00:00:00 IGIHE NETWORK KN KINYARWANDA EN ENGLISH FR FRANCAIS

Abafite ubumuga basabye gutekerezwaho muri gahunda zo kwirinda Virus itera SIDA

Yanditswe na Ntabareshya Jean de Dieu
Kuya 30 Nzeri 2021 saa 02:14
Yasuwe :
0 0

Abafite ubumuga mu byiciro binyuranye basabye gutekerezwaho muri gahunda zitandukanye zirimo izo kwirinda agakoko gatera SIDA kuko abagize ibyago bakakandura usanga ahanini bahabwa akato muri rubanda ndetse abandi bikagorana kumvikana na muganga bitewe n’imiterere y’ubumuga bafite.

Ibi babigaragaje mu nama yahuje abafatanyabikorwa batandukanye b’imishinga yita ku bafite ubumuga n’abafite ubwandu bw’agakoko gatera SIDA, barimo imiryango itari iya Leta, Ikigo cy’Igihugu gishinzwe Ubuzima (RBC), Inama Nkuru y’Ababana n’Ubumuga mu Rwanda ndetse na Ambasade ya Leta Zunze Ubumwe za Amerika mu Rwanda, ku wa Kabiri, tariki ya 28 Nzeri 2021.

Abafite ubumuga bagaragaje ko uretse kuba bahabwa akato kuko bafite ubumuga iyo hagize ugaragarwaho na virus itera SIDA aba igitutsi muri Sosiyete ndetse rimwe na rimwe akagorwa no kujya muri gahunda yo gufata imiti igabanya ubukana bwa Virus itera Sida nk’abandi badafite ubumuga bitewe no kudahuza ubwumvane n’umukozi wo kwa muganga nkuko Mukarukundo Donathille yabisobanuye.

Yagize ati “Abantu bafite ubumuga ingorane duhura nazo by’umwihariko abafite ubumuga bwo kutabona nko muri serivisi zo kwipimisha virus itera SIDA ntibamenya amakuru. N’iyo wipimishije ugasanga waranduye bagenzi bawe ntabwo bakwiyumvamo. Baraguca bakagushyira ku ruhande ntabwo bakumva rwose.’’

Yongeyeho ati “Ikindi tujya duhura nacyo, abaganga ntibaramenya uburyo bwo kwakira abantu bafite ubumuga. Iyo amugezeho arakwakira ariko utaramugeraho ntabwo abona ko waba ufite imbogamizi.’’

Umuyobozi w’Umuryango wita ku bafite Ubumuga wa UPHLS, Karangwa François Xavier, yagaragaje ko hari byinshi byakozwe kugira ngo abafite ubumuga boroherezwe kugera kuri serivisi zo kwa muganga, nko koroherezwa mu kugenda mu nyubako zimwe na zimwe z’ibitaro ndetse no guhugurwa kw’abakora mu nzego z’ubuzima.

Yagaragaje ko imibare y’abafite ubumuga banafite virus itera SIDA kugeza ubu itazwi, ariko ngo hari gukorwa ibarura ku buryo mu gihe cya vuba bazaba bamaze kubona amakuru ahagije.

Yavuze ko kandi ko hakiri imbogamizi zikwiye kuganirwaho n’inzego zinyuranye zireberera abafite ubumuga kugira ngo babashe kugera kuri serivisi z’ubuzima.

Ati "Haracyari imbogamizi z’ubumenyi buke ku baganga bose, amavuriro amwe atorohereza abafite ubumuga mu kuyageraho (accessibility), ikibazo cyo kumenya imibare ya nyayo y’abafite ubumuga, abafatanyabikorwa bahina akaboko ndetse n’ababura aho bahera ngo bafashe abafite ubumuga. Ikindi ni uko natwe abafite ubumuga dusa n’abatirabira izo serivisi. Biradusaba ko tuzitabira kugira ngo ntube umupira ukinirwa ku ruhande rumwe naho twe tumeze nkaho utatureba."

Umunyamabanga Nshingwabikorwa w’Inama Nkuru y’Igihugu y’Abafite Ubumuga, Ndayisaba Emmanuel, yavuze ko muri serivisi z’ubuvuzi bakorera ubuvugizi abafite ubumuga mu rwego rwo koroherezwa kuzibona.

Yavuze ko nk’abafite inshingano zo gukora ibarura rusange ry’abafite ubumuga mu Rwanda, hari gukorwa uburyo bw’ikoranabuhanga buzifashishwa mu ibarura ku buryo umwaka wa 2022 uzarangira abafite ubumuga mu Rwanda bazwi neza ku buryo no muri serivisi zinyuranye bajya bitabwaho mu igenamigambi dore ko ubu hakifashishwa imibare yo mu 2012.

Umukozi mu Kigo cy’Igihugu gishinzwe Ubuzima, RBC, ushinzwe Ishami ryo kurwanya SIDA, Dr Rwibasira Gallican, yavuze ko abafite ubumuga badakwiye gusigara inyuma mu ntego yo kurandura burundu SIDA.

Ati “Hahuguwe ndetse harimo harahugurwa umubare mwinshi w’abakozi bo kwa muganga, ku buryo babasha kumvikana no kuganira n’abafite ubumuga kugira ngo bamenye ibyo bakeneye nuko babafasha. Ayo mahugurwa rero azakomeza kuko umubare uracyari muto, kuko na Leta yabyiyemeje mu nama Mpuzamahanga y’abafite ubumuga mu 2018 ko mu 2030 amavuriro yose azaba yubatse ku buryo bworohereza abafite ubumuga."

Yakomeje agira ati “Ni intego isa n’itoroshye ariko tuzakomeza gukorana n’abafatanyabikorwa batandukanye cyane cyane mu Ishami ryo kurwanya SIDA, nkuko duteganya kuba twamaze kurwanya SIDA mu 2030 ndetse no kugabanya ubwandu bushya tuzabe na none tutarasize inyuma abafite ubumuga, ku buryo ingamba zose dushyiraho zo kuyirwanya zizaba zorohereza abafite ubumuga kubona izo serivisi.”

Ambasaderi wa Leta Zunze Ubumwe za Amerika mu Rwanda, Peter Vrooman, yabwiye IGIHE ko kugera kuri serivisi z’ubuvuzi ku bafite ubumuga mu Rwanda, igihugu cye yagize uruhare mu ivugurura ry’imyubakire ya bimwe mu bigo nderabuzima ndetse n’imiti Ikigo gishinzwe Indwara z’ibyorezo muri Amerika (CDC) cyafashije binyuze muri Minisiteri y’Ubuzima.

Yavuze ko abafite ubumuga bakwiye kwitabwaho mu buryo bwihariye kuko iyo bagize ibyago byo kwandura virus itera SIDA bituma bagira ibikomere bibiri, yijeje ubufatanye bwa Ambasade ya Amerika mu Rwanda mu bikorwa byo kubungabunga ubuzima bw’abafite ubumuga.

Abafite ubumuga basabye kwitabwaho muri gahunda yo kurwanya Virus itera SIDA
Ambasaderi wa Leta Zunze Ubumwe za Amerika mu Rwanda, Peter Vrooman, yavuze ko abafite ubumuga bakwiye kwitabwaho mu buryo bwihariye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .