Abadepite batunguwe no kubona UR yarishyuye miliyoni 900 ku mirimo itarakozwe

Yanditswe na Uwishyaka Jean Louis
Kuya 3 Ukwakira 2016 saa 01:33
Yasuwe : XX
0

Abayobozi ba Kaminuza y’u Rwanda babwiye abadepite ko bagiye gusesa amasezerano na rwiyemezamirimo bishyuye miliyoni zisaga 900 ku nyubako yiswe ‘Vet Complex’, yadindiye bikabije, kandi yari igenewe gufasha abiga ubuvuzi bw’amatungo muri Koleji ya Nyagatare.

Izo miliyoni zisaga 900 zishyuwe rwiyemezamirimo ku mirimo atakoze, ni kimwe mu byo Abadepite bagize Komisiyo ishinzwe gukurikirana imicungire y’imari n’umutungo wa Leta (PAC), batumirije Ubuyobozi bwa Kaminuza y’u Rwanda ngo butangeho ibisobanuro nyuma y’aho kigaragajwe muri raporo y’Umugenzuzi Mukuru w’Imari ya Leta y’umwaka wa 2014-2015.

Nk’uko byagaragajwe muri iyi Raporo, Koleji ya Nyagatare yagiranye amasezerano na rwiyemezamirimo yo kubaka ‘Vet Complex’, inyubako yagombaga gufasha abanyeshuri biga ubuvuzi bw’amatungo, ifite agaciro ka Miliyari 3,7 z’amanyarwanda.

Nk’uko byagaragajwe na Depite Kankera Marie Josée ngo uwo rwiyemezamirimo yatangiye imirimo yo kubaka umusingi w’iyo nyubako mu gihe hari hasigaye amezi atatu gusa ngo amezi 18 bari bumvikanye ko izaba yuzuye agere.

Aha ni ho Depite Nkusi Juvenal, Umuyobozi wa PAC yahereye abaza ahaturukaga icyizere cy’uko iyo nyubako izuzura mu gihe hari hashize amezi 15 nta kimenyetso na kimwe cyerekana ko rwiyemezamirimo atangira imirimo ye.

Nk’uko Umugenzuzi mukuru w’imari ya Leta, Obadiah Biraro yakomeje abigaragaza muri raporo ye, uwo rwiyemezamirimo yishyuwe miliyoni zisaga 900 z’amafaranga y’u Rwanda, arimo 14% y’amafaranga yose y’iryo soko, ndetse ngo anishyurwa 6% y’inyemezabwishyu ebyiri zifite agaciro ka miliyoni 300, nyamara harebwa imirimo yakozwe ikabura.

Abadepite bakomeje bagaragaza ko rwiyemezamirimo yakoze imirimo ifite agaciro ka miliyoni 308 gusa, nyuma bigaragara ko isoko atazarishobora arahagarikwa, hakibazwa aho miliyoni zisaga 600 zazimiriye.

Kuba harakozwe imirimo itarenze 8%, rwiyemezamirimo akishyurirwa 20%, byatumye abadepite bakeka ruswa muri iryo soko, aho Nkusi Juvenal, Umuyobozi wa PAC yagize ati “Ubwo koko muri iryo soko nta ruswa irimo? Ibyo yari gukora nta na kimwe yakoze, iyo si ruswa yigaragaza, hari ahandi washakira?”

Ubuyobozi bwa Koleji ya Nyagatare bwasobanuye ko iyo nyubako yadindijwe no kuba haratinze kuboneka icyangombwa kibemerera kubaka, kuko cyabonetse nyuma y’amezi atandatu (6) uhereye igihe amasezerano yashyiriweho umukono, imirimo yo kuyubaka ibona guhita itangira.

Gusa ibi bitandukanye n’ibyavuzwe n’abadepite, bo basobanuye ko imirimo yo kubaka iyo nyubako yadindiye amezi 15. Icyakora ubuyobozi bwa Kaminuza y’u Rwanda bwemeye ko koko iyi nyubako yadindiye.

Nk’uko byasobanuwe na Pudence Rubingisa, Umuyobozi wungirije wa Kaminuza y’u Rwanda ushinzwe Imari, yavuze ko habayeho intege nke mu gukurikirana amasezerano yo kubaka Vet Complex, ndetse ngo nyuma byaje kugaragara ko uwo rwiyemezamirimo yari mu cyiciro kitamuheshaga uburenganzira bwo gupiganirwa iryo soko, kuko yari mu cya gatatu, kandi ubundi hakurikijwe uko ringana ngo ryaragombaga guhabwa abo mu cyiciro cya mbere.

Icyakora ngo ibyiciro bya ba rwiyemezamirimo byashyizweho nyuma y’uko iryo soko ritangwa, ariko ngo hari gukurikizwa ibiteganywa n’amategeko ngo uwo rwiyemezamirimo aryamburwe maze rihabwe urikwiye.

Amasezerano yo kubaka iyo nyubako yasinywe tariki ya 1 Kamena 2014. Byari biteganyijwe ko ‘Vet Complex’ izaba ari umuturirwa w’inyubako eshanu zigerekeranye, ifite ibyumba 11 bikorerwamo ubushakshatsi (Laboratoires).

Mu gihe harimo gukorwa ibisabwa ngo uwo rwiyemezamirimo yamburwe isoko, ubuyobozi bwa Koleji ya Nyagatare buvuga ko yari arangije kubaka inzu yo hasi, ageze ku ya kabiri (2nd Floor).

Uretse idindira rya ‘Vet Complex’, Koleji ya Nyagatare yagaragayemo andi makosa arimo kwiyongerera imishara y’abakozi nta gikurikijwe, hakaba hasobanuye ko ari gahunda yo kongeza imishara abakozi muri rusange (Top Up), n’ubwo habajijwe icyashingiweho ntikiboneke, bikarangira abadepite bemeje ko ari amakosa.

Iyi raporo kandi yagaragaje ko iyi Koleji yashowe mu manza zitandukanye n’abakozi bayo zatumye yishyura by’amaherere miliyoni zisaga 59 z’amafaranga y’u Rwanda.

Iyo Koleji kandi yatunzwe agatoki mu icungamari ryayo, nyuma y’aho hagaragaye amafaranga y’u Rwanda miliyoni imwe ifite kuri Konti yayo muri Banki ya Kigali, ariko atagaragara mu bitabo by’ibaruramari, ibyo na byo ngo bikaba byaravugutiwe Umuti ndetse biranakosorwa.

Uretse ibyo, Abadepite banatangajwe no kuba muri raporo y’Umugenzuzi mukuru w’imari ya Leta hagaragaramo ko hari abakozi bakatwa amafaranga y’umusanzu w’ubwishingizi rusange (RSSB) ariko ntibishyurirwe, ibyo bikajyana n’umwenda iyi koleji yari ibereyemo Ikigo cy’imisoro n’amahoro (RRA).

Ubuyobozi bwa Kaminuza y’u Rwanda bwasobanuye ko ibyo byakosowe, ndetse ngo umukozi wari ubishinzwe byamugizeho ingaruka nubwo hatatangajwe izo ari zo.

Depite Nkusi Juvenal na bagenzi be bagize PAC batunguwe no kubona Kamunuza y'u Rwanda yarishyuye ibikorwa bitakozwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza