Kwamamaza

Abadepite ba EU baba barangiwe gusura Ingabire Victoire?

Yanditswe kuya 22-09-2016 saa 16:00' na Rabbi Malo Umucunguzi


Itsinda ry’Abadepite bagize Komisiyo y’Uburenganzira bw’Abagore n’Uburinganire mu Nteko Ishinga Amategeko y’Umuryango w’Ubumwe bw’u Burayi bavuze ko mu ruzinduko rw’iminsi itatu barimo mu Rwanda, bagerageje gusura Ingabire Victoire ufungiye muri Gereza ya Nyarugenge (izwi nka 1930) ariko ngo ntibyabakundira.

Iri tsinda ry’abadepite umunani rivuga ko u Rwanda rukataje mu guteza imbere umugore, ubu rukaba ari urwa mbere mu kugira abagore benshi mu Nteko Ishinga Amategeko, ndetse abenshi babashije guhura n’aba badepite.

Basuye urwibutso rwa Jenoside rwa Kigali n’izindi nzego zinyuranye, ndetse bavuga ko banyuzwe n’imikorere y’ikigo Isange One Stop Center gitanga ubufasha ku bagore bahohotewe, ikigo basanze mu bitaro bya Kacyiru.

Mu kiganiro bagiranye n’Abanyamakuru kuri uyu wa Kane tariki ya 22 Nzeri 2016, Iratxe Garcia Perez waje ayoboye iri tsinda yavuze ko bashimishijwe cyane no kuba EU itera inkunga imishinga itandukanye mu Rwanda mu nzego z’imiyoborere no kwegerezwa ubutabera, bikaba bitanga umusaruro haba ku bagore ndetse n’abagabo.

Gusa yakomeje agira ati “Umuryango w’Ubumwe bw’u Burayi ushingiye ku ngingo zo kubaha agaciro ka muntu, ubwisanzure, demokarasi, uburinganire, kugendera ku mategeko no kubahiriza uburenganzira bwa muntu.’’

Yashimangiye ko izo ngingo arizo EU ishyira imbere no mu mibanire n’ibindi bihugu, akomoza ku mwanzuro wo kuwa 23 Gicurasi 2013 wafashwe n’inteko ahagarariye, wamaganaga ifungwa rya Ingabire wakatiwe nyuma yo guhamwa n’ibyaha, ariko bo bakabihuza n’impamvu za politiki.

Ati “Twashatse guhura na Victoria kuko twashakaga kumenya uko ubuzima bumeze muri gereza, dufite amakuru ku kuntu ikibazo kimeze kandi nk’Inteko Ishinga Amategeko y’Ubumwe bw’u Burayi twashakaga gufashwa guhura nawe ngo tumenye uko uburenganzira bwa muntu bumeze mu Rwanda, twifuzaga kugirana iyo nama.’’

‘‘Nk’uko nabisobanuye kuri iyi nshuro ntibyakunze, ariko twumva ari ngombwa kubona umwanya wo kuganira n’abantu ku burenganzira bwa muntu. Birashoboka ko abantu bose batabibona kimwe, turashaka kumva uburyo butandukanye abantu babibonamo ngo tubone neza uko bihagaze. Gusa turizera ko ubutaha bizashoboka ko tubonana na Victoria.”

Garcia yabajijwe impamvu yatumye batabonana na Ingabire, asubiza ati ‘‘Twasabye ko twabasha gusura Victoire muri gereza, ubuyobozi ntibwabyemeza. Nta burenganzira bw’ubuyobozi twabonye bwo kubonana nawe.”

Gusa ubusabe bw’aba badepite, Urwego rw’Igihugu rushinzwe Imfungwa n’Abagororwa, RCS, ruvuga ko ntabwo rwigeze rwakira basaba guhura na Ingabire, kuko batari kuba ari aba mbere bemererewe gusura umuntu muri Gereza ya Nyarugenge.

Umuvugizi wa RCS, CIP Sengabo Hillary, yabwiye IGIHE ko hari umuntu muri Minisiteri y’Ububanyi n’Amahanga ushinzwe abantu b’abadipolomate bashaka gusura gereza, ati “iyo bagezeyo ni nanjye bakunda guhamagara.”

“Abo ntabo rwose, twaba twangira iki? Ntabwo banabisabye. Mwagombye kubasaba ikimenyetso gifatika cy’uko bangiwe, ntabwo bigeze bandika, nta na email.”

CIP Sengabo yatanze ingero z’Abaholandi baherutse kumusura kandi nabo babisabye bakabihabwa, ndetse yongeraho ko akunze gusurwa n’abantu bo hanze gusa kandi inzego zibishinzwe zikabafasha. Yanatanze ingero kuri Ambasaderi wo muri Guinea wasuye abantu baho bahafungiye kimwe na Ambasade ya Uganda.

Ati “Abantu bose bashaka gusura imfungwa ari abanyamahanga baca muri Minisiteri y’Ububanyi n’Amahanga duhita tubikora ako kanya. Hari abo mu Buholamdi baherutse kumusura ni izo nzira banyuzemo. Akunze gusurwa n’abantu bo hanze gusa usibye nawe n’abandi turabafasha.”

Ingabire Victoire afungiwe muri “1930” kuva mu 2013, ubwo Urukiko rw’Ikirenga rwamukatiraga gufungwa imyaka 15, nyuma yo guhamywa ibyaha birimo kugambanira igihugu agamije kukibuza umudendezo no kurema umutwe w’abagizi ba nabi.

Hari itsinda rishinzwe gusemura
Iratxe Garcia yavuze ko bagerageje gusura Ingabire ariko ntibyakunda
Michael Ryan ukuriye Komisiyo y'Umuryango w’Ubumwe bw’u Burayi mu Rwanda
Bamwe mu badepite bagize Komisiyo y’Uburenganzira bw’Abagore n’Uburinganire mu Nteko Ishinga Amategeko y’Umuryango w’Ubumwe bw’u Burayi bari mu rugendo rw'iminsi itatu mu Rwanda
Iratxe Garcia Perez waje ayoboye iri tsinda
Michael Ryan ukuriye Komisiyo y'Umuryango w’Ubumwe bw’u Burayi mu Rwanda
Umunyamakuru Arnold Kwizera abaza ikibazo
Iratxe Garcia Perez waje asubiza ibibazo by'abanyamakuru
Aba badepite bashimye gahunda zitandukanye zigenerwa abagore mu Rwanda

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved