Abagabo barakataje mu gukumira imirire mibi n’igwingira ry’abana

Yanditswe na Evariste Nsengimana
Kuya 3 Nyakanga 2019 saa 08:46
Yasuwe :
0 0

Abakurikiranira hafi iby’uburinganire n’iterambere ry’umuryango, bagaragaza ko ridashobora kugerwaho mu gihe umwe mu bawugize aharirwa inshingano runaka ahubwo ko ubufatanye ari ryo pfundo ryo kubigeraho byihuse.

Umugore yakunze guharirwa inshingano zifatiye runini iterambere ry’umuryango n’igihugu zirimo kurera abana, gutegura amafunguro, isuku n’ibindi ugasanga abagabo ntibasobanukiwe inshingano zabo.

Inzobere mu by’ubuzima n’imikurire y’umwana zigaragaza ko gukura mu bwenge no mu gihagararo bikorwa kuva agisamwa kugera nibura ku myaka itatu kandi byagizwemo uruhare n’ababyeyi bombi n’abafite inshingano zo kumurera. Icyo gihe cyihariye nibura 80% y’iterambere ry’ubwonko.

Bisobanuye ko ari igihe gikwiye kwitonderwa n’ababyeyi bombi, abarezi n’abandi bifuza ko umwana azabasha kwiteza imbere no guteza imbere igihugu.

Igenzura ryakozwe ku rwego rw’ubuzima bw’abaturage mu Rwanda DHS (2014-2015), rigaragaza ko 38% by’abana bari munsi y’imyaka itanu bari bagwingiye.

Abafite amezi 36-59 babasha gutera imbere mu gusoma, kubara, mu gihagararo, imyitwarire bari 63%.

Bivuze ko umwana umwe muri batatu mu Rwanda yari akeneye kwitabwaho byihariye. Ibyo bituma Isi ihomba abakozi bafite ubumenyi bwayifasha guhangana n’ibibazo biyugarije.

Uko abagabo bagira uruhare mu kurwanya imirire mibi n’igwingira

Ubwo IGIHE yasuraga abagabo bo mu Kagari ka Kaburemera mu Murenge wa Ngoma mu Karere ka Huye, basobanuye ko bafite amatsinda bahuriramo rimwe mu cyumweru bakungurana ubumenyi ku ruhare rw’umugabo mu kurwanya imirire mibi.

Umwe mu bagize itsinda riyobowe na Iyakaremye David yiyemeje kubaha umurima bahingamo imboga zirimo dodo, karoti, ubutunguru, beterave, amashu n’ibindi binyuze muri gahunda ya ‘Kura Mwana’.

Bumvikanye uburyo bwo kuzitaho, buri wese aba azi umunsi we wo kuzuhira no kuzitaho. Imboga zezeho, abagize itsinda basoromaho izo guteka mu rwego rwo kurwanya imirire mibi n’igwingira.

Ati “Abagabo barabyishimiye kandi n’abagore barabyishimira kuko babonye inyunganizi. Buri mugabo uri mu itsinda tumushishikariza kugira akarima k’igikoni iwe ariko nanone buri wese yemerewe gusorama imboga muri uyu murima rusange.”

Iyakaremye yavuze ko bigisha abagabo ko mu gihe cyo guhaha bagomba kuzirikana ko amafaranga bahaye abagore harimo ayo kugura ibyunganira mu gutegura indyo yuzuye.

Ati “Ubona abagabo bamaze kugira imyumvire myiza yo gufasha umuryango kubona indyo yuzuye kuko n’abagore ubaganirije bakubwira ko basigaye babafasha. Ikindi, abana bari mu mirire mibi tubona batangiye kuyivamo.”

Umwe mu bagize iryo tsinda witwa Habanintwari Pierre, yavuze ko ‘kuba muri iri tsinda byamufashije kumva akamaro ko kurya indyo yuzuye n’uruhare rwe kuko atararijyamo yaryaga imboga rimwe na rimwe nabwo aziguze’.

Ati “Uruhare rw’umugabo ni ukumvisha umugore ko agomba gutegura indyo yuzuye, abana bakava mu mirire mibi kandi natwe tukabona imboga kuko ni ingirakamaro mu kurinda umubiri indwara.”

Yakomeje agira ati “Ubutumwa mpa abagabo ni ukumva uruhare rwabo mu iterambere ry’umuryango. Bagomba kureka kuzerera ahubwo bagakora amatsinda nk’aya nabo bakazamura ingo zabo.”

Abagore bishimira uruhare abagabo bagira

Abagore bo mu Mudugudu wa Gatoki bavuga ko mu mezi asaga abiri ashize abagabo babo bitabira iryo tsinda byagize impinduka kuko buri wese yahise yubaka akarima k’igikoni mu rugo kandi ko atiganyira gutanga amafaranga yo kugura ibyunganira imboga zeraho.

Uwitwa Musabyemariya Florence yagize ati “Badufasha gukora akarima k’igikoni kugira ngo abana bacu batazajya mu mirire mibi kandi ubona ko bibwiriza gutanga amafaranga yo guhaha ibindi byunganira uturima tw’igikoni.”

Kubwimana Christine yagize ati “Twagerageje kurwanya imirire mibi, dukorera hamwe mu guhinga imboga dufatanyije n’abagabo bacu. Tugira na gahunda yo gushyira amafaranga hamwe kugira ngo utabasha kubona ibindi bizunganira, abone amafaranga yo kugura ibimufasha guteka indyo yuzuye.”

Uruhare rw’ubuyobozi

Ubuyobozi bw’inzego z’ibanze bugaragaza ko abagabo benshi batarumva ko bakwiye gufasha abagore babo kurwanya imirire mibi ariko ko bashyizeho ubukangurambaga kandi buri gutanga umusaruro.

Umuyobozi w’Umudugudu wa Gatoki, Hategekimana Damascène, yavuze ko ‘twashyizeho ubukangurambaga bwo gushishikariza abagabo kugira uruhare mu kurwanya imirire mibi n’igwingira byugarije umuryango nyarwanda’.

Ati “Aho tubitangiriye ubona abana bari gukura neza kurusha mbere bitarajyaho kuko hari n’abajyaga mu mutuku [mu mirire mibi] ariko kugeza ubu nta n’umwe uri mu mutuku kandi twabitangiye dufitemo babiri.”

Umunyamabanga Nshingwabikorwa w’Akagari ka Kaburemera, Kayiranga Janvier, yavuze ko ‘abatangije amatsinda basura abandi bakabumvisha ko umugabo adashinzwe guhahira urugo gusa ahubwo akwiye no gukurikirana niba abana babona indyo yuzuye kandi agakumira icyatera amakimbirane mu muryango we’.

Ati “Umwaka ushize twari dufite abana 18 bari mu mirire mibi barimo batandatu bari mu mutuku na 12 bari mu muhondo ariko aho aya matsinda ashingiwe, abagabo bagize uruhare mu gukora uturima tw’igikoni. Ubu mu mirire mibi hasigayemo abatarenze babiri.”

Aba baturage bavuga ko iyo gahunda abagabo batangiye nubwo itaramara igihe kirekire, igaragaza gutanga umusaruro mwiza ku buryo n’abandi bayishyize mu bikorwa byazafasha mu guhangana no gukumira imirire mibi n’igwingira mu muryango nyarwanda.

Abagabo bo mu Murenge wa Ngoma bafite amatsinda bigiramo gutegura indyo yuzuye n'uruhare rwabo mu kurwanya imirire mibi
Habanintwari Pierre asoromaho imboga ajya guteka mu rugo iwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza