Kwamamaza

Abagikoresha imashini za ‘Metode Burugumesitiri’ babayeho bate?

Yanditswe kuya 19-09-2016 saa 17:42' na Thamimu Hakizimana


Mu gihe u Rwanda rukataje mu gukoresha ikoranabuhanga, aho ibyakorwaga n’abantu benshi bisigaye bikorwa na za mudasobwa, mu Mujyi wa Kigali haracyagaragara abagikoresha imashini za kera zifashishwa mu kwandika benshi bakunda kwita ’metode burugumesitiri’.

Iyo ugenda mu bice bitandukanye by’Umujyi wa Kigali rwagati no muri Gare ya Nyabugogo, uhasanga abantu bagikoresha izo mashini, bavuga ko bazandikisha ku mafaranga make cyane ugereranyije n’atangwa ku bandikisha mudasobwa.

N’ubwo izo mashini (metode burugumesiti) hari abazifata nk’izitagifite agaciro bitewe no kuba ikoranabuhanga ryo kwandikisha mudasobwa rimaze gukataza, abazikoresha bavuga ko ari umwuga ubatunze neza kandi ufitiye benshi akamaro, baba abo mu miryango yabo ndetse n’abantu batandukanye baza kubasaba servisi yo kubandikira inyandiko zinyuranye.

Nimukuze Marie Gorette w’imyaka 40 wandikisha iyi mashini muri Gare ya Nyabugogo yabwiye IGIHE ko izo mashini zibatunze, gusa ngo ntibakibona amafaranga nk’ayo babonaga ubwo ikoranabuhanga ryari ritatera imbere.

Yagize ati “ Ibyo byo izi mashini ziradutunze kandi neza, kuko nka njye iyo nkoresha ni yo imfasha kubona amafaranga y’inzu mbamo, ay’ishuri na mitiweli z’abana, uretse ko nyine tutakibona amafaranga menshi nka mbere y’uko ikoranabuhanga ryo gukoresha za mudasobwa risakara mu gihugu hose.”

Karonda Ahmed w’imyaka 60 ukoresha imashini ( metode burugumesitiri) mu mujyi wa Kigali mu gikari cyo hafi yo kwa Rubangura yagize ati “ Ubu njye n’iyo ntahanye 1,000 biba ari amahirwe cyane kuko akazi kamaze kwangirika kubera ikoranabuhanga kuko abantu benshi iyo bakeneye serivise zo kwandikirwa bajya ahari za mudasobwa.”

Yakomeje agaragaza ko akazi ko gukoresha izo mashini katakirimo amafaranga nyuma y’aho hari n’abataha badakoreye n’amafaranga 300 mu gihe mbere ya Jenoside hari n’ubwo batahanaga arenze ibihumbi 10.

Baracyakorera mu kajagari

Bamwe bandikisha izo imashini zacyuye igihe, bemeza ko n’ubwo uyu mwuga utunze abatari bake, bahangayikishijwe n’ubuzima bwabo bw’ejo hazaza cyane ko na bo bari mu bagikorera mu kajagari, mu gihe imikorere nk’iyo itemewe mu Rwanda.

Umwe utarashatse ko izina rye ritangazwa ukorera mu mujyi rwagati yagize ati “ None se nawe ntubibona koko? Nta hantu ho gukorera byibuze twese nk’abandikisha izi mashini za kera ahubwo buri muntu usanga afite ahantu nko ku muhanda cyangwa imbere y’amaduka runaka akorera kugira ngo abone icyamutunga.”

Yakomeje avuga ko n’ubwo izi mashini zisa nk’aho zitagifite agaciro abazikoresha bifuza ko ubuyobozi bwabafasha bukabashakira ahantu hamwe na bo bakorera nk’uko bwafashije abacururizaga mu kajagari, kugira ngo nabo bakomeze gushakisha imibereho nk’abandi.”

Batinya kwibumbira mu makoperative

Nimukuze Maria Gorette yagize ati “ Si uko twangwa kwibumbira mu makoperative ahubwo usanga twese tutabitekereza kubera ko tuba tuzi ko umunsi n’umunsi umwuga wacu uzahagarikwa kubera ko abanyarwanda twese duhora dushishikarizwa gukoresha ikoranabuhanga.”

Gusa benshi mu bakoresha izi mashini bemeza ko baramutse bahawe mudasobwa batangira kuzikoresha kugira ngo nabo bakomeze kwiteza imbere cyane ko izi mashini za metode burugumesitiri bakoresha hari byinshi mudasobwa zifite zo zitagira birimo nko kubika ibyo zanditse n’ibindi.

Gusa nubwo aba bifuza ko Leta yabaha mudasobwa zigezweho, ikunze gusaba abashaka inkunga kubanza kwibumbira mu makoperative kugira ngo ifashe abantu bazwi kandi banakorera ahazwi neza.

Mu Rwanda gukoresha ikoranabuhanga byateye imbere kuko kuri ubu umwana w’umunyarwanda wiga mu mashuri abanza aba azi gukoresha mudasobwa, biciye muri gahunda ya Leta ya One Laptop per child yatangijwe mu Rwanda mu 2008, ikaba imaze kugezwa mu bigo by’amashuri 400.

Guha intebe ikoranabuhanga byatumye u Rwanda ruza mu myanya ya mbere ku isi hazamurwa imibereho myiza n’ubukungu bwarwo nkuko byagaragajwe mu cyegeranyo cyasohowe n’Ihuriro Mpuzamahanga ry’Ubukungu (World Economic Forum) cyerekana uko ikoranabuhanga ryitabirwa gukoreshwa hirya no hino ku isi (The Global Information Technology Report) muri 2015.

Karonda Ahmed avuga ko nta mafaranga menshi bakibona kuva aho mudasobwa zigereye mu Rwanda
Abakora akazi ko kwandikisha izi mashini basaba ko baterwa inkunga
Nimukuze avuga ko nubwo amafaranga ari make ngo gukoresha iyi mashini hari icyo bimufasha
Izi mashini ngo ntizigira uburyo bwo kubika ibyo zanditse nka Mudasobwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved