Abadepite bavanyeho urujijo ku cyo ababyeyi bita kwigira ubuntu

Yanditswe na Ishimwe Israel
Kuya 6 Ukwakira 2016 saa 08:17
43 29

Perezida w’Inteko Ishinga Amategeko, Umutwe w’Abadepite, Mukabalisa Donatille na Depite Muhongayire Christine bavaniyeho ababyeyi urujijo ku cyo bita kwigira ubuntu mu mashuri abanza, babibutsa uruhare rwabo mu gushyigikira gahunda za Leta.

Itegeko Nshinga rya Repubulika y’u Rwanda rigena ko abana bagomba kwiga bakarangiza nibura amashuri abanza, kandi ko ikiguzi cyayo ari ubuntu.

Hirya no hino mu gihugu, bamwe mu babyeyi bagiye bajyana abana babo ku ishuri, ariko bakavuga ko hari abirukanwa kubera batishyuye amafaranga y’agahimbazamusyi baba baciwe, kandi ngo kwiga ari ubuntu.

Kuwa Gatandatu tariki ya 1 Ukwakira 2016, ubwo abaturage n’abadepite bari mu muganda udasanzwe utangiza icyumweru cy’ubumwe n’ubwiyunge mu Rwanda, mu Murenge wa Nyamirambo, umwe mu babyeyi yatangaje ko abana babo bigira ubuntu mu mashuri abanza ya Leta, ariko ko atari byo kuko hari amafaranga basabwa ku ishuri ndetse bamwe mu batayishyuye bakirukanwa (abandi babyeyi bahise bakoma amashyi).

Depite Mukabalisa yababwiye ko ikiguzi cyo kwiga ari ubuntu, ariko umubyeyi hari icyo asabwa mu gufasha umwana we kwiga neza, nawe agira icyo atanga.

Yatangaje ko igihugu kidakwiye kubaka amashuri, n’abakoropa ngo bishyurwe na Leta ahubwo n’ababyeyi bagomba kubigiramo uruhare.

Depite Muhongayire Christine yavuze ko kwiga amashuri abanza ari ubuntu, ndetse ko hasohotse amabwiriza ya Minisitiri abigena, anagaragaza ko nta mwana ugomba kwirukanwa, ariko ko uruhare rw’umubyeyi ku mwana we narwo ari ingenzi.

Ati “Tugomba kubyara abo dushoboye kurera... Leta yubatse amashuri izana abakozi (abarimu), wowe nka se cyangwa nyina ni iki ukora ngo umwana wawe yige neza?”

Yongeyeho ko amashuri asaba ababyeyi kugira uruhare rwayo muri ubwo burere, batanga amafaranga atitwa ay’ishuri. Ayo mafaranga afatwa nk’umusanzu w’ababyeyi kugira ngo nihagira icyangirika gisanwe.

Yakomeje agira ati “Mubyeyi ufite inshingano zo kwita ku mwana wawe kandi ukamukuza [...] Niba ubona ibihumbi bitanu ku bana bawe batatu bikuvunnye, byara umwe ubasha kurera neza no kumubonera ibyo akeneye.”

Perezida w’Inteko Ishinga Amategeko, Umutwe w’Abadepite, Mukabalisa Donatille atangaza ko ababyeyi bagomba kugira uruhare mu myigire y'abana babo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE