Kwamamaza

Ababyeyi baratakambira leta ku bw’amafaranga y’ishuri yongerwa ubutitsa

Yanditswe kuya 3-10-2016 saa 11:43' na Ntakirutimana Deus


‘Uburezi ni ubuntu mu Rwanda’, iyo ni imvugo ikoreshwa hirya no hino mu Rwanda ndetse isubirwamo kenshi n’abayobozi, baba bavuga ko nta mpamvu umwana w’umunyarwanda atajya mu ishuri cyangwa se ngo arivemo kandi kwiga ari ubuntu.

Nubwo bikunze kuvugwa gutyo ariko ababyeyi bavuga ko atari ukuri ahubwo bagasaba leta y’u Rwanda ko yagira icyo ikora kuri icyo kibazo nk’uko bamwe baganiriye n’Ikinyamakuru Rwanda Today babisabye.

Umuturage witwa Ibrahim Ngaboyera utwara imodoka mu mujyi wa Kigali, afite abanyeshuri batatu biga mu mashuri abanza, amaze kubarihirira amafaranga y’ishuri asaga ibihumbi 350, nyamara ngo ntako atagize ngo abajyane mu ishuri riciriritse.

Yasabye ko leta yagira uruhare mu igenwa ry’amafaranga y’ishuri, akajyana n’Ubushakashatsi bwa kane ku mibereho y’ingo mu Rwanda n’ishusho y’impinduka mu mibereho y’Umunyarwanda (EICV 4).

Ubwo bushakashatsi bugaragaza ko urugo rumwe mu Rwanda rwishyura amafaranga y’ishuri ku mpuzandengo y’amafaranga y’u Rwanda 12,099 ku mwaka, angana na 4% y’ayo akoresha mu mwaka wose, ibintu uyu mubyeyi avuga ko bidakwiye.

Amafaranga y’ishuri ariyongera ubutitsa

Mu mashuri yisumbuye hirya no hino ngo amafaranga y’ishuri agenda yongerwa umunsi ku wundi, ibituma ababyeyi basaba leta guhagurukira icyo kibazo.

Urugero rutangwa n’urwo mu ishuri ryisumbuye Lycée Notre Dame de Cîteaux (LNDC), aho muri icyo kigo umunyeshuri waho yishyura amafaranga y’ishuri ageze ku bihumbi 80 ku gihembwe, avuye ku bihumbi 65 yishyurwaga mu 2013, mu gihe muri 2008 amafaranga y’ishuri muri iki kigo cy’Abihaye Imana yari ibihumbi 28.

Ku ruhande rw’ubuyobozi bw’iri shuri, buvuga ko ikigo gishyiraho amafaranga y’ishuri giteganya ko hashobora kuba ukwiyongera kw’ibiciro cyangwa se agaciro k’ifaranga.

Umuyobozi w’iri shuri,Sr Helena Nayituliki, agira ati “ Ishuri ryakoze impinduka ku bijyanye n’amafaranga y’ishuri tugendeye ku bikenerwa bihoraho byibura mu myaka itatu, bitewe n’ibiciro biri ku isoko ndetse n’uko ibyo abanyeshuri bakenera bigenda byiyongera. Ababyeyi ntibaragaragaza icyo kibazo kubera ko umwanzuro wose ufatwa baba bawugizemo uruhare.”

Icyakora Sr. Nayituliki avuga ko abanyeshuri biga muri iki kigo bafatwa neza kandi ibyinshi mu bikoresho abo mu bindi bigo basabwa kujyana nka matela, imyeyo, imikoropesho, amasuka n’ibindi bo babisanga mu kigo, keretse amakaye n’ibyo kuryamamo.

Yavuze ko ikibazo atari amafaranga menshi ahubwo ari icyo akoreshwa n’ibyo akemura.

Ati "Niba umwana wacu arya umugati kuva ku wa Mbere kugeza kugeza ku Cyumweru, akarya igi ku wa Kabiri,akanywa amata ku wa Kane, akarya inyama kabiri mu cyumweru, si hamwe n’aho barya akawunga kuva ku wa Mbere kugeza ku Cyumweru."

Kwiyongera kw’amafaranga y’ishuri kandi ni ikibazo kitagaragara gusa mu mashuri yo mu bice by’Umujyi kuko no hirya no hino mu byaro naho gihari.

Mu ishuri ryisumbuye rya Bigugu riherereye mu karere ka Nyaruguru, amafaranga y’ishuri ku gihembwe yabaye 63500, avuye ku bihumbi 33 muri 2010 na 22,000 muri 2007.

Nubwo ababyeyi basaba guverinoma kugira uruhare mu ikemuka ry’icyo kibazo, Umunyamabanga wa leta muri Minisiteri y’Uburezi ushinzwe amashuri abanza n’ayisumbuye, Rwamukaya Olivier, avuga ko guverinoma nta bubasha ifite mu gutegeka amashuri kugena amafaranga y’ishuri yaba ay’incuke, abanza n’ayisumbuye.

Gusa Umunyamabanga uhoraho muri Minisiteri y’Uburezi, Dr Celestin Ntivuguruzwa we yemeza ko uburezi mu Rwanda ari ubuntu, ibintu ababyeyi batari bake bamaganira kure.

Muri 2009 guverinoma y’u Rwanda yatangije gahunda y’uburezi bw’ibanze bw’imyaka icyenda(9YBE) na cumi n’ibiri(12YBE)mu rwego rwo kugeza uburezi kuri bose no kugabanya umubare w’abataga ishuri kubera amikoro make, bakavuga ko abiga muri aya mashuri bigira ubuntu.

Rwanda Today yerekana ko ishuri ry’incuke ryishyura amafaranga make muri Kigali, ari hagati y’ibihumbi 25 na 30 mu gihe iryishyura menshi ari hagati y’ibihumbi 800 na miliyoni imwe y’amafaranga y’u Rwanda.

Mu ishuri rya Lycée Notre Dame de Cîteaux havugwa iyongerwa ry'amafaranga y'ishuri

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved