Abagabo banenzwe kwihunza imirimo yo mu rugo, igaharirwa abagore gusa

Yanditswe na Mukahirwa Diane
Kuya 31 Mutarama 2021 saa 09:10
Yasuwe :
0 0

Bitewe n’impamvu zirimo umuco, usanga abagore mu Rwanda ari bo bakora imirimo yo mu rugo myinshi, irimo nko guteka, kurera abana, guhinga, gukora amasuku yo mu rugo n’indi mirimo nk’iyo kandi akenshi ugasanga barayikora batayishyurirwa.

Ikibabaje kurushaho, ni uko iyo mirimo ikorwa n’abagore idahabwa agaciro n’abagabo babo, rimwe na rimwe babashinja kudatanga umusaruro wenda kuko batagira akazi gahembera ku kwezi cyangwa ngo bikorere, nyamara wabara agaciro k’imirimo baba bakoze aho mu rugo, ugasanga ari kenshi.

N’iyo umugabo n’umugore bose bafite akazi, usanga mu gihe bagereye mu rugo rimwe, umugabo anyarukira kuri televiziyo agaterera akajisho ku byiriwe hirya no hino mu gihe umugore we anyarukira mu gikoni, akareba iby’imitekere uko bihagaze, uko abana biriwe, ibibura mu rugo, isuku iri mu gikoni, hanyuma agahindura akajya kugaburira wa mugabo amaze no gukoresha abana umukoro wo mu rugo.

Mu bushakashatsi bwakozwe n’Umuryango urwanya ubukene n’akarengane, ActionAid, bwagaragaje ko abagore bamara nibura amasaha ane ku munsi bakora imirimo yo mu rugo kandi batayishyurwa, bigatuma bagira umwanya muto cyane wo gukora indi mirimo ishobora kubyara inyungu, cyangwa se yabagirira akamaro mu buzima bwabo busanzwe nko gusoma ibitabo n’ibindi nk’ibyo.

Umukangurambaga mu kurwanya ihohoterwa wo mu murenge wa Gitesi, Nyirahabiyambere Esperance, yavuze ko usanga abagabo badaha agaciro imirimo yakozwe n’abagore, ndetse bakabavunisha kandi nyamara bishoboka cyane ko aba bombi bafatanya iyo mirimo, igakorwa vuba ndetse bose bakagira umwanya wo gukora ibindi bikorwa bishobora gutanga umusaruro.

Yagize ati “Usanga abagabo babona ko iyi mirimo dukora ari ntacyo twakoze kandi mu by’ukuri turavunika. Bakwiye guha agaciro imirimo dukora, agaciro mvuga si ukwishyurwa amafaranga ahubwo ni ubufatanye.”

Yongeyeho ko ibi binarushaho guteza imbere umuryango wose muri rusange, ati “Buriya urugo rufatanya muri byose rutera imbere kuko umugore akora iki n’umugabo agakora kiriya bikaba byatuma mutera imbere. Umugabo nafasha umugore we muri iriya mirimo bizatuma abona n’umwanya wo gukora ibindi byamuteza imbere.”

Nyinawumuntu Julienne utuye muri Gasabo, yavuze ko ibikorwa nk’ibi bikwiye gucika burundu, kuko igihe kigeze ngo abagabo bareka kwirengagiza inshingano zo mu rugo niba koko bifuza iterambere ry’umuryango.

Ati “Ikintu kiriho usanga abagabo birengagiza iyi mirimo dukora yo mu rugo itishyurwa ariko turavunika, igihe ni iki ngo abagabo bareke kwirengagiza iyi mirimo bave muri televiziyo baze dufatanye niba koko bashaka iterambere bareke dukorere hamwe.”

Umukozi muri Minisiteri y’Uburinganire n’Iterambere ry’Umuryango mu Ishami ryo guteza imbere abagore mu bijyanye n’ubukungu, Mukantaganda Sarah, yavuze ko uretse kuba imirimo ikorwa n’abagore idahabwa agiciro kandi inabavunisha, ariko iyo urebye neza usanga ari ihohoterwa rikorerwa abagore kandi bikadindiza umuryango muri rusange.

Ati “Aba bagore bakora iyi mirimo akenshi baba bumva ko ntacyo bamaze mu mitwe yabo, bakumva ko ntacyo bakora n’abagabo babo bakababwira ko ntacyo bakora, iryo ubwaryo ni ihohoterwa.”

Yongeyeho ko gukorera hamwe bifasha mu iterambere ry’umuryango muri rusange, ati “Usibye iryo hohoterwa rero kandi kudafatanya iyi mirimo bituma umuryango utazamuka ngo utere imbere bitewe n’uko nta bufatanye buba bwabayeho mu rugo. Abagabo bakwiye kumva ko nabo iyi mirimo ibareba.”

Yakomeje avuga ko hakwiye ubufatanye bw’inzego zitandukanye mu gukora ubukangurambaga bugamije kwerekana ko abakora iyi mirimo yo mu ngo itishyurwa bakwiye kubihererwa agaciro.

Ati “Dufatanyije twese n’izindi nzego n’abafatanyabikorwa batandukanye mu kumvisha cyane umuryango nyarwanda ko iriya mirimo ifite agaciro, iki kibazo kizakemuka.”

Umuco w’uko umugabo atakora imirimo yo mu rugo ugaragara cyane mu bihugu bya Afurika n’u Rwanda rurimo ariko mu bihugu bimaze gutera imbere, usanga imico nk’iyo itahaba kuko abagabo n’abagore bafatanyiriza hamwe kuzamura umuryango.

Abagabo basabwe gufatanya n'abagore babo imirimo yo mu rugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .