Ababaruramari b’umwuga bake, intandaro yo gucunga nabi umutungo wa rubanda

Yanditswe na Iradukunda Samson
Kuya 1 Ukwakira 2018 saa 11:57
Yasuwe :
0 0

Mu gihe raporo nyinshi z’umugenzuzi w’Imari ya Leta zikunda kugaragaza amakosa mu micungire y’umutungo w’igihugu, amenshi muri aya makosa ntaterwa n’ubujura, ahubwo aturuka ku bunyamwuga buke bw’abakora ibaruramari.

Ibi ni ibyatangarijwe mu nama yahurije hamwe Urugaga rw’Ababaruramari b’umwuga (ICPAR), n’abafatanyabikorwa barwo mu cyumweru gishize.

Umuyobozi wa ICPAR, Mkombozi Karake Bosco, yavuze ko mu Rwanda habarwa ababaruramari b’umwuga bagera kuri 400 nyamara ababifitiye impamyabushobozi n’ibyangombwa nk’abanyamwuga bakaba ari 60 gusa.

Yagize ati “ [Mu Rwanda] twakabaye dufite abaruramari bagera ku 4000 bakabaye barimo bafasha abo banyamwuga 400.”

Kugeza ubu abakozi ba leta bagera ku 1200 barimo guhabwa na ICPAR amasomo azabafasha kuba ababaruramari b’umwuga babifititiye impamyabushobozi zo ku rwego mpuzamahanga.

Mkombozi Karake, avuga ko amakosa menshi atahurwa n’Umugenzuzi Mukuru w’Imari ya Leta adaterwa n’ubujura cyangwa gushaka kwiba imari ya rubanda ahubwo biba ari uko abashinzwe ibaruramari badafite ubushobozi buhagije bwo kugenzura no kubarura buri gikorwa gikozwe mu ibaruramari ry’inzego bakorera.

Imwe mu mpamvu zituma u Rwanda rutagira ababaruramari b’umwuga benshi ngo ni uburyo bw’imigishirize yo mu mashuri yigisha ibaruramari n’icungamutungo.

Izi nyigisho akenshi ngo usanga ari izo mu bitabo nyamara izigendana n’ibigezweho ku isoko ry’umurimo zikaba nke.

Ibi byatumye ICPAR isinyana amasezerano n’Ikigo cy’Igihugu cy’Amasomo y’Ubumenyingiro (WDA) kugira ngo integanyanyigisho zifashishwa higishwa mu mashuri y’ibaruramari zibe ziri ku rwego mpuzamahanga mu bunyamwuga mu ibaruramari.

Mkombozi yavuze ko kutagira ababaruramari b’umwuga bidindiza ishoramari ry’abanyamahanga mu Rwanda kuko ngo abashora imari benshi baza basaba ababaruramari b’umwuga.

Yagize ati “Ushobora kuba ufite imyamyabumenyi y’icyiciro cya gatatu cya kaminuza cyangwa iy’ikirenga (PhD) mu ibaruramari nyamara ukaba utari umubaruramari w’umwuga”.

Impamyabushobozi n’ibyangombwa bitangwa na ICPAR biremewe ku rwego mpuzamahanga ku buryo aho umuntu yagera hose abifite ashobora gukora akazi ko kubarura imari nk’uwabigize umwuga.

Umubaruramari Mukuru muri Minisiteri y’Imari n’Igenamigambi, Mukeshimana Marcel, yavuze ko ababaruramari b’umwuga bakenewe cyane mu gihe u Rwanda rwifuza kuva mu bihugu bikennye rukajya mu mubare w’ibihugu bifite ubukungu biciriritse.

Habimana Moussa, Umuyobozi wa College Nazareth de Gisenyi, Ishuri ryisumbuye ryo mu Karere ka Rubavu, yavuze ko bari basanzwe bigisha inyigisho zibanda ku magambo cyane ariko ubu bakaba bumva ko ICPAR izabafasha kongera ubunyamwuga bw’abo bigisha, bikazabaha ubushobozi bwo kuba abanyamwuga bashobora guhangana n’abandi babaruramari ku rwego mpuzamahanga.

ICPAR Ifite intego ko kuva mu mwaka wa 2016 kugeza mu 2021, izaba yarahuguye ndetse yarashyize ku isoko ababaruramari b’umwuga nibura 2000.

Mkombozi Karake Bosco, Perezida wa ICPAR avuga ko ubushobozi buke bw’ababaruramari ari intandaro y’imicungire mibi yo gucunga nabi ibya rubanda
Umubaruramari Mukuru muri Minisiteri y’Imari n’Igenamigambi, Mukeshimana Marcel, yavuze ko ababaruramari b’umwuga bakenewe cyane mu Rwanda
Inama yitabiriwe n'abayobozi b'ibigo by'amashuri yigisha ibaruramari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza