Abafite ubumuga bw’uruhu bababazwa n’ivangura bagikorerwa

Yanditswe na Mukaneza M.Ange
Kuya 17 Kanama 2018 saa 09:32
Yasuwe :
0 0

Hari abafite ubumuga bw’uruhu mu Rwanda bagaragaje ko bugarijwe no kuba bagikorerwa ivangura bituma benshi muri bo bugarizwa n’ubukene bukabije.

Ubumuga bw’uruhu ni ikibazo kivukanwa gituma uruhu, umusatsi, n’amaso bitagira ibara, ibi bijyana n’ibibazo by’amaso no kutabasha kwihanganira izuba.

Mu kiganiro na Rwanda Today, Nicodeme Hakizimana uyobora Ishyirahamwe ry’abafite ubumuga bw’uruhu(OIPPA), yavuze ko benshi mu bafite iki kibazo bugarijwe n’ubukene buturuka ku kuba batarabashije kwiga n’ihezwa bakorerwa.

Ati “Mu ishyirahamwe harimo abafite ubumuga bw’uruhu barangije kwiga za kaminuza ariko ntibashobora kubona akazi.”

Hakizimana avuga ko banahangayikishijwe no guhenda kw’amavuta arinda uruhu rwabo kwangizwa n’izuba, aho icupa rikoreshwa mu mezi abiri rigura ibihumbi 10 Frw ku bakuru na 6000 Frw ku bana. Bifuza ko leta yabafasha byibura rikajya rigurishwa 2000 Frw.

Abafite ubumuga bw’uruhu banafite izindi mbogamizi n’ihezwa bishingira ku myumvire yazanywe n’abaganga gakondo mu bihugu byo mu karere, bakwirakwije ibihuha ko amaraso yabo ashobora gukiza indwara no gutanga ubukire.

Ibi bituma mu bihugu bimwe na bimw bashimutwa ndetse bakicwa.
Abafite ubumuga bw’uruhu bibumbiye muri OIPPA bavuga ko kandi ikibazo bavukanye cyagiye gituma mu miryango yabo havuka amakimbirane.

Komezusenge Charles yagize ati “Data yahoraga atongana na mama, amubaza impamvu yabyaye umwana ufite ubumuga bw’uruhu. Iteka iyo ibi nabyumvaga nahitaga nirukira mu cyumba cyanjye nkifungiranamo umunsi wose.”

Komezusenge avuga ko nubwo umuryango we wamufataga nk’umuvumo, akato yakorerwaga na bagenzi be katumye ava mu ishuri kuko n’ubundi yumvaga atazigera yakirwa.

Abagore babyaye abana bafite ubumuga bw’uruhu nabo bavuga ko bagiye batareranwa n’abagabo babo.

Mu buhamya bwe Mukamana wari warashakanye n’uwitwa Munyaneza yavuze ko akimara kubyara bahoraga batongana ndetse umwana yujuje imyaka umanani ahitamo kubasiga bonyine.

OIPPA yashinzwe mu 2012 ikaba ihuriyemo amatsinda atandatu akorera mu turere twa Kicukiro, Nyarugenge, Musanze, Gasabo, Kayonza na Rutsiro.

Ivuga ko igerageza gusura no kuba hafi imiryango ifite abana bafite ubumuga bw’uruhu.

Imibare igaragaza ko nibura umuntu umwe mu bihumbi 20 ashobora kuvukana iki kibazo. Muri Afurika y’Uburasirazuba habarurwa abafite ubumuga bw’uruhu bagera ku 2000.

Mu Rwanda imibare igaragaza ko mu Karere ka Musanze hari abantu bafite ubumuga bw’uruhu 41, Kicukiro hari abantu 15 naho Nyarugenge hari abantu 17.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza