Kwamamaza

Abadepite batoye itegeko ryemerera RGB kwigenga ikava mu maboko ya MINALOC

Yanditswe kuya 17-11-2016 saa 07:23' na Philbert Hagengimana


Abadepite batoye itegeko rishya rishyiraho Urwego rw’Igihugu rw’Imiyoborere (RGB) rikanagena inshingano, ububasha, imiterere n’imikorere byarwo, aho ryarwongereye ububasha bwo kwigenga no guteza imbere amahame y’imiyoborere myiza mu nzego za Leta n’iz’abikorera.

Mbere yo gutora itegeko rishyiraho RGB ingingo ku yindi, abadepite babanje kugezwaho raporo ya Komisiyo yari yahawe umushinga waryo ngo iwukorere ubugororangingo maze bayemeza bose.

Iyo Komisiyo yibukije abadepite ko RGB yashyizweho mu rwego rwo kwimakaza imiyoborere myiza mu nzego zose zigize ubuzima bw’igihugu, ari na yo mpamvu yahawe imiterere yo kuba urwego rwihariye rukora mu bwisanzure, bityo raporo na gahunda y’ibikorwa byayo bikajya bitangwa mu biro by’Umukuru w’Igihugu no mu Nteko Ishinga Amategeko Imitwe yombi.

Abadepite bibukijwe kandi ko iryo tegeko nibaritora na Perezida wa Repubulika akarishyiraho umukono, rizafasha RGB kurushaho kugirirwa icyizere n’abafatanyabikorwa ndetse n’abayigana bayisaba serivisi no gutuma imirimo ikora n’ibiva mu bushakashatsi ishyira ku mugaragaro, birushaho kwizerwa no guhabwa agaciro mu Rwanda no mu mahanga.

Inteko rusange y’Abadepite yari iyobowe na Depite Uwimanimpaye Jeanne d’Arc, Visi Perezida ushinzwe ibikorwa by’Inteko Ishinga Amategeko, Umutwe w’Abadepite yakurikijeho gutora itegeko ingingo ku yindi bahereye ku irangashingiro.

Ingingo zimwe na zimwe zagiye zitangwaho ibitekerezo, ndetse zimwe zigasabirwa gukosorwa mu myandikire. Abadepite basabye ko izifite inenge n’ubwo zatowe zikwiye kunozwa mbere y’uko iryo tegeko rishyikirizwa Perezida wa Repubulika.

Imwe muri izo ngingo zagaragajwe ni iya 31, aho Depite Mukayuhi yahise ayisabaho ijambo akabaza niba RGB izacuruza, ati “Iyi nguzanyo sinumva icyo igamije, niba ari uguteza imbere ubushakashatsi, simbizi nagira ngo bansobanurire.”

Umuyobozi wa Komisiyo yari ishinzwe gusesengura no gukora ubugororangingo bw’iryo tegeko yabwiye abadepite ko kuba RGB yakwemererwa kwaka inguzanyo atari bishya.

Ati “No mu yandi mategeko bisanzwe birimo ariko n’uru ni urwego rwigenga, bityo rushobora kuba rwasaba inguzanyo ku mpamvu nyinshi zitandukanye kugira ngo rurusheho gukora neza, icyangombwa ni uko ziba zemejwe na Minisiteri ibifite mu nshingano.”

N’ubwo iyi ngingo yatowe n’abadepite 47 ntihagire uyanga mu gihe imfabusa zabaye eshatu, Depite Mukayuhi ntiyanyuzwe n’igisubizo yahawe, kuko iyo ngingo itagaragaza icyo izo nguzanyo zizajya zikoreshwa n’uburyo zizajya zishyurwa.

Depite Bamporiki yavuze ko akurikije igisubizo cyahawe Depite Mukayuhi, yumvise ako gace n’ubwo katowe nta gishya kazanye, ahubwo kagiriyemo gusa ko bisanzwe, bityo ngo iyo biba bidasanzwe ahubwo ni bwo byari kuba byiza kugira ngo bumve umumaro wako muri iryo tegeko.

Yagize ati “Ariko kuba ikigo gishobora gufata inguzanyo kitazacuruza, mwabonye inshingano twagihaye muri iri tegeko, nta n’imwe ishobora kubyara amafaranga yakwishyura inguzanyo. Rero ikigo kidacuruza, dutoreye guhabwa inguzanyo kandi twagihaye ingengo y’imari y’igihugu, twacyemereye kubona inkunga, ntacyo kitabonye, kigiye no mu nguzanyo. Izishyurwa ite?”

Yavuze ko ako gace kavuyemo ntacyo byatwara n’ubwo iyo ngingo yamaze gutorwa.

Zimwe mu nshingano iryo tegeko riha RGB harimo ububasha bwo kugenzura no guteza imbere amahame y’imiyoborere myiza mu nzego za Leta n’iz’abikorera, gukora ubushakashatsi ku birebana n’Imiyoborere mu Rwanda no kubumenyekanisha.

Harimo kandi kwandika Imitwe ya Politiki no gukurikirana imikorere yayo hakurikijwe amategeko abigenga, kwandika Imiryango Nyarwanda itari iya Leta (NGOs), imiryango ishingiye ku myemerere n’imiryango mvamahanga itari iya Leta.

Iryo tegeko rigira RGB urwego rumwe rufite ububasha butuma rushobora gukurikiranira hafi imikorere y’inzego za sosiyete sivile, itangazamakuru no kunoza imikoranire n’inzego za Leta ndetse n’abandi bafatanyabikorwa.

Urwo rwego kandi ruzajya rutanga uburenganzira bw’ibanze, runakurikirane inyigo n’ubushakashatsi bikorerwa mu Rwanda ku miyoborere n’uburyo bw’umwimerere Nyarwanda bwo kwishakamo ibisubizo, byaba bikorwa n’Umunyarwanda cyangwa n’umunyamahanga.

RGB ifite kandi inshingano zo gukurikirana ishyirwa mu bikorwa rya politiki yo kwegereza ubushobozi n’ubuyobozi abaturage, no gutanga inama ku bikorwa byo kongerera ubushobozi inzego z’ibanze.

Abadepite batoye itegeko rishya rishyiraho Urwego rw’Igihugu rw’Imiyoborere (RGB)

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved