Kwamamaza

Abadepite basabye Minisitiri w’Intebe kuvugurura ubuyobozi bwa RRA

Yanditswe kuya 3-11-2016 saa 18:04' na Philbert Hagengimana


Abadepite basabye Minisitiri w’Intebe kuvugurura ubuyobozi bw’Ikigo cy’Igihugu gishinzwe Imisoro n’Amahoro, RRA, nyuma y’aho hagaragaye ibibazo mu nama y’ubutegetsi yacyo.

Ubwo Abadepite bagezwagaho raporo ya Komisiyo ishinzwe Gukurikirana Imikoreshereze y’Imari n’Umutungo by’Igihugu (PAC), ku isesengura rya raporo y’Umugenzuzi Mukuru w’Imari ya Leta y’umwaka wa 2014/2015, ku mugoroba wo kuri uyu wa Kane tariki ya 3 Ugushyingo, ni bwo basabye iri vugurura bavuga ko mu Nama y’Ubutegetsi ya RRA harimo ibibazo by’imikoranire.

Ibi ngo byatumye habaho ibibazo birimo intege nke mu kwishyuza imisoro, abasora bamenyekanisha imisoro ariko ntibishyure, kuba ibirarane by’imisoro bitishyuzwa n’ibindi.

Depite Nkusi Juvenal, Umuyobozi wa Komisiyo ishinzwe gukurikirana imikoreshereze y’imari n’umutungo by’igihugu (PAC) yabwiye Inteko Ishinga Amategeko ko mu gusesengura raporo 159 z’umugenzuzi mukuru w’imari ya Leta mu mwaka wa 2014/2015, basanze hari ibibazo inzego n’ibigo byagenzuwe bihuriyeho.

Muri zo twavuga nk’ibyibaruramari n’imicungire mibi y’umutungo, ibibazo by’ikoranabuhanga, imyenda ya miliyari zisaga 27 Leta iberewemo n’indi y’amafaranga y’u Rwanda asaga Miliyari 12 ibereyemo abandi, hakaba n’iby’imiyoborere n’imikoranire itanoze hagati y’inzego.

Aha niho Depite Nkusi yatanze urugero rwa RRA.Yagize ati “Twabisanze cyane cyane mu bigo bya Leta, haracyagaragara imikoranire itanoze hagati y’ubuyobozi n’inama z’ubuyobozi ndetse na Minisiteri zibireberera, aho usanga inama z’ubuyobozi, mu itegeko dutora ni rwo rwego rukuru, ariko usanga rurebera. Nk’urugero, muri RRA […] ubona ko harimo ikibazo cy’imiterere yayo gituma ubwigenge bw’inama y’ubuyobozi butashobora kuboneka.”

Aha yakomeje agaragaza ko ibibazo birimo bitatuma RRA yubahiriza inshingano zayo zirimo no kugira inama Leta ku bibazo biganye na politiki y’imari.

Ibyo kandi byiyongeraho kuba muri iryo sesengura rya raporo y’umugenzuzi mukuru w’imari ya Leta, Abadepite bagize PAC barasanze 20% y’abakozi ba RRA barasezeye ku kazi ari bamwe mu bari bafite inshingano zikomeye, bakajya gukora akandi kabahemba menshi.

Depite Karenzi Theoneste yibukije ko iyo Komisiyo ishingiye ku ngingo ya 164 y’Itegeko Nshinga rya Repubulika ryo mu 2003 nk’uko ryavuguruwe mu 2015, mu gika cyayo cya 4 riteganya ko mu gihe kitarenze amezi atandatu, Inteko Ishinga Amategeko imaze gushyikirizwa raporo n’umugenzuzi mukuru w’imari ya Leta iyijyaho impaka, ikanayifataho ibyemezo bikwiye.

Yakomeje agaragariza Abadepite umushinga w’imyanzuro ari na yo yaje kwemezwa, hakaba harimo itandatu (6) igenewe Minisitiri w’Intebe, harimo ibiri irebana n’ivugurura muri RRA.

Umwanzuro wa mbere ni uwo gusaba Minisitiri w’Intebe “Kuvugurura inama y’ubuyobozi bw’ikigo cy’igihugu gishinzwe imisoro n’amahoro, ku buryo igira ubwigenge n’ubwisanzure mu gufata ibyemezo”. Harimo kandi usaba “kuvugurura itegeko rishyiraho Ikigo cy’Igihugu cy’Imisoro n’Amahoro, rikagena imiterere inshingano n’imikorere byacyo mu rwego rwo gufasha icyo kigo kurushaho gukora mu buryo bwa kinyamwuga, no gushyiraho uburyo bwo gutuma kidakomeza gutakaza abakozi babishoboye.”

RRA yitabye PAC kuwa 5 Ukwakira, yisobanura ku makosa yagaragaye muri raporo y’Umugenzuzi Mukuru w’Imari ya Leta mu mwaka wa 2014/2015, aho ibisobanuro yatanze na byo byagendeweho mu isesengura ryavuyemo imyanzuro yo kuyisabira ivugururwa ry’Ubuyobozi n’Itegeko riyigenga.

Depite Nkusi Juvenal, Umuyobozi wa Komisiyo ishinzwe gukurikirana imikoreshereze y’imari n’umutungo by’igihugu (PAC)

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved