Abadepite ba EU berekanye uruhare rwabo mu guta muri yombi abakoze Jenoside

Yanditswe na Philbert Girinema
Kuya 20 Nzeri 2016 saa 11:44
Yasuwe :
0 0

Inteko Ishinga Amategeko y’u Rwanda yasabye itsinda ry’Abadepite baturutse mu Nteko y’Umuryango w’Ubumwe bw’u Burayi muri Komisiyo Ishinzwe Uburenganzira bw’Abagore n’Uburinganire kugaragaza uruhare mu guta muri yombi abakoze Jenoside bacyidegembya mu bihugu bitandukanye.

Aba badepite baturutse mu Burayi baje kwigira ku Rwanda imiyoborere myiza iha umugore ijambo, bemeje ko u Rwanda rwateye intambwe ifatika mu gukemura ikibazo cy’uburinganire.

Perezida w’Inteko Ishinga Amategeko y’u Rwanda, Umutwe w’Abadepite , Mukabalisa Donatille avuga ko iyo abadepite nk’aba basuye u Rwanda bituma bamenya ukuri bakareka kubyumva mu itangazamakuru gusa, ibintu ngo bishobora no gutuma bahindura imyumvire.

Yagize ati “Icyo twifuza ni uko bamenya amateka y’igihugu cyacu, aho cyavuye n’uburyo cyiyubatse ndetse naho kigana, kugira ngo banadufashe n’ibibazo tugihura nabyo cyane cyane iby’abakoze jenoside bakidegembya mu bihugu byabo.”

Mukabalisa avuga ko aba badepite bagaragaje kwishimira aho u Rwanda rugeze mu iterambere kandi rubifashijwemo n’inzego zose yaba abagore ndetse n’abagabo.

Agaruka ku kibazo cyabahekuye u Rwanda bakidegembya i Burayi ntibafatwe, Depite Kalisa Evaliste yabajije aba badepite uruhare rwabo muri iki kibazo.

Ati “Ndashaka kubabaza nk’abagize Inteko Ishinga Amategeko y’Ubumwe bw’i Burayi, mukora iki kuri icyo kibazo cy’ingenzi? Yaba ku rwego rw’uburenganzira bwa muntu no ku mategeko mpuzamahanga, ni iki mugikoraho? Nababazaga nk’abantu mwarenze kuba igihugu mukaba Inteko Ishinga Amategeko niba hari uburyo buhari mukoresha mu gukurikirana abo bantu n’ibihugu barimo.”

Depite Kalisa yanababajije icyo n’inteko yabo muri rusange bakora mu gufasha guhangana n’ihakana n’ipfobya rikunze kugaragara mu bitangazamakuru byo mu bihugu byabo.

Umwe muri aba badepite ba EU, Depite J.Ward yasobanuye bakora ibikorwa bitandukanye birimo n’urugendo rugamije kumenyekanisha Jenoside yabaye mu Rwanda n’ipfobywa ryayo.

Naho Iratxe Garcia Perez waje ayoboye iri tsinda we yavuze ko ikibazo cy’abakoze Jenoside bakidegembya mu bihugu by’uburayi cyakemurwa n’ibihugu ubwabyo, ngo inteko yaje ahagarariye yo ikora akazi k’ubuvugizi no kugaragaza uruhande ihagazemo ariko guta muri yombi aba bahekuye u Rwanda ngo bisaba icyemezo cya buri gihugu ukwacyo.

Yagize ati “Ubutabera buba buri mu biganza bya buri gihugu mu bigize Umuryango w’Ubumwe bw’i Burayi, mu kuri Inteko Ishinga Amategeko ya EU yemera ko mu Rwanda habaye Jenoside, icyo tuvuga ubu ni uko turi gushakisha inzira yo kugarura amahoro, gusa ni urugendo rurerure.”

Icyakora aba badepite bemeza ko u Rwanda ari igiHugu gifite gahunda y’imiyoborere myiza, gahunda idaheza umugore n’undi wese. Ibi ngo byabashimishije kuko n’uruzinduko rwabo rwari rugamije kwigira ku Rwanda uko umugore yakwinjizwa mu bikorwa bya buri sosiyete.

Garcia yagize ati “ Twaganiriye n’ihuriro ry’abagore bari mu Nteko Ishinga Amategeko y’u Rwanda ndetse na Komisiyo ya Politiki n’Iterambere ry’Uburinganire mu nteko, batweretse uko mu Rwanda abagore bari mu bikorwa bitandukanye bya Sosiyete .”

Komisiyo ya Politiki n’Iterambere ry’Umugore yasobanuriye aba banyaburayi uko Inteko Ishinga Amategeko n’izindi nzego zitandukanye harimo n’izifata ibyemezo ubu ziri ku kigero cyiza mu guhagararirwa n’abagore.

Inteko Ishinga Amategeko y’u Rwanda yatangiye mu mwaka wa 1961 nyuma y’uko igihugu kibonye ubwigenge, icyo gihe iyi nteko yari irimo umugore umwe mu badepite 42, ni ukuvuga 2.3%. Kuri ubu uburinganire mu badepite 80 bayigize, 51 ni abagore bivuze ko noneho 64% ari abagore.

Iratxe Garacia Perez, uhagarariye itsinda ry'abadepite bagize Inteko Ishinga Amategeko y’Ibihugu bigize Umuryango w’Ubumwe bw’u Burayi
J. Ward, umwe mu badepite baturutse mu Nteko Ishinga Amategeko y'Umuryango w'Ubumwe bw'i Burayi
Abadepite ba EU basuhuzanya n'abagize Inteko Ishinga Amategeko mu Rwanda
Perezida w'Inteko Ishinga Amategeko y'u Rwanda, Umutwe w'Abadepite, Mukabalisa Donatille
Abadepite baturutse ku mugabane w'i Burayi bishimiye urwego uburinganire bugezeho mu Rwanda
Nyuma yo gusobanurirwa imikorere y'Inteko Ishinga Amategeko mu Rwanda bafashe ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244