Kwamamaza

Abadepite basabye ko ihungabana riterwa na Jenoside mu bakiri bato ryitabwaho byihariye

Yanditswe kuya 28-10-2016 saa 07:28' na Rabbi Malo Umucunguzi


Komisiyo y’Igihugu yo kurwanya Jenoside (CNLG) ivuga ko mu bihe byo kwibuka abazize Jenoside usanga abakiri bato aribo biganje mu bahura n’ikibazo cy’ihungabana, nyamara harimo abatarabonye Jenoside cyangwa se abo yabaye bafite imyaka mike cyane.

Iyi komisiyo igaragaza ko nko mu bihe byo kwibuka ku nshuro ya 22 Jenoside yakorewe abatutsi, abantu bagera ku 1734 bahuye n’ihungabana, umubare munini ukaba ari ab’igitsina gore ndetse biganje hagati y’imyaka 25-35.

Perezida wa CNLG, Dr John Rutayisire, yavuze ko ubushakashatsi bwerekanye ko ihungabana rishobora kuba rihererekanywa mu bisekuru.

Ati “Niyo mpamvu hagomba gukomeza gushyirwa imbaraga mu kubaka umuryango. Ibyo rero ni ngombwa kuko biragaragara ko niba igisekuru kimwe gifite ikibazo, n’ingufu zigomba kuba nyinshi naho ubundi byazagenda bihererekanwa igihe kikaba cyinshi.’’

Depite Nikuze yavuze ko nk’uko byagiye bigaragazwa n’abahanga mu mitekerereze ya muntu, uko imyaka ishira, bidasobanura ko ihungabana rigenda rishira.

Ati “Guhungabana ni ibintu uko imyaka igenda ishira byagombye kwiyongera. Impamvu abana bahungabana ni uko baba batangiye gutekereza, batangiye kuba bakuru. Byari bikwiye ko habaho ingamba kuko guhungabana bishobora gutera uburwayi bwo mu mutwe.’’

CNLG ivuga ko hari kunozwa uburyo bwo gushyira abaganga b’ihungabana mu bigo nderabuzima n’ibitaro, hagamijwe kwita ku bafite ibyo bibazo.

Dr. Rutayisire yavuze ko impamvu usanga ihungabana riri mu bakiri hagati y’imyaka 25-35, bituruka ahanini ku bushobozi buke baba bifitemo bwo kwihagararaho, bitandukanye no ku bantu bakuru.

Ubwo CNLG yagaragarizaga Inteko Ishinga Amategeko imitwe yombi, ibikorwa byayo mu kurwanya jenoside, mu mwaka ushize hamwe n’ibiteganywa mu mwaka w’ingengo y’imari uri imbere, Rutayisire yavuze ko bakomeza gukora ibishoboka ngo urwibutso rwa Jenoside rwa Kigali, urwa Murambi, Bisesero na Nyamata zishyirwe vuba mu murage w’isi, ariko ngo ku ruhande rw’iyi komisiyo ibyagombaga gukorwa byarakozwe.

Ati “Gusa hari aho CNLG idashobora gushyira umuvuduko ngo bikunde, kuko UNESCO igira gahunda. Igena gahunda ikabwira nk’igihugu cyangwa abandi babisabye iti nimwandike, nibwo bizagenda gutya. Nkatwe batubwiye gutegura umushinga w’uko byagenda, ariko UNESCO ivuga ko izawusuzuma muri Gashyantare 2018.’’

Iyi komisiyo ibarura ko nimura mu bice bibitse amateka ya Jenoside, mu Rwanda hari inzibutso 247 n’imva zigera ku 141.

Ikindi kiri gushyirwamo imbaraga ni ugukomeza kubika mu ikoranabuhanga amadosiye ya Gacaca, aho CNLG ivuga ko hari impapuro zisaga miliyoni 60, hakaba hakenewe miliyari 5.5 Frw kugira ngo zose zibikwe .

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved