Abafite ubumuga bize imyuga bagiye gukemurirwa ikibazo cy’abakoresha batabikoza

Yanditswe na Herve Ugirumukunda
Kuya 22 Ukwakira 2017 saa 07:24
Yasuwe :
0 0

Bamwe mu bafite ubumuga b’urubyiruko bahawe amahirwe yo kwiga imyuga ariko batangaza ko bagowe bikomeye no kubona akazi kubera abikorera bumva ko badashoboye n’abandi babanena.

Umwari witwa Vumiliya, ufite ubumuga bw’uruhu, yagize amahirwe yo kwigishwa imyuga binyuze mu mushinga EmployAble w’Urugaga rw’Abafite Ubumuga mu kurwanya SIDA, UPHLS.

Yigishijwe ubudozi ndetse avuga ko uwo mwuga awuzobereyemo, ariko aho yabonye akazi ngo ntibamuhaga agaciro, bakamwiriza ku zuba kandi babizi neza ko bimugiraho ingaruka kubera ubumuga afite.

Ati “Twirirwaga ku zuba kandi nyine kubera imiterere y’uruhu rwanjye byageraga aho simbashe kubona. Nyuma y’ibyumweru bitatu natangiye kwambara ingofero ngo nirinde ariko bakayinkuzamo bambwira ko bitemewe kuyambara mu kazi.”

Umukoresha yamushinze gushushanya imyenda abandi badozi bagombaga kudoda, akajya abikora neza, noneho batangira kumugirira icyizere ariko nabwo akajya ataha ijoro, aho yari afite impungenge ko ashobora guhohoterwa.

Vumiliya yahisemo kureka akazi ubu ababazwa no kuba atishakira ikimutunga. Yifuza ko abakoresha bakwigishwa kwakira abafite ubumuga, cyane ko akenshi hari n’igihe baba barusha abatabufite gukora neza.

Shyirambere Bruno, umuhuzabikorwa w’umushinga EmployAble yavuze ko kwigisha abafite ubumuga imyuga bikirimo imbogamizi nyinshi, kuko hari benshi batanashobora kwiga.

Yatanze urugero rw’igice cya mbere cy’uyu mushinga cyatangiye muri 2014 kikarangira muri 2016, aho mu bana batangiye kwiga harangije ½ gusa.

Yagize ati “Umushinga watangiriye mu mujyi wa Kigali ari igerageza ku mashuri atatu. Twahamagariye abana kuza kwiga tubona abana bagera kuri 455 kandi twari dukeneye 200. Muri abo, 129 nibo bashoboye gufashwa hakurikijwe ubushobozi bwari buhari ariko abasoje amasomo ni 109.

Shyirambere avuga ko kugeza ubu abo banyeshuri badafite akazi uretse 56 gusa.
Ati “ Iyi mibare yerekana ibibazo urubyiruko rufite ubumuga ruhura nabyo bwo kuba babasha kugera ku mashuri y’ubumenyi ngiro ndetse no mu kazi.”

Karangwa Francois Xavier, umuyobozi wa UPHLS, avuga ko hari nk’aho umukoresha yanze guha akazi ufite ubumuga bwo kutavuga yibaza uko azavugana n’abakiliya ariko nyuma birangira ari we ubaye umukozi w’intangarugero.

Ni yo mpamvu urugaga UPHLS rugiye gutangira igice cya kabiri cy’umushinga EmployAble, aho abamaze kwiyandikisha basaga 650 kandi bafite ubushobozi bwo kwakira 300 bo mu turere twa Muhanga, Rulindo, Musanze na Rubavu.

Uru rugaga ruteganya guhugura abakoresha ku gukorana n’abafite ubumuga ndetse no kuzajya baherekeza ufite ubumuga mu kazi ke gashya, bakareba niba ubumuga bwe butamubangamira mu gukoresha ibikoresho by’akazi, bakabimufashamo.

Umushinga EmployAble II uzibanda ku rubyiruko ruri hagati y’imyaka 16 na 30 rwize amashuri abanza cyangwa ay’imyaka icyenda y’ibanze.

Vumiliya yaretse akazi kubera abakoresha batamuha agaciro
Umuyobozi w'urugaga UPHLS yemeza ko hari abafite ubumuga barusha abatabufite gukora neza
Abafatanyabikorwa b'urugaga UPHLS biyemeje gufatanya gushakira imirimo abafite ubumuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza