Abadepite batumije ibigo 10 bishinjwa imicungire mibi y’umutungo wa leta

Yanditswe na Rabbi Malo Umucunguzi
Kuya 22 Nzeri 2017 saa 06:44
Yasuwe :
1 0

Perezida wa Komisiyo y’Inteko Ishinga Amategeko ishinzwe kugenzura imikoreshereze y’imari n’umutungo bya Leta (PAC), Depite Nkusi Juvenal, yatangaje ko guhera kuwa Mbere w’icyumweru gitaha bazatangira kumva ibisobanuro by’ibigo 10 bya leta n’uturere 12 ku makosa yagaragaye mu ikoreshwa ry’umutungo mu mwaka ushize w’ingengo y’imari.

Raporo y’Umugenzuzi Mukuru w’Imari ya Leta yamuritswe ku wa 3 Gicurasi 2017 igaragaza ko mu umwaka warangiye ku wa 30 Kamena 2016, miliyari 1.6 Frw yasesaguwe, miliyoni 590 Frw zigasohoka nta nyandiko zitanga uburenganzira, miliyoni 906 Frw zikanyerezwa naho miliyari 1.5Frw muri miliyari 1.6Frw zagaragajwe mu maraporo ashize zitaragaruzwa.

Icyo gihe Umugenzuzi Mukuru w’Imari ya Leta, Obadiah Biraro yagaragaje ko ko mu mwaka ushize w’ingengo y’imari, muri raporo 147 zakozwe, izidafite inenge zavuye kuri 78 (50%) zikagera kuri 88 (60%).

Ibigo byahamagajwe ni igishinzwe amazi, isuku n’isukura, WASAC; igishinzwe kongera amashanyarazi, EDCL n’igishinzwe kuyakwirakwiza, EUCL; Ikigo gishinzwe iterambere ry’Ubwikorezi, RTDA; Ikigo cy’Igihugu cy’iterambere (RDB) Kaminuza y’u Rwanda; Ikigo gishinzwe uburezi, REB; igishinzwe ubumenyingiro, WDA ; igishinzwe ubuzima, RBC n’igishinzwe ubuhinzi, RAB.

DEpite Nkusi yagize ati “Ibyo nibyo tuzahamagara mu ruhame. Ariko n’ibyahawe amanota agayitse ndetse n’agayitse bukeya, twarabyandikiye kugira ngo bizadusubize mu nyandiko icyo bakoze kuri buri kibazo Umugenzuzi mukuru w’Imari ya Leta yagize mu micungire y’ibigo bayobora.”

Visi Perezida wa PAC, Depite Karenzi Théoneste, yavuze ko harebwe ahanini ibigo bigize ishoramari rya leta bikaba aribyo bitumizwa.

Yagize ati “Uku guhamagarwa mu ruhame ni ku bikorwa bifite uruhare runini ku iterambere, ibikorwa bijyanye n’ibikorwa remezo, imihanda, amashanyarazi, amazi, bifite uruhare ku bukungu no ku iterambere ry’igihugu.”

Yakomeje agira ati “Ikindi twarebye ibikorwa bifata ingengo y’imari nini ya leta, ibigo nka WASAC, REG, uzi amafaranga menshi bifata muri ibyo bikorwa by’iterambere. WDA mu birebana n’uburezi, izo nzego zose. Uretse n’ibyo by’iterambere, ni n’ibikorwa biri mu mibereho myiza y’abaturage.”

Depite Nkusi yavuze ko mu minsi ishize bamanutse bakajya kureba uko ibintu bihagaze ku bigo birebwa n’ikibazo, hagamijwe kumva neza uko biteye ngo bazabone uko basobanuza neza inzego zibishinzwe.

Yavuze ko mu myaka ishize bakurikirana ikoreshwa ry’umutungo mu bigo bya leta hari ibigenda bikosoka kuko nibura kugeza uyu munsi hari aho byoroha kugaragara uwaba yaragize uruhare mu ikosa cyangwa icyaha runaka.

Gusa ngo mu kubakurikirana hagiye habamo ikibazo kuko imiterere y’igitabo cy’amategeko ahana hari aho wasangaga umuntu akoresha nabi ibya rubanda ariko bikitwa ikosa agahabwa igihano cy’ubutegetsi, ku buryo hari icyizere ko igitabo gishya cy’amategeko ahana cyazazana igisubizo.

Mu turere twahamagajwe harimo Gatsibo, Gasabo, Bugesera, Rusizi, Ngororero, Nyabihu, Rulindo, Gicumbi, Nyamagabe, Ruhango Rutsiro na Nyarugenge, ahanini twahamagajwe kubera amakoza mu masoko n’ubwubatsi bw’imishinga y’ibikorwaremezo.

Ibi bigo bigiye guhamagazwa mu gihe hari abayobozi bamwe bamaze gutabwa muri yombi bashinjwa gukoresha nabi umutungo wa leta, barimo James Sano wayoboraga WASAC na Emmanuel Kamanzi wayoboraga EDCL.

Ubushinjacyaha nabwo buheruka gutangaza ko buri gukora iperereza ku bigo bisaga 30 ku ikoreshwa ry’umutungo wa leta na ruswa, byonge hagenda hatangazwa ko nta muntu uru hejuru y’amategeko, n’abitwa “ibifi binini” bazagaragarwaho ibyaha bazatabwa muri yombi.

Perezida wa Komisiyo y’Inteko Ishinga Amategeko ishinzwe kugenzura imikoreshereze y'imari n'umutungo bya Leta (PAC), Depite Nkusi Juvenal
Visi Perezida wa PAC, Depite Karenzi Théoneste

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza