Abagore 100 bakora ishoramari barimo abanyarwandakazi bagiye guhatanira ibihembo bizatangwa na G7

Yanditswe na Evariste Nsengimana
Kuya 1 Kanama 2019 saa 08:21
Yasuwe :
0 0

Abagore 100 bakora ishoramari bo mu Rwanda, Kenya, Uganda, Tanzania na Ethiopia bahawe amahirwe yo kwitabira amarushanwa azatuma bahabwa ubufasha n’ibigo by’abaterankunga byo mu itsinda ry’ibihugu biteye imbere kurusha ibindi rizwi nka G7.

Ibyo bigo birimo FinDev cyo muri Canada, Commonwealth Development Corporation cy’u Bwongereza, Proparco cy’u Bufaransa, Overseas Private Investment Corporation cya Leta Zunze Ubumwe za Amerika n’umuryango MasterCard Foundation.

Ubwo iri rushanwa ryiswe ‘Invest2Impact’ ryamurikagwa i Kigali kuwa 22 Nyakanga 2019, Umujyanama mu by’uburinganire mu kigo ‘FinDey Canada’ Anne Marie Lévesque, yabwiye IGIHE ko urubuga rwo kwiyandikishirizaho rugiye gufungurwa.

Yavuze ko kwiyandikisha ku rubuga (https://invest2impact.africa/ ) bizamara ibyumweru umunani, hagakurikiraho gutoranya abagore 100 muri ibyo bihugu bitanu bujuje ibisabwa mu bazaba biyandikishije, abazatsinda bakazatangazwa mu Ukwakira 2019.

Ati “Ni amarushanwa y’ishoramari agenewe gusa abagore bafite ibigo by’ishoramari bo muri Afurika y’Uburasirazuba. Urubuga rwo kwiyandikishirizaho rurafungurwa mu gihe gito.”

Yavuze ko ibisabwa kugira ngo abo bagore bafite ishoramari rikomeye bitabire ayo marushanwa harimo kuba nibura bafite ibigo byabo cyangwa ibyo bafitemo imigabane iri hejuru ya 50%.

Hari kandi kuba umugore wifuza kuryitabira amaze nibura imyaka itatu akora ishoramari cyangwa ubucuruzi, akoresha nibura abakozi batanu kandi afite umutungo nibura w’ibihugmbi 50$ (asaga miliyoni 45Frw).

Lévesque ati “Turabizi ko atari buri mugore uri mu ishoramari muri Afurika y’Uburasirazuba wakuzuza ibyo bisabwa kano kanya ariko twizeye ko mu myaka ibiri cyangwa itatu bazaba bakomeje gutera imbere bakaba bagaruka ariko hari n’ababyujuje twifuza gukorana kugira ngo bagereku ntego zabo.”

Lévesque yavuze ko bifuza ko muri buri gihugu hazatsindamo 20 bakora ishoramari mu mishinga itandukanye.

Mu bihembo bazahabwa harimo inama zafasha kugira ngo ishoramari ryabo rirusheho gutera imbere nk’uburyo bwo kongera abakiliya n’ibicuruzwa, imicungore y’umutungo, amafaranga n’ibindi bikenerwa mu ishoramari.

Ati “Ikirenze kuri ibyo turashaka ko hazabaho n’igihembo cy’amafaranga kuri buri cyiciro bitewe n’ingaruka gifite mu kongerera ubushobozi abagore, mu kurengera ibidukikije, guhanga imirimo ku rubyiruko no kubongerera ubumenyi, urabizi ni ikintu cy’ingenzi n’ishoramari ryihariye udushya.”

Lévesque yakomeje agira ati “Kugeza ubu nta ngano y’amafaranga tuzabaha aramenyekana kuko tutarabona ibyo bazanye mu marushanwa, nitumara kubibona nibwo tuzaganira tukareba icyo bakeneye.”

Yasobanuye ko ku rwego mpuzamahanga ishoramari ry’abagore rifite icyuho cya miliyari zisaga 300$. Bisobanuye ko abagore barindwi mu 10 babura amafaranga yo gushora mu ishoramari bityo bakeneye guterwa inkunga.

Icyo cyuho ngo ni ikibazo kuko nabo bongerewe ubushobozi byabafasha byabafasha kwiteza imbere, guteza imbere imiryango yabo n’ibihugu n’Isi muri rusange.

Ubwo iri rushanwa ryagungurwa muri Kenya, Grace Machel wanashinze ikigo Graça Machel Trust, Umuyobozi mukuru wungirije w’umuryango uharanira uburenganzira bw’abana n’abashesha akanguhe akaba yaranayoboye Minisiteri y’Uburezi muri Mozambique, yavuze ko kongerera ubushobozi umugore bifasha mu iterambere ry’umuryango wose.

Yavuze ko ubushakashatsi yakoze afatanyije n’ibiro bya Minisitiri w’Intebe mu Bwongereza mu 2015 bwagaragaje ko mu bigo by’abikorera, abagore bari muri komite nyobozi n’indi myanya ifatirwamo ibyemezo ari 24%.

Yasobanuye ko 11% by’abo bagore byagaragaye ko biyongereyeho muri uwo mwaka ariko hakiri byinshi byo gukora mu kuziba icyuho hagati y’abagabo n’abagore bari muri iyo myanya.

Ubwo iri rushanwa ryamurikwaga i Kigali
Lévesque (Hagati) yavuze ko bifuza ko muri buri gihugu hazatsindamo 20 bakora ishoramari mu mishinga itandukanye
Umwe mu bitabiriye atanga igitekerezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza