Ababyeyi bashyiriweho ikoranabuhanga mu gukurikirana abana babo ku mashuri

Yanditswe na Kanamugire Emmanuel
Kuya 10 Nzeri 2016 saa 06:28
Yasuwe : XX
0

Olivier Karasira watangije uburyo bw’ikoranabuhanga bufasha ababyeyi gukurukirana imibereho, ubuzima n’imyitwarire y’abana babo ku mashuri hakoreshejwe telefoni igendanwa arabakangurira kubishyiramo imbaraga.

Ubwo yamurikaga iryo koranabuhanga (Software) mu nama y’ababyeyi barera ku ishuri ryisumbuye rya Lycée Notre Dame de Cîteaux, Olivier Karasira watangije Smart Initiative ari nayo ifite uwo mushinga, yavuze ko atumva impamvu ababyeyi batitabira gahunda zabafasha gukurikirana abana babo ku mashuri.

Yagize ati “ Iyi ni gahunda ifasha ababyeyi kumenya uko umwana ahagaze ku ishuri, umubyeyi akamukurikirana atiriwe ava mu rugo, kandi akoresheje telefoni ye igendanwa.”

Ibi yabihuje n’Umuyobozi ushinzwe uburezi mu murenge wa Nyarugenge, Daniel wagaragaje ko impamvu nyamukuru ituma abana baba ibirara, ndetse bakiroha mu ngeso mbi zirimo izo kunywa ibiyobyabwenge ari uko bajya ku mashuri ariko ababyeyi babo ntibabakurikirane ngo bamenye niba bagezeyo.

Yagize ati “ Nk’ubu umwana akajya ku ishuri umubyeyi ntamenye niba yagezeyo, niba yiga, cyangwa atiga. Iyi gahunda babashyiriyeho izabafasha gukurikirana niba abana banyu biga, kandi ni umurongo mwiza wa Leta y’u Rwanda wo gukoresha ikoranabuhanga mu mashuri.”

Iyi gahunda yatangijwe na Smart Initiative iyita Smart parents, ikurikirana umwana mu buryo butandatu. Burimo kumenya niba yitabiriye ishuri, kumenya igihe yagereye ku masomo, uko amerewe, isuku, no kumenya uko agira uruhare mu ishuri.

Ibi byose ngo byoherezwa muri telefoni y’umubyeyi bikamufasha kumenya uko umwana we ameze ku masomo atiriwe ajyayo.

Leta y’u Rwanda yatangije gahunda zitandukanye z’ikoranabuhanga mu mashuri mu rwego rwo kwimakaza uburezi bufite ireme.

Umuyobozi ushinzwe uburezi mu Karere ka Nyarugenge
Olivier Krasira uhagarariye Smart Initiative
Ubu buryo bw'ikoranabuhanga buhuza abarimu, ababyeyi n'abanyeshuri
Ifishi yuzuzwamo imyirondoro y'umuneshuri n'uko yitwara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE