Kwamamaza

Hemejwe umushinga w’itegeko rishyiraho Urwego rw’Igihugu rushinzwe Iperereza

Yanditswe kuya 14-11-2016 saa 22:06' na Cyprien Niyomwungeri


Inteko Ishinga Amategeko, Umutwe w’Abadepite ku gicamunsi cyo kuri uyu wa Mbere tariki 14 Ugushyingo 2016, yatoye umushinga w’itegeko rishyiraho urwego rw’Igihugu rushinzwe iperereza (RIB), rusimbuye Ishami ry’Ubugenzacyaha muri Polisi y’u Rwanda (CID).

Iryo tegeko rigena rikagena inshingano, ububasha, imiterere n’imikorere y’urwego rw’igihugu rushinzwe iperereza, ritowe nyuma y’Inama y’Abaminisitiri yo kuwa Gatatu tariki 10 Kanama yemeje ko Ishami ry’Ubugenzacyaha muri Polisi y’u Rwanda (CID) rihindurirwa izina rikanashyirwa muri Minisiteri y’ubutabera (Minijust).

Nkuko byasobanuwe n’Umunyamabanga wa leta muri Minisiteri y’ubutabera Ushinzwe ibyerekeye Itegeko Nshinga n’andi mategeko, Uwizeyimana Evode; uru rwego ruzaba rwihariye ntawe uruha amabwiriza, ruzajya rukora iperereza ry’inkiko rukore dosiye ruyishyikirize inkiko n’abashinjacyaha.

Yasobanuye ko Urwego rw’Igihugu rw’Iperereza ruzaba rugizwe n’abasivili, ku buryo abantu bazajya barujyamo baturutse mu nzego zinyuranye mu gihe babifitiye ubushobozi, hatarindiriye ko iperereza rikorwa na polisi. Agaruka ku bunyamwuga budahagije bwagiye buranga urwego rw’iperereza CID bugiye gukemurwa na RIB.

Yagize ati “Inzego zikomeza ziyubaka zivugururwa ariko twabonaga n’amadosiye akoze nabi, bibaho ko idosiye yashoboraga guturuka muri CID yarakozwe nabi n’umushinjacyaha kugirango azayisobanure imbere y’urukiko bigashobora kumugora kubera ko iperereza ry’ibanze ryakozwe nabi cyangwa se harabayeho kurangara ibimenyetso bimwe na bimwe bikazimira.”

Uwizeyimana atanga urugero rw’aho wasangaga nk’umugore cyangwa umukobwa yarafashwe ku ngufu akajyanwa kwa muganga nyuma y’amezi atatu icyaha kibaye ngo basuzume. Ibi bigatuma bishoboka ko hasibangana ibimenyetso cyangwa hakabaho kwibeshya abantu bakarekurwa kandi barakoze ibyaha.

Urwego rw’Igihugu rushizwe Iperereza rwitezweho kandi gukemura ibibazo byagaragaraga mu madosiye mpuzamahanga cyane cyane ayo u Rwanda rwoherezaga mu bihugu rusaba kohererezwa abakekwaho Jenoside, kuko ruzabasha kuzuza dosiye hashingiwe ku iperereza ryimbitse rya kinyamwuga.

Uwizeyimana yagize ati “Tunareba n’amadosiye ari ku rwego mpuzamahanga, hari aho usanga gushinja umuntu byarakozwe nabi noneho igihugu dusaba kutwoherereza umuntu uregwa, ugasanga igihugu kiravuga kiti ‘uyu muntu ntabwo dushobora kumubaha iyi dosiye nta kirimo...”

Depite Mukazibera Agnes yabajije aho ubunyamwuga budasanzwe urwego rw’igihugu rushinzwe iperereza ruzakoresha ugereranyije nuko mbere byakorwaga.

Uwizeyimana yasubije ko uretse kuba uru rwego ruzajya rukoresha abanyamategeko bafite ubumenyi bwihariye, haziyongeraho n’amahugurwa bazajya bahabwa binyuze mu ishuri ry’iyubahirizwa ry’amategeko ‘Rwanda Law Enforcement Academy’.

Yagize ati “Mu rwego rwo gukora amaperereza y’inkiko ndahamya ko uru rwego ari igisubizo kiboneye kandi ubunyawuga buzigaragaza.”

Uyu mushinga w’itegeko wemejwe n’abadepite 44 kuri 49 bari bitabiriye inteko rusange. Intumwa za rubanda zanemeje umushinga w’itegeko ryemeza ko ishuri ryitwaga Rwanda National Police Academy rihinduka ishuri ry’iyubahirizwa ry’amategeko, Rwanda Law Enforcement Academy. Iri shuri rizajya rihugura abapolisi kinyamwuga rinatange impamyabumenyi zitandukanye.

Iyi mishinga y’amategeko yatowe irahita ijya gusuzumirwa muri Komisiyo z’Abadepite mbere y’uko yemezwa n’inteko rusange ikoherezwa muri Guverinoma.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved