Kwamamaza

Abafaransa babiri bafatiwe mu Rwanda barafungwa bazira kwinjira nta visa

Yanditswe kuya 13-10-2016 saa 21:35' na IGIHE


Abafaransa babiri Roger Patrick Claude Michel na Dimanche Jean Marc Roger kuwa 22 Kanama 2016 bafatiwe ku butaka bw’u Rwanda baturutse muri Congo ariko nta visa zibemerera kwinjira mu gihugu bafite, barafatwa barafungwa.

Icyo gihe bari mu modoka y’Umuryango w’Ubumwe bw’i Burayi ishami ryayo rikorera muri RDC. Bahise basabwa gusubira inyuma bakajya gusaba impapuro zibemerera kwinjira mu Rwanda ntibabikora niko guhita batabwa muri yombi bafungwa iminsi igera kuri itatu nyuma bashyikirizwa ubutabera.

Umuvugizi w’Ikigo cy’Igihugu gishinzwe abinjira n’abasohoka, Butera Yves, yasobanuriye IGIHE uko byagenze kugira ngo Claude Michel na Dimanche Jean Marc Roger batabwe muri yombi.

Ati “Binjiye bava muri Congo nta burenganzira bw’Urwego rw’Igihugu rushinzwe abinjira n’abasohoka. Bivuze ko bisanze bari mu gihugu mu buryo bunyuranyije n’amategeko. Bavuye muri Congo bari mu modoka bahawe na EU ya Congo.”

Nyuma yo gufatwa, boherejwe i Kigali bafungirwa kuri Station ya Polisi ya Kicukiro aho bamaze iminsi itatu. Iyo minsi ishize, bajyanywe imbere y’ubutabera ngo bisobanure ku byaha birimo kwinjira no kuba bari mu gihugu mu buryo bunyuranyije n’amategeko; urukiko ruza gufata umwanzuro w’uko barekurwa bakaburana bari hanze mu gihe iperereza rigikomeje.

Gusa rwaje gusaba ko rwashyikirizwa imodoka barimo mu rwego rw’iperereza ari nacyo cyatindije urubanza rwabo. Ibi bimenyetso byabonetse mu mpera z’ukwezi gushize haza gufatwa umwanzuro barahanwa aho bombi baciwe amande ya miliyoni imwe y’amafaranga y’u Rwanda.

Nyuma y’urubanza rwabo, kuri uyu wa 13 Ukwakira 2016, aba bagabo babiri baherekejwe n’abayobozi bo muri Ambasade y’u Bufaransa mu Rwanda bahawe n’Urwego rw’Igihugu rushinzwe abinjira n’abasohoka impapuro zibemera gusohoka mu gihugu.

Umuvugizi w’Ikigo cy’Igihugu gishinzwe abinjira n’abasohoka, Yves Butera, yavuze ko ‘bahawe visa zibemerera gusohoka mu Rwanda.’ Ati “Kugira ngo usohoke bisaba ko ugenda mu buryo bwemewe n’amategeko.”

Abagabo babiri bafite ubwenegihugu bw’u Bufaransa bafatiwe mu Rwanda barafungwa bazira kwinjira mu gihugu nta visa
Umwe mu Bafaransa yuzuza impapuro zimwemerera gusohoka mu Rwanda

Hari n’undi uherutse gusabwa kuva ku butaka bw’u Rwanda

Mu minsi ishize kandi Ikigo Gishinzwe Abinjira n’Abasohoka mu Rwanda cyasabye Umunyamategeko w’Umuholandi, Caroline Buisman, uvuga ko ari umwunganizi wa Ingabire Victoire, kuva mu gihugu, nyuma y’uko yagerageje kwinjira muri Gereza Nkuru ya Kigali ngo abonane na Ingabire kandi nta ruhushya yari abifitiye.

Buisman Caroline yinjiye mu gihugu kuwa 9 Gicurasi 2016, agendera ku burenganzira (visa) buhabwa ba mukerarugendo bo muri Afurika y’Uburasirazuba gusa, yaboneye muri Kenya ku kibuga cy’indege cya Jomo Kenyatta.

Ageze mu Rwanda, nyuma y’icyumweru kimwe, ku itariki ya 16 Gicurasi 2016 yagerageje gusura Ingabire Victoire muri Gereza Nkuru ya Kigali avuga ko ari umwunganizi we, ariko ubuyobozi bwayo bumwangira kwinjira nk’uko amategeko y’Urwego Rushinzwe Imfungwa n’Abagororwa abiteganya.

Icyo gihe yasabwe kujya gushaka ibyangombwa byuzuye, maze Kuwa 17 Gicurasi binyuze muri Ambasade y’u Buholandi mu Rwanda, Buisman asabirwa muri Minisiteri y’Ububanyi n’Amahanga n’ubutwererane ko yakwemererwa gusura Ingabire muri 1930.

Kuwa 18 Gicurasi yabajijwe n’inzego zishinzwe abinjira n’abasohoka mu gihugu isano iri hagati y’ibyo yaziye mu Rwanda n’ibyo yashakaga gukora, Buisman yemera neza ko ari kugerageza ibinyuranye na visa yahawe.

Umunyamategeko w’Umuholandi, Caroline Buisman

Buisman yabwiye RFI ko yiyemereye mu nyandiko ko ari mu Rwanda kuri visa ya ba mukerarugendo nubwo atari muri ubwo buryo we ahari.

Buisman yahise asabwa kuva mu Rwanda nyuma yo guhura n’urwego rushinzwe abinjira n’abasohoka, aho yavuye kuwa 19 Gicurasi 2016.

Inkuru bifitanye isano: Uko ‘umwunganizi’ wa Ingabire Victoire yategetswe kuva mu Rwanda igitaraganya

Amafoto: KT


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved