Kwamamaza

Abaganga bo mu bitaro bya Ruhengeri bategetswe kwambara ikoti na karuvati

Yanditswe kuya 11-11-2016 saa 14:02' na Emma-Marie Umurerwa


Ubuyobozi w’Ibitaro bya Ruhengeri bwasabye abakora mu buyobozi hamwe n’abaganga kujya bambara ikoti na karuvati, kuva ku wa Mbere kugeza ku wa Kane.

Itangazo ryashyizweho umukono na Dr Ayingeneye Violette, umuyobozi w’Ibitaro bikuru bya Ruhengeri rigira riti “Ubuyobozi bw’Ibitaro bya Ruhengeri burasaba ‘administration staff’ na ‘medical staff’ ko bagomba kwambara ikote na karuvati, guhera ku wa Mbere kugeza ku wa Kane, hanyuma ku wa Gatanu ni ukwambara T.shirt.”

Iri tangazo rikomeza rivuga ko hari imyenda imwe n’imwe itemewe mu kazi ku bakozi b’ibi bitaro, irimo amapantalo y’amakoboyi.

Nyuma y’aho iri tangazo rigaragaye ku mbuga nkoranyambaga zirimo whatsapp ku mugorobwa wo ku itariki ya 9 Ugushyingo, abantu batandukanye batangiye kuritangaho ibitekerezo.

Hari uwagize ati “Uyu muyobozi arashaka kwigaragaza nk’uwahanze agashya. Umuganga azambara ikote agerekeho itaburiya cyangwa azabanza itaburiya, arenzeho ikote na karuvati? Hanyuma se abaganga b’igitsinagore bazajya bambara imikenyero cyangwa bo ibi ntibibareba?”

Undi ati “Administration staff (abakora mu buyobozi) bo birumvikana, ariko nta muganga wambaye ikote na karuvati n’itaburiya, ubwo se yahumeka? Yabasha kuvura umurwayi se?”

“Iyo myambaro babasabye kwambara niba ari iyo ibitaro byabaguriye ndabishyigikiye, bayambare kuko amategeko arusha amabuye kuremera, kandi uwambaye neza agaragara neza.”

Bamwe mu baganga bakora mu bitaro bitandukanye by’Igihugu, batangarije IGIHE ko bafite impungenge z’icyi cyemezo.

Umwe yagize ati “Mu byukuri biragoye kuvuga ngo umuganga azajya gusuzuma abarwayi yambaye ikote na karuvati, ni ibintu bidashoboka. Umwambaro w’umuganga urazwi kandi twese turawambara, ibindi bikwiye kwiganwa ubushishozi mbere y’uko bigira ingaruka mu kazi.”

"Si Minisante yabimutumye"

Umuvugizi wa Minisiteri y’Ubuzima, Kayumba Malick yatangarije IGIHE ko atari Minisante, yatumye uyu muyobozi gufata iki cyemezo.

Yagize ati “Nanjye iryo tangazo naribonye nk’uko na we waribonye, si Minisante yamutumye. Nahise mpamagara Dr Violette, ambwira ko ari icyemezo cyafashwe biturutse ku bwumvikane bw’abakozi.”

Kayumba yakomeje avuga ko amabwiriza ya Minisante hari umwambaro ategeka abaganga.

Ati “Umwambaro w’abaganga ubusanzwe ni itaburiya y’umweru ni byo biri mu mabwiriza. Iyo urebye abakozi bo mu buyobozi ni bo bambara uko bishakiye.”

Akomeza avuga ko abakozi bakora kwa muganga bazi ko bagomba kwitwararika isuku yo ku mubiri, imyambaro ndetse n’aho bakorera, kandi bakambara amakarita y’akazi ariho amazina yabo ndetse n’amafoto yabo, mu rwego rwo kurushaho guha serivisi nziza ababagana.

Umuyobozi w’Ibitaro bya Ruhengeri Dr Ayingeneye Violette,yavuze ko abakozi ubwabo ari bo babyihitiyemo hagamijwe ko bagaragara neza mu maso y’abo bakira ngo babibonemo , bikaba biri mu mabwiriza agenga imyambarire n’indi myitwarire ya buri wese muri ibi bitaro, yemejwe mu 2014.

Yavuze ko muri ayo mabwiriza buri cyiciro cy’abakozi baba abaganga, abaforomo, ababyaza n’abafasha babo, abakora mu buyobozi n’abandi bahisemo uko bazajya bambara, bitangira gushyirwa mu bikorwa mu 2015.

“ Tumaze gukora inama n’abakozi rusange bagaragaje ko abayobozi batubahiriza amabwiriza y’imyamabarire nk’uko yemejwe. Hari bamwe bamabaraga mu buryo budakwiye …nk’ikabutura, abandi bakambara nk’abagiye ku mazi kandi baje mu kazi.”

“Abayobozi n’abaganga bagomba kwambara karuvati n’ikote, barimbye nk’uko abakozi bo muri banki bambara, kuva ku wa Mbere kugeza ku wa Kane. Ku wa Gatanu kuko ari umunsi wa Siporo, ashobora kuza yambaye umupira.”

Dr Ayingeneye yanavuze ko uwaje yambaye ikoti aba afite aho arimanika, akambara itaburiya, yarangiza akazi akongera kuyambara nk’uko bisanzwe kandi ko atari umwihariko w’ibi bitaro gusa ahubwo ngo n’ahandi birakorwa.

Umuyobozi w'Ibitaro bya Ruhengeri, Ayingeneye Violette

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved