Kwamamaza

Abagifite ingengabitekerezo ya Jenoside batangatanzwe

Yanditswe kuya 27-10-2016 saa 16:32' na Ntakirutimana Deus


Komisiyo y’Igihugu y’Ubumwe n’Ubwiyunge iratangaza ko yahagurukiye ikibazo cy’ingengabitekerezo y’amacakubiri na Jenoside bikirangwa mu banyarwanda benshi cyane cyane abakuze.

Igipimo cy’Ubwiyunge mu Rwanda (RRB 2015) kigaragaza ko hakiri Abanyarwanda bagera kuri 25,8% bagifite ingengabitekerezo y’amacakubiri na Jenoside.

Iyo mibare ngo ni myinshi nk’uko byagarutsweho n’Abasenateri, mu Nteko rusange yabo yabaye ku wa Kane tariki ya 27 Ukwakira 2016, ubwo bagezwagaho na Komisiyo y’Igihugu y’Ubumwe n’Ubwiyunge, raporo y’ibyakozwe mu mwaka ushize n’iy’uw’ingengo y’imari wa 2016/2017.

Senateri Ntawukuriryayo Jean Damascène yavuze ko abona ikibazo cy’ibipimo bidahinduka guhera muri 2010, ku bijyanye n’abibona bakanabonera abandi mu ndorerwamo y’amoko, ndetse n’abafite ingengabitekerezo y’amacakubiri na Jenoside.

Raporo y’iyo kimisiyo igaragaza ko Abanyarwanda bagera kuri 27.9%, bacyirebera ndetse bakanarebera abandi mu ndorerwamo z’amoko.

Senateri Musabeyezu yagarutse ku kibazo cy’ingengabitekerezo ya Jenoside ikigaraga mu bakuze, atanga inama ko urubyiruko rwakwifashishwa mu bikorwa by’ubumwe n’ubwiyunge bifasha mu guhindura sosiyete.

Perezida wa Komisiyo y’Igihugu y’Ubumwe n’Ubwiyunge, Musenyeri Rucyahana John yavuze ko ikibazo cy’ingengabitekerezo irangwa mu bakuru cyahagurukiwe.

Mu ngamba zo kukirwanya ngo harimo kwibanda mu kwigisha urubyiruko nk’uko babigaragaje muri gahunda igenga ibikorwa byabo by’uyu mwaka.

Yagize ati “Tugiye gukurikirana uko inzego za leta n’abikorera bashyira mu bikorwa politiki y’ubumwe n’ubwiyunge. Tugiye gukurikirana abafatanyabikorwa kugira ngo bubake mu ngamba zabo uko bazajya bashyira mu bikorwa gahunda z’ubumwe n’ubwiyunge baduhe raporo. Tugiye kongera imikurikiranire y’ishyirwa mu bikorwa rya gahunda z’ubumwe n’ubwiyunge muri izo nzego no kongera abafatanyabikorwa.”

Ku kibazo cy’abakuze bakirangwaho ingengabitekerezo ya Jenoside, ku buryo bamwe bayicengeza no mu bana bakayigaragaza mu ruhame, Musenyeri Rucyahana yavuze ko ari ikibazo kibashishikaje.

Ati “Muri gahunda twabateganirije ibiganirompaka tugiye gukora mu nzego zose mu bantu bakuru n’abana bato. Twabateganyirije kuvurwa n’abana babo, kuko tugiye kujya twigisha abana kuganira n’ababyeyi babo no kugerageza kubakosora, abo basaza rero twabaturutse impande zose; twabatangatanze.”

Abasenateri ndetse na Komisiyo y’Ubumwe n’Ubwiyunge bishimiye intambwe imaze guterwa mu bumwe n’ubwiyunge muri rusange.

Igipimo cy’Ubumwe n’Ubwiyunge cyerakana ko bugeze kuri 92.5 mu gihe muri 2010 bwari ku kigero cya 82.3%.

Ubushakashatsi bugaragaza zimwe muri gahunda zatumye igipimo cy’ubwiyunge 2015 kizamuka, zirimo ibikorwa byo Kwibuka ku kigero cya (92.2%, Ndi Umunyarwanda (90.1%), Itorero ry’Igihugu 90%), Umuganda (90.8%), Amatsinda y’Ubumwe n’Ubwiyunge (89,9%), Ibirango by’Igihugu (88,9%), Amashyirahamwe n’amakoperative (88,6%), Girinka Munyarwanda (87,5%), Gusubiza mu buzima busanzwe abavuye ku rugerero (87%), guhuza ingabo zahoze zihanganye (85,4%), n’Inama y’Umushyikirano (85%).

Perezida wa Sena aganira n'abayobozi muri Komisiyo y'Ubumwe n'Ubwiyunge
Perezida wa Komisiyo y'Ubumwe n'Ubwiyunge, Musenyeri John Rucyahana
Abasenateri ubwo bagezwagaho na Komisiyo y’Igihugu y’Ubumwe n’Ubwiyunge, raporo y’ibyakozwe mu mwaka ushize

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved