Abagera kuri 767 bafatiwe mu bwambuzi bushukana bamburiyemo abantu miliyoni 15 Frw

Yanditswe na IGIHE
Kuya 19 Ugushyingo 2019 saa 10:19
Yasuwe :
0 0

Hashize iminsi hirya no hino mu gihugu humvikana abantu bihererana abandi bakabambura amafaranga babizeza akazi, kuzabajyana mu mahugurwa mu mahanga no kubabonerayo akazi, abandi bagahamagarwa babwirwa ko batsindiye amafaranga n’ibindi bihembo.

Mu 2019 gusa abantu bagera kuri 767 bamaze gufatirwa mu byaha by’ubwambuzi bushukana, bakaba barambuye abantu amafaranga abarirwa muri miliyoni 15 Frw.

Polisi y’u Rwanda ku bufatanye n’izindi nzego z’umutekano zahagurukiye kurwanya ubwambuzi bushukana.

Muri Nyakanga 2019, Uwamahoro Claudine (izina ryahinduwe) yitabye telefoni ahamagawe n’umuntu atazi wamubwiye ko yitwa Bizimana Innocent, amubwira ko ari mu bantu batoranyijwe kuzitabira inama ihuza urubyiruko rwihangiye imirimo yagombaga kubera muri Qatar.

Bizimana yabwiraga Uwamahoro ko akora muri Minisiteri y’Ubucuruzi mu Ishami rishinzwe ubucuruzi mpuzamahanga.

Yamubwiraga ko iyi minisiteri yateguye inama ku bufatanye n’Ishami ry’Umuryango w’Abibumbye ritsura Amajyambere (UNDP).

Uwamahoro yabwiye Bizimana ko adafite urwandiko rw’inzira rumwemerera kujya mu mahanga ariko uyu amubwira ko atagomba kubigiraho ikibazo kuko mu Kigo gishinzwe Abinjira n’Abasohoka hari umuntu witwa Besigye Fred ushinzwe korohereza abantu batoranyijwe kuzitabira iyo nama.

Uwamahoro yahise abwira Bizimana ko adafite amafaranga yo kwitegura kujya muri iyo nama harimo n’ayo kwishyura urwandiko rw’inzira. Yabwiwe ko ibijyanye n’amafaranga y’urugendo n’ibyangombwa byo kujya mu mahanga ari ibibazo bizakemurwa n’abateguye inama.

Mu buhamya bwa Uwamahoro akomeza avuga ko uyu Bizimana wiyitaga umukozi wa minisiteri yageze aho akamusaba koherereza Besigye Fred ibihumbi 30 Frw, andi asigaye akazatangwa n’abateguye inama.

Uwamahoro avuga ko yaje kugira amakenga agakurikirana ashaka kumenya Bizimana, abaza mu bantu bari bamubwiye ko bari gutegura inama , bamubwira ko batamuzi ndetse ko n’iyo nama ntayo bazi.

Yihutiye kubimenyesha inzego z’umutekano nazo zihita zitabara, abantu babiri barimo Nkurunziza Hammed na Birikunzira Salomon bahise batabwa muri yombi, bafatirwa mu Mujyi wa Kigali ku wa 1 no ku wa 3 Kanama 2019.

Iperereza ryaje kugaragaza ko batangiye ibikorwa by’ubwambuzi bushukana mu 2014 aho bagendaga bakoresha imyirondoro itariyo.

Nkurunziza abantu yashukaga yababwiraga ko yitwa Nsengiyumva Sam, ubundi akiyita Evode, hakaba ubwo yiyita Padiri Noel cyangwa akababwira ko yitwa Bizimana Innocent nk’uko yari yabibwiye Uwamahoro .

Birikunzira we yakoreshaga amazina nka Matabaro James na Nshimiyimana Jean Bosco. N’ubwo Uwamahoro yashoboye guhita atanga amakuru bigatuma atamburwa, iperereza rigaragaza ko hari abandi bantu bagera kuri 15 bashutswe na bariya bagabo bakabambura amafaranga abarirwa muri miliyoni 1.5 Frw.

Iperereza rigaragaza ko kuva muri Gashyantare 2016, Birikunzira yigeze gufatwa arafungwa azira icyaha cy’ubwambuzi bushukana, yafunguwe muri Nzeri 2018.

Nkurunziza na we yari yarigeze kumara amezi 18 muri Gereza ya Mageragere azira ibyaha by’ubwambuzi bushukana.

Umuvugizi wa Polisi y’u Rwanda, CP John Bosco Kabera, yavuze ko aba bajura bakoresha amayeri atandukanye kugira ngo bagere ku mugambi wabo.

Yagize ati “Uyu Bizimana na Nkurunziza birirwaga bazenguruka hirya no hino mu bitaro bashakisha ibyangombwa by’abantu byatakaye nk’indangamuntu biba bihari birangishwa cyangwa bagashakisha imyirondoro y’abantu bitabye Imana bakaba ariyo bifashisha bahamagara imiryango n’inshuti z’abo bantu.”

Yakomeje avuga ko aba bagabo bakundaga kujya mu nzu zicuruza serivisi za murandasi (internet Café) bakareba abantu bibagiwe gufunga email zabo cyangwa se abasize bafunguye amadosiye yabo ariho imyirondoro yabo.

Ati “Hari n’abahamagara abantu bakababwira ko batsindiye amafaranga runaka muri tombora y’ibigo by’itumanaho ariko kugira ngo bazayabone cyangwa bahabwe ibihembo batsindiye bakababwira ko bagomba gutanga amafaranga.”

Imibare itangwa n’Urwego rw’Igihugu rw’Ubugenzacyaha (RIB) igaragaza ko kuva umwaka wa 2019 watangira bakiriye ibirego bigera kuri 446 bijyanye n’ubwambuzi bushukana, abantu 767 bafatiwe muri ibyo byaha.

Raporo kandi igaragaza ko muri icyo gihe cyose aba bajura bamaze kwambura abantu amafaranga y’u Rwanda abarirwa muri miliyoni 15.

Umuvugizi wa RIB, Umuhoza Marie Michelle, yavuze ko ibirego byinshi biba bijyanye n’abantu bavuga ko bashutswe ko batoranyijwe kujya mu mahugurwa mu mahanga cyangwa bagahamagarwa babwirwa ko batsindiye ibihembo.

Yagize ati “Hari abazana ibirego bijyanye no kuba barashyize amafaranga yabo mu bigo bikoresha amafaranga mu buryo bwa murandasi (crypto-currency scams; conmen), aho bababwira ko bazabungukira inshuro nyinshi z’ayo bazanye. Hari abakoresha inyandiko mpimbano biyita abayobozi mu bigo bikomeye bagashuka abantu ngo bajye bazana ibikoresho muri ibyo bigo babahe amafaranga cyane cyane baba babasaba kuzana iby’ikoranabuhanga, ibyuma by’imodoka n’ibindi.”
Yakomeje avuga ko hari n’abagendana ibipapuro bakase neza bakomekaho amadolari ya Amerika wabibona ukagira ngo ni mazima, bakagushuka ngo bagiye kukuvunjira ahubwo bakaguhangika.

CP John Bosco Kabera yasabye Abanyarwada kuba maso bakwirinda umuntu wese ubashuka abizeza ibitangaza.

Yagize ati “Abantu bagomba kumenya ko ibyo tuvuga ari ukuri, ubwambuzi bushukana buriho cyane, barimo kwihuriza mu matsinda atandukanye bagakoresha amayeri menshi yo kwambura abantu. Nihagira uguhamagara akubwira ko watsindiye ibihembo runaka ntukamwemerere.”

Yakomeje ashishikariza Abanyarwanda gukenga no kwihutira gutanga amakuru hakiri kare ku nzego z’umutekano igihe hari umuntu baketseho kuba ari mu bikorwa bw’ubwambuzi bushukana. Ushobora kwifashisha nimero ya 112 (iza Polisi y’u Rwanda), 166 (RIB) cyangwa ugahamagara kuri 0788311152, 0788311829.

Itegeko nº68/2018 ryo ku wa 30/08/2018 riteganya ibyaha n’ibihano muri rusange mu ngingo yaryo ya 174 ivuga ko umuntu wese wihesha umutungo w’undi, imari ye yose cyangwa igice cyayo mu buryo bw’uburiganya yiyitiriye izina ritari ryo cyangwa umurimo adafitiye ububasha cyangwa akizeza icyiza cyangwa agatinyisha ko hari ikibi kizaba, aba akoze icyaha. Iyo abihamijwe n’urukiko, ahanishwa igifungo kitari munsi y’imyaka ibiri ariko kitarenze imyaka itatu n’ihazabu y’amafaranga y’u Rwanda atari munsi ya miliyoni eshatu ariko atarenze miliyoni eshanu.

Iyo icyo cyaha gikozwe n’umuntu kugira ngo atange impapuro z’inyemezamigabane, z’inyemezamyenda, inyandiko zigereranywa n’amafaranga, imigabane cyangwa indi nyandiko yose ifite agaciro k’ifaranga ari ibya sosiyete y’ubucuruzi, iby’ikigo gicuruza cyangwa iby’uruganda, igihano kiba igifungo kitari munsi y’imyaka itatu ariko kitarenze imyaka itanu n’ihazabu y’amafaranga y’u Rwanda arenze miliyoni eshanu ariko atarenze miliyoni zirindwi.

Inzego z’umutekano zahagurukiye ubwambuzi bushukana, abagera kuri 767 babufatiwemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza