Kwamamaza

Abagororwa 11 mu kigo cya Nyagatare bakoze ikizamini cya leta

Yanditswe kuya 3-11-2016 saa 16:35' na Nsengimana Evariste


Abagororwa 11 barimo abakobwa babiri bagororerwa mu Kigo Ngoramuco cya Nyagatare, bari gukora ikizamini cya leta gisoza amashuri abanza, gusa ngo nubwo bari kugikora batinze kubimenyeshwa.

Ubwo basurwaga n’itangazamakuru kuri uyu wa 3 Ugushyingo, aho bakoreraga ibi bizami kuri GS Nyagatare, aba banyeshuri batangaje ko biteguye gutsinda ibi bizamini bitewe n’uko ngo babonye ibyo bari kubazwa bidakanganye.

Umuyobozi wa gereza ya Nyagatare, IP Nyandwi Athanase, avuga ko biteguye neza ibi bizami kandi ko bizeye ko aba banyeshuri babo bazabitsinda. Nubwo bimeze bityo, uyu muyobozi avuga ko bamenyeshejwe n’Ikigo cy’Igihugu gishinzwe Uburezi (REB) ko aba bana bazakora ikizamini cya leta kimwe n’abandi batinze (muri Nzeri), ku buryo ngo byabaye nk’ibibatunguye binabasaba gukoresha ingufu nyinshi kugira ngo babashe gutegura neza aba bana.

Uyu muyobozi avuga ko bo bari basanzwe bigisha aba bana gusa ngo iby’uko bazakora ikizamini cya leta ntabyo bari bazi kuva mbere nk’uko abandi banyeshuri basanzwe batangira umwaka bazi neza ko bazagikora.

Kuri iki kibazo, CIP Hillary Sengabo, Umuvugizi w’Urwego rw’Igihugu rushinzwe imfungwa n’abagororwa, RCS, avuga ko byatewe n’uko REB yabamenyesheje itinze ko aba banyeshuri bazakora ikizamini cya leta nk’abandi, gusa ngo ntikizongera kubaho bitewe n’uko kuva ubu bamaze kumenya ko abanyeshuri bo muri iki kigo bazajya bakora iki kizamini nk’abandi.

CIP Sengabo ariko avuga ko urwego avugira ndetse n’igihugu muri rusange bishimira ko n’ubwo umwana aba agororwa ku bw’icyaha yakoze, abona n’amahirwe yo kwiga kimwe n’abandi.

Umuyobozi wa Gereza ya Nyagatare avuga ko nubwo bishimira uburezi buyitangirwamo, ngo baracyafite imbogamizi z’uko nta mfashanyigisho zihagije mu kwigisha aba bana ndetse nta mahugurwa ahabwa ababigisha n’ibindi. Ibi bifuza ko bafashwa kubibona.

Uretse aba banyeshuri bari mu kizamini gisoza amashuri abanza, muri iki Kigo Ngororamuco cya Nyagatare kandi habarurwa abanyeshuri batanu bazakora ikizamini gisoza icyiciro rusange cy’amashuri yisumbuye kizatangira mu cyumweru gitaha.

Ikigo Ngoramuco cya Nyagatare kigororerwamo abana b’ibitsina byombi bari hagati y’imyaka 14 na 18, baba barakatiwe n’inkiko kubera ibyaha bakurikiranyweho. Kuri ubu kibarizwamo abana 297 muri bo 22 ni abakobwa.

Aba banyeshuri bemeza ko ibizamini bakoze nta gikanganye babonyemo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved