Abacuruzi barindwi bafashwe burije ibiciro mu buryo bunyuranyije n’amategeko bacibwa miliyoni 4Frw

Yanditswe na Evariste Nsengimana
Kuya 17 Kamena 2019 saa 07:57
Yasuwe :
0 0

Minisiteri y’Ubucuruzi n’Inganda (Minicom), yatangaje ko abacuruzi biha ibyo kongera ibiciro mu buryo bunyuranyije n’amategeko bashaka indonke batazihanganirwa ndetse ko mu mezi atandatu ashize hari barindwi babiciriwe amande ya miliyoni hafi 4Frw.

Byagarutsweho na Minisitiri w’Ubucuruzi n’inganda, Soraya Hakuziyaremye, mu kiganiro yagiranye n’abanyamakuru kuri uyu wa Mbere cyibanze ku kwemerera u Rwanda kwinjira mu muryango mpuzamahanga w’ubufatanye mu bukungu (OECD) n’ishusho y’ubucuruzi bw’imbere mu gihugu.

Minisitiri Hakuziyaremye yasobanuye ko kuva mu minsi ishize hari ibyagiye bivugwa ko abacuruzi bamwe na bamwe biha kongera ibiciro by’ibicuruzwa mu buryo bunyuranije n’amategeko, bagamije gushaka indonke muri rubanda.

Nyuma ngo Minicom yahise itangiza ubugenzuzi bugamije kureba abo bongera ibiciro, ikibibatera, kubibutsa inshingano zabo no gufatira ibihano abarenga amabwirizwa yashyizweho agenga isoko ry’imbere mu gihugu.

Mu baganirijwe harimo abafite inganda zikora n’abacuruzi ba Sima, isukari n’ibindi bikomoka ku buhinzi, byagiye bigaragara ko abacuruzi bashyiraho ibiciro bihanitse nta mpamvu.

Ati “Mu bucuruzi twagenzuye, hari barindwi bari bafashwe bagurisha ku biciro bituzuye, bakaba baraciwe amande agera kuri miliyoni zenda kugera kuri enye z’amafaranga y’u Rwanda kandi iryo genzura rikaba rizakomeza kugira ngo dukomeze kureba ko ibiciro biri ku isoko ryacu bijyanye n’uko ibicuruzwa bihagaze.”

Minisitiri Hakuziyaremye ntiyasobanuye abo bacuruzi abo aribo n’aho bafatiwe.

Yavuze ko Minisiteri ayobora ikomeza no gushishikariza no gufasha abanyenganda kongera ubwinshi n’ubwiza bw’ibicuruzwa kugira ngo ntihagire aho bibura ngo babyuririreho bongera ibiciro.

Minisitiri Hakuziyaremye yasobanuye ko ibiciro bizamutse kubera ko byabuze ku isoko cyangwa ababishaka ari benshi ugereranyije n’ibihari nta kibazo gikomeye cyaba kirimo.

Ati “Aho tubona ikibazo n’aho abantu bongeza ibiciro mu buryo budafitiwe ibisobanuro ku buryo hari nubwo ibyo bicuruzwa biba bihari ahubwo ugasanga ari abashaka kubyungukiramo.”

Yavuze ko ingamba zihari ari ugukomeza ubugenzuzi, gusaba abaturage gutanga amakuru y’aho babonye buriza ibiciro ku buryo buhanitse kubivuga bikagenzurwa niba bifite ishingiro.

Si ubwa mbere mu Rwanda bivuzwe ko aburiza ibiciro uko bishakiye ibyo bakora ari amakosa. Umwaka ishize abacuruzi b’ibirayi bavuzweho kuriza ibiciro uko bishakiye, ndetse bashyirirwaho ibiciro ntarengwa.

Icyo gihe Minicom yibukije ko uzafatwa anyuranya n’ibyashyizweho azahanwa hashingiwe ku biteganywa n’itegeko n° 15/2001 ritunganya ubucuruzi bw’imbere mu gihugu ndetse n’itegeko n° 36/2012 rigenga ihiganwa mu bucuruzi no kurengera abaguzi.

Minisitiri Hakuziyaremye yavuze ko ubugenzuzi bwo gushakisha no gucyaha aburiza ibiciro uko bishakiye buzakomeza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza