Kwamamaza

Abadepite batunze agatoki ababuranira Leta kubera umubare w’imanza itsindwa

Yanditswe kuya 21-11-2016 saa 16:15' na Hagengimana Philbert


Ingamba zitandukanye zatumye imanza Leta ishorwamo n’izo itsindwa zigabanuka cyane ariko ntibikuraho ko hari n’izo itsindwa ku maherere kandi ikishyuzwa akayabo nk’uko byagaragaye kuri zimwe mu nzego nk’Umujyi wa Kigali, uturere ndetse n’ibindi bigo bya Leta.

Raporo y’Umugenzuzi Mukuru w’Imari ya Leta mu mwaka wa 2014/2015 yagaragaje ko bamwe mu bakozi b’uturere bagiye bashora Leta mu manza rimwe na rimwe ikanazitsindwa, hakishyurwa akayabo.

Ibyo byanashimangiwe na raporo ya Komisiyo ishinzwe abakozi ba Leta, mu isesengura yakoze yasanze inzego za Leta 51 zirimo Umujyi wa Kigali n’uturere, Minisiteri, Ibigo bya Leta n’amashuri makuru na Kaminuza, zaburanye n’abakozi bazo bagera kuri 354 mu manza 154, aho Leta yatsinzemo imanza 39 zihwanye na 25%, igatsindwa 115 zihwanye na 75%.

Izo manza zose ni zo zatumye Leta yishyura akayabo ka 524 270 595 z’amafaranga y’u Rwanda ndetse n’amadolari ya Amerika 17400, mu gihe yo muri izo manza 39 yatsindiye 10 678 100 y’amanyarwanda kuva muri Nyakanga 2012 kugeza muri Kamena 2015.

Ibi byatumye Depite Théogène Munyangeyo akemanga imikorere n’umusaruro w’ababuranira Leta, aho yagaragaje ko itsindwa henshi haba mu manza z’ubutegetsi iregwamo, haba abayiha serivisi, abayambura n’abandi baba bagaragajwe ko bakoze amakosa ariko akenshi bagatsinda Leta, ibyo bikiyongeraho ko itajya ijuririra imanza yatsinzwemo.

Ati “Aha ndagira ngo rwose hazabe umwanzuro w’abantu baburanira Leta, biragaragara ko harimo ikibazo muri buri cyiciro Leta iratsindwa.”

Yakomeje agaragariza Inteko rusange y’Umutwe w’Abadepite na Sena, ko ikibitera nta kindi “Ni uko umuntu watangiye kuburanira Leta mu cyiciro cya mbere iyo habayemo ubujurire si we ugaragara mu cyiciro cya kabiri. Ikindi wagira ngo imanza zirabatungura.”

Depite Munyangeyo yagaragaje ko hari abo babajije dosiye bakayimuha uyu munsi ngo azajye guhagararira Leta mu rubanza runaka, ariko wareba ugasanga ntibigeze bategura neza urubanza, kandi ngo si mu manza n’abakozi gusa (iz’ubutegetsi) ahubwo no mu bindi byiciro nk’abanyereza umutungo wa Leta n’ababa batarubahirije amasezerano bagiranye na Leta.

Akarere ka Muhanga ni kamwe kagaragayemo ibyo bibazo, aho kishyuye miliyoni zigera kuri 15 mu 2014/2015 kubera imanza katsinzwe, nyamara byaranashobokaga ko zirindwa, ahubwo abagiranye ikibazo na ko bakishyurwa mu bwumvikane nk’uko byagaragajwe n’Abadepite bagize PAC.

Umunyamabanga Nshingwabikorwa w’Akarere ka Muhanga, Gasana Celse yasobanuye ko ubwumvikane bwananiranye hakiyambazwa inkiko akarere kagatsindwa. Nyuma yatangarije abanyamakuru ko mu mpamvu zituma batsindwa, harimo na ba ’Mandataire’ bagenerwa na Leta ngo bababuranire, rimwe na rimwe bakajya babahinduranya.

Aha ni na ho yahereye asaba ko Akarere kajya gahabwa uburenganzira bwo kwishakira ukaburanira ngo kuko ingengo y’imari kaba gafite kadashobora kubura amafaranga yo guhemba Avoka.

“’Mandataire’ ntabwo ari umupfumu”

Minisiteri y’Ubutabera ivuga ko umuntu wirukanywe mu kazi, ajya kurega areba ko hari ikosa yakorewe, ariko ko urebye umubare w’abagana inkiko barega Leta usanga atari na 1/100 cy’abo iba yahannye ku mpamvu z’amakosa mu kazi.

Icyakora ngo iyo umukozi yirukanywe mu buryo budakurikije amategeko, ’Mandataire’ ntiyabihindura imbere y’umucamanza.

Minisitiri w’Ubutabera, Johnston Busingye ati “’Mandataire’ ntabwo ari umupfumu, nubwo yagira ate…kenshi baraza bakabikwereka nk’umuyobozi wabo bati nk’uru rubanza turugire dute? Umuntu bamuhaye amasezerano bayasesa batamubwiye, nta nteguza, hari icyangombwa cya nyuma batamuhaye, hari imperekeza ye bamwimye, hari ikintu gitandukanye kitagenze neza.”

Minisitiri Busingye akomeza avuga ko yasabye ko imanza zose Komisiyo y’Abakozi ba Leta yavuze ko yatsinzwe, zasuzumwa hakarebwa neza imigendekere yazo, ndetse ngo muri iki cyumweru Minisiteri y’ubutabera izaganira n’iyo Komisiyo harebwe uburyo ibintu byarushaho kunozwa, kuko atari buri gihe gutsindwa kwa Leta kuba kwaturutse ku mikorere mibi ya ’Mandataire’.

Mu mwaka wa 2015, Imanza Leta y’u Rwanda yarezemo n’izo yaregwamo n’abantu, inzego n’ibigo bitandukanye, zari 289 aho haburanishijwe izigera kuri 164 , igatsindamo 111 zingana na 67.6%, itsindwa 53 zingana na 32%.

Ubwo yatangizaga umwiherero w’intumwa za Leta 14 muri Kamena uyu mwaka, Minisitiri Busingye yavuze ko umubare w’imanza Leta itsindwa wagabanutse, ariko ngo haracyari byinshi byo gukorwa, aboneraho gukebura ba Mandateri kwirinda ko Leta ikomeza gutsindwa mu manza bitewe n’impamvu zishobora kwirindwa.

Igihembo gito kandi kiboneka bitinze

Bamwe mu bashinzwe kuburanira Leta, bavuga ko bahembwa make kandi agatinda kubageraho ugereranyije n’igihe abikorera ku giti cyabo bayabonera n’umubare w’ayo bumvikana n’abakiriya babo.

Ubuke bw’umushahara ugereranyije n’igihembo cy’abavoka baba bahanganye mu manza n’igihe bifata ngo bahembwe, bituma ba Mandateri bamwe bagira umwete muke mu kuburanira leta ugereranyije n’abavoka bigenga baba bashaka kwigaragaza ngo imanza batsinze zibafashe kunguka abandi bakiliya.

Ibyo kandi ngo binajyana no kudashyira umutima ku kazi ngo Leta bayiburanire nk’ababurana ibyabo bwite, dore ko uburanye agatsindwa n’ubundi yongera agahabwa izindi manza, cyane ko nta kindi gihano uretse guhabwa amanota make mu myitwarire mu kazi rimwe na rimwe bitanamubuza kuzamurwa mu ntera.

Inkuru bifitanye isano: Minisitiri Busingye yakebuye abanyamategeko ba Leta ku manza igitsindwa

Minisitiri w'Ubutabera, Johnston Busingye aganira n'itangazamakuru
Abadepite batunze agatoki ababuranira Leta kubera umubare w’imanza itsindwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved