Kwamamaza

Abagabo banenzwe gupfobya abagore babo, basabwa guheka abana, guteka no kumesa

Yanditswe kuya 16-09-2016 saa 10:42' na Niyonsenga Schadrack


Kuba hakiri umubare munini w’abanyarwandakazi bagifatwa nk’inkora busa bitewe no guhora mu mirimo yo kwita ku rugo ntibabone umwanya wo gukora akandi kazi gasanzwe, ni imbogamizi ku iterambere ry’ibihugu byo ku isi by’umwihariko ku bihugu bifite umubare munini w’abagore nk’u Rwanda.

U Rwanda ni kimwe mu bifite umubare munini w’abagore kuko abagera kuri 52% by’abanyarwanda ni abagore.

Umuyobozi w’Umuryango mpuzamahanga nterankunga ishami ry’u Rwanda (ActionAid Rwanda), Uwamariya Josephine, avuga ko imyumvire ivuga ko abagore ari bo bagenewe gukora imirimo yo mu rugo ikwiye guhinduka niba u Rwanda rukeneye gukomeza gutera imbere.

Uwamariya yagize ati “Gutora inkwi, kurera umwana, kwita ku murwayi, kumesa imyenda, guteka, ni imirimo ifata igihe ariko idahemberwa, ariko umugabo n’abandi bakavuga ko nta kintu uwo mugore akora, ni iki babyishyura? Ntugatinyuke kuvuga ngo madamu nta kintu akora kubera ko hari ibindi aba yakoze n’ubwo bidahemberwa amafaranga. Bene iriya mirimo ni ngombwa, ikwiye kwitabwaho, ni ingenzi cyane kuko ifasha. Umugabo ajya kuzana ibindi kuko yaraye ariye ameze neza”.

Imirimo idahabwa agaciro ni imirimo usanga igoye abayikora ndetse ishobora no kugira ingaruka mbi ku buzima bwabo. Kudaha agaciro iyo mirimo kandi ngo bishobora kuba bimwe mu byakurura amakimbirane mu muryango ndetse no gucana inyuma ku bashakanye.

Uwamariya akomeza agira ati “Iyo umugabo ataha ntahe agaciro ibyo madamu we yiriwemo, ni bwo cya gihe atangira no kumubona atarava koga akamubwira ngo ntujya ukaraba. Iyo amaze kubona ko umugore we atoga ubwo ni bwo atangira kutamwifuza akigira ahandi, akamuca inyuma.”

Abagabo bo mu Rwanda ngo bakwiye kugera ku rwego rwo kumva ko nta mirimo yagenewe abagore gusa. Guheka umwana, gukubura, guteka, kumesa imyenda ngo ni imirimo abagabo badakwiye kwihunza ngo iharirwe abagore gusa.

Hirya no hino mu gihugu usanga hari bamwe mu bagabo bagerageza gukora iyi mirimo, ariko rimwe na rimwe bagacibwa intege na bagenzi babo babumvisha ko abagore babo babagize inganzwa ndetse ko babaroze.

Leta n’indi miryango itandukanye barasabwa gukomeza gufasha mu guhindura imyumvire y’abaturage kuri iki kibazo kugira ngo iyi mirimo ijye ihurirwaho n’umugabo n’umugore mu rwego rwo kwihuta mu iterambere kuri bose.

Ubushakashatsi bwakozwe na ActionAid Rwanda mu 2015, bwagaragaje ko abagore 91% bo mu Rwanda bakora imirimo idahabwa agaciro, itanahemberwa (unpaid care works) nk’akazi ka buri munsi. 41% by’igihe cya buri munsi cy’abagore ngo bakimarira mu mirimo irimo gutora inkwi no kuvoma amazi, ibintu bigaragaza ko hakiri umubare munini w’abanyarwandakazi bakora imirimo idahabwa agaciro kandi nyamara itwara umwanya wagakozwemo indi ibyara inyungu rusange mu iterambere ry’igihugu.

Umuyobozi wa ActionAid Rwanda, Uwamariya Josephine

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved