinda.”

Abiga bagiye kongererwa ubushobozi

Uzabumwana Jean Népomuscène ni umwarimu wigisha abana bagororerwa mu Kigo cya Nyagatare, yatangaje ko barimo gukora cyane mu gutegura abanyeshuri.

Ati “Twishimiye icyemezo cyo kureka abana bagororwa bakemererwa gukora ibizamini bya Leta. Tubigisha neza kandi n’ubundi baratsinda mu ishuri nubwo babaga batabonye amahirwe yo gukora ibizamini bya Leta. Kubera aya amahirwe rero babonye ubu bafite umwete cyane kandi ndizera ko bazakora neza.”

Umuyobozi wa Gereza ya Nyagatare, IP Athanase Nyandwi, yatangaje ko bateganya ko umwaka utaha bazongeraho icyiciro cy’amashuri kugira ngo abarangije babone aho bakomereza amasomo.

Nyandwi avuga ko igihe umunyeshuri azaba yatsinze azimurwa akajya mu wundi mwaka mu gihe agikomeje gusoza igihano cye.

Yagize ati “Iyo twakiriye umwana wo kugororwa hari gahunda ijyanye n’uburezi (School Orientation Protocol) tumushyiramo bitewe n’amashuri yari agezemo ndetse n’igihano yahawe.”

Yakomeje avuga ko nubwo kwemererwa gukora ibizamini byamenyekanye bitinze barimo gukora uko bashoboye ngo abanyeshuri bategurwe.

Ati “ Ntabwo byoroshye, umwanzuro wamenyekanye ibizamini byegereje ariko turimo gukorana n’akarere mu gutegura abanyeshuri.”

Umuvugizi wa RCS, CIP Hillary Sengabo, yatangarije IGIHE ko abanyeshuri bamenyeshejwe ko bazakora ibizamini mu kwezi gushize bitewe n’uko bwari ubwa mbere bagiye kubikora, kwemererwa bikaba byaratinze.

Icyo kigo kirimo amashuri abanza n’ayisumbuye, amashuri y’imyuga ndetse n’ibibuga by’imikino inyuranye.

Ikigo Ngororamuco cy’abana cya Nyagatare cyatangiye mu mwaka wa wa 2009, cyakira imfungwa n’abagororwa bakuru. Nyuma byarahindutse gitangira kwakira abana b’abahungu n’abakobwa bafite hagati y’imyaka 14 kugera ku 18 bamaze gukatirwa n’inkiko kubera ibyaha bakurikiranyweho.

Iki kigo giherereye mu Murenge wa Nyagatare, Akarere ka Nyagatare, mu Ntara y’Iburasirazuba, kuri ubu kibarizwamo abana 297 muri bo 22 ni abakobwa.

Abana bagororerwa mu Kigo Ngororamuco cya Nyagatare biteguye neza ibizamini bya Leta
Bahabwa amasomo atandukanye arimo ajyanye n'ubumenyingiro
Uzabumwana Jean Népomuscène wigisha abana bagororerwa mu Kigo cya Nyagatare avuga ko imyiteguro ku bazakora ibizamini ihagaze neza
Umuyobozi wa Gereza ya Nyagatare, IP Athanase Nyandwi, atangaza ko umwaka utaha bateganya kongeraho icyiciro cy’amashuri ku bashaka gukomeza kwiga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza