Kwamamaza

Abadepite ba EU bagiye kwigira uburinganire ku Rwanda

Yanditswe kuya 30-08-2016 saa 15:29' na Ezechiel Mbananabo


U Rwanda rumaze kuba indashyikirwa ku Isi mu guteza imbere uburinganire nk’uko bigaragazwa na raporo zitandukanye zirimo nka ‘The Global Gender Gap Index’ yamuritswe mu Ugushyingo 2015, yarushyize ku mwanya wa mbere muri Afurika nk’igihugu cyahize ibindi mu kwimakaza no guteza imbere uburinganire, ku Isi ruza kuwa Gatandatu.

Ni nacyo gihugu cyahize ibindi muri Afurika mu kuzamura umubare w’abagore bafite akazi, gutanga amahirwe angana hagati y’abagore n’abagabo mu burezi n’ubuvuzi nkuko byagaragajwe na The Global Gender Gap Index yo mu 2015.

Ibi nibyo bitumye Abadepite umunani bo mu Inteko Ishinga Amategeko y’Umuryango w’Ubumwe bw’u Burayi (EU) babarizwa muri Komisiyo y’Uburenganzira bw’abagore n’uburinganire bazasura u Rwanda muri Nzeli mu rwego rwo kureba uburyo inzego zitandukanye mu Rwanda zikorana mu guteza imbere uburinganire, akazi gakomeye u Rwanda rwakoze mu bijyanye n’uburinganire n’imishinga itandukanye ihari ijyanye n’uburinganire.

Kuri uyu wa Kabiri, Ambasaderi w’Umuryango w’Ubumwe bw’u Burayi mu Rwanda, Micheal Ryan yahuye na Perezida w’Inteko Ishinga Amategeko y’u Rwanda Umutwe w’Abadepite, Mukabalisa Donatille mu biganiro byari bigamije gutegura urwo ruzinduko.

Nyuma y’ibyo biganiro, Amb. Micheal yabwiye itangazamakuru ko aba badepite bazagirana ibiganiro n’inzego zitandukanye ngo bamenye uko zikorana mu guteza imbere uburinganire, imishinga ihari yo guteza imbere uburinganire n’ibanga u Rwanda rwakoresheje mu guteza imbere uburinganire.

Yagize ati “Ni amahirwe akomeye kubona abadepite ba EU bazaganira n’ab’u Rwanda bungurana ibitekerezo ku bijyanye n’uburinganire, ndetse bakanigira ku Rwanda kuko ntekereza ko ruri mu bihugu bihiga ibindi mu kugira umubare munini w’abagore mu Inteko Ishinga Amategeko no mu nzego zikomeye.”

Yakomeje agira ati “Bazareba uko sosiyete sivile,imiryango itegamiye kuri Leta n’andi matsinda bakorana mu guteza imbere uburinganire n’uburenganzira bw’ibitsina byombi. Bazakorana ibiganiro n’abantu batandukanye”

Kugeza ubu ku Isi u Rwanda nirwo rufite umubare munini w’abagore bari mu Inteko Ishinga Amategeko kuko bangana 63,8%.

Ikindi kandi icyegeranyo ku miyoborere muri Afurika ‘Mo Ibrahim Index of African Governance’ cyo mu 2015 giherutse gushyira u Rwanda ku mwanya wa kabiri n’amanota 87,6% nyuma ya Seychelles mu guteza imbere uburinganire muri Afurika.

Perezida w’Inteko Ishinga Amategeko, Umutwe w’Abadepite, Donatille Mukabalisa, yavuze ko kuba aba badepite b’i Burayi bagiye kuza kwigira ku Rwanda bishimingira umubano mwiza Inteko Ishinga Amategeko y’u Rwanda isanganywe n’izindi nteko.

Yagize ati “Uru ruzinduko rugaragaza umubano mwiza Inteko Ishinga Amategeko y’u Rwanda isanganywe n’izindi nteko z’ibindi bihugu.Biba ari byiza kuko iyo dukomeje kugira umubano mwiza nk’inteko zishinga amategeko binakomeza gushimangira umubano mwiza dufitanye n’ibihugu by’izo nteko.”

Biteganyijwe ko aba badepite bazagera mu Rwanda tariki ya 20 Nzeli bagasoza uruzinduko rwabo tariki ya 23.

Ambasaderi w’Umuryango w’Ubumwe bw’u Burayi mu Rwanda, Micheal Ryan
Perezida w’Inteko Ishinga Amategeko, Umutwe w’Abadepite, Donatille Mukabalisa

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved