Abaganga b’inzobere mu buvuzi bwihuse baracyari mbarwa mu Rwanda

Yanditswe na Ishimwe Israel
Kuya 26 Kanama 2016 saa 09:10
Yasuwe : XX
0

Ibitaro bikuru bya Kaminuza bya Kigali, CHUK nibyo byonyine bifite inzobere 14 zize iby’ubuvuzi bwihuse ku rwego rwa kaminuza, umubare ukiri muto cyane ugereranyije n’abakenera serivisi z’ubuvuzi bwo ku rwego rwo hejuru.

Ku nshuro ya mbere mu Rwanda hateraniye inama ihuje abantu baturutse mu bihugu bitandukanye ku isi bigera kuri 12 yateguwe n’Ihuriro Nyarwanda ry’Abaganga bakora ubuvuzi bwihuse RECA (Rwanda Emergency Care Association) rigizwe n’abaforomo, abatera ikinya, abaganga n’izindi nzego zitandukanye kugira ngo bigire hamwe uburyo ubumenyi n’amahugurwa byakomeza gutangwa ngo umubare w’inzobere zikora ubuvuzi wiyongere.

Umunyamabanga mukuru wa RECA, Dr Umuhire Olivier Felix yatangarije IGIHE ko impamvu z’iyi inama ari ugukora ubukangurambaga ku nzego zose bireba kugira ngo umubare w’inzobere mu buvuzi bwihuse wiyongere kuko ubu abitwa inzobere bahari bataranarangiza kwiga icyiciro cya Gatatu cya Kaminuza.

Ati “Inzobere n’abafite ubumenyi mu buvuzi bwihuse baracyari bake cyane, nko muri CHUK hari 14 bakirimo kubyiga mu cyiciro cya gatatu cya kaminuza (masters) kandi natwe ntabwo turarangiza kubyiga icyakora hari n’abandi barindwi bagiye gutangira aya masomo. Ni ukuvuga ko ku bindi bitaro nk’iby’uturere n’intara haba hari abantu babikoramo ariko badafite ubwo bumenyi ahubwo barize kuvura bisanzwe kandi uko bukeye n’uko bwije ubuvuzi bugenda butera imbere.”

Dr Umuhire yakomeje avuga iterambere ry’igihugu rigomba kugendana n’ubuvuzi bugezweho ndetse n’inzobere zikiyongera.

Ati “Iyo hatabayeho gutanga ubuvuzi bwihuse hari abo bihitana, abandi bakabikurizamo ubumuga kandi iyo abo yitabaje ku ikubitiro haba kwa muganga no hanze yaho bagombaga kuba bamufashije.”

Ku ruhande rwa Minisiteri y’Ubuzima, Umuyobozi ushinzwe iby’ubuvuzi, Dr Théophile Dushime na we yemeza ko umubare w’abaganga b’inzobere ukiri muto gusa ngo kubaka urwego rw’ubuzima ni urugendo kandi ukurikije aho u Rwanda rwavuye hari icyizere ko bizagerwaho.

Ati “U Rwanda rugenda rwiyubaka nubwo tutavuga ngo kugira abaforomo n’abandi benshi bafite ubumenyi mu buvuzi bwihuse bizagerwaho mu gihe gito ariko hazagenda habaho amahugurwa y’igihe gito ndetse n’amasomo atangwa ku rwego rwa kaminuza ku buryo bizagerwaho.”

Dr Dushime yavuze ko uko ubumenyi buzagenda butangwa ariko umubare uziyongera bityo haba ku bigo nderabuzima, ku bitaro n’ahandi abantu bakabona ubuvuzi bwihuse mu maguru mashya.

Ubusanzwe aho bita mu byumba byakirirwamo indembe mu bitaro haba harimo abaganga n’abaforomo basanzwe batize by’umwihariko ibijyanye n’ubuvuzi bwihuse.

Ihuriro ry’Abakora ubuvuzi bwihuse ryatangiye muri 2014 ubwo habagaho inama mpuzamahanga ihuza abakora ubuvuzi bwihuse yabereye muri Ethiopia.

Ngo nubwo nta bushakashatsi bwakozwe n’Ihuriro RECA, bivugwa ko hari abatakaza ubuzima bageze mu maboko y’abakagombye kubatabara ariko kuko nta bumenyi babifitemo ubuzima bukabacika cyangwa bakabivanamo ubumuga.

Umubare w'abafite ubumenyi mu buvuzi bwihuse uracyari mucye mu Rwanda
Dr Théophile Dushime ushinzwe ubuvuzi muri Minisiteri y'Ubuzima

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza