00:00:00 IGIHE NETWORK KN KINYARWANDA EN ENGLISH FR FRANCAIS

Aba-agent bambuwe ububasha bwo kubarura no gukorera ‘swap’ SIM card

Yanditswe na Iradukunda Serge
Kuya 26 Kanama 2021 saa 12:04
Yasuwe :
0 0

Urwego Ngenzuramikorere, RURA rwashyizeho amabwiriza mashya agenga ibigo by’itumanaho mu bijyanye n’ubucuruzi bwa SIM Card, aho zitemerewe kubarurwa n’aba-agent b’ibi bigo bakorera ku muhanda nk’uko byari bisanzwe, ahubwo bikazajya bikorerwa ahasanzwe hatangirwa serivisi z’ibi bigo hazwi nka ‘service center’ n’ahandi habugenewe.

Indi ngingo yatanzweho umurongo ni ijyanye n’uko nta mu agent uzongera gutanga serivisi ya ‘SIM Swap’ ikenerwa cyane cyane igihe umuntu yataye SIM Card. Uzajya ahabwa iyi serivisi kandi azajya abanza gufatwa ifoto kugira ngo ihuzwe n’indi myirondoro ye.

Ubuyobozi bwa RURA bwatangaje ko bwashyizeho aya mabwiriza mashya mu gukumira ubujura n’ubutekamutwe bwajyaga bukorerwa kuri telefone ndetse rimwe na rimwe gukurikirana ababukoze bikagorana.

Umuyobozi Mukuru wa RURA, Dr Nsabimana Ernest, yavuze ko izi mpinduka zakozwe kugira ngo amakuru y’abagura SIM Card abashe guhurirwaho n’inzego zitandukanye kandi ajye yifashishwa igihe hari ubujura bwakorewe kuri telefone.

Dr Nsabimana yavuze ko kandi bakoranye n’Urwego rushinzwe Abinjira n’Abasohoka kugira ngo harebwe uburyo n’abanyamahanga bagana u Rwanda bazajya bubahiriza iyi gahunda.

Ati “Turakorana n’Urwego rushinzwe abinjira n’abasohoka mu gihugu kuko hari ahantu byagiye bigaragara ko hari abinjira mu gihugu ugasanga bafite pasiporo ebyiri cyangwa pasiporo eshatu ariko ugasanga mu byukuri pasiporo bamushyiriyemo Visa ntabwo ariyo yakoresheje ashaka SIM card ugasanga rero nabyo bishobora guteza ikindi kibazo.”

Yakomeje avuga ko ikindi kiri kurebwa uburyo cyakemurwa ari ikijyanye n’abanyamahanga baba bari mu Rwanda by’igihe gito, basubira iwabo SIM Card bakazisiga aho biboneye.

Dr Nsabimana yavuze ko kandi RURA iri gukorana na Minisiteri y’Ubutegetsi bw’Igihugu kugira ngo umuntu wapfuye SIM Card ye ijye igira uko ibikwa.

Ati “Ikindi na none turimo dukoranaho na Minisiteri y’Ubutegetsi bw’Igihugu ni icyerekeranye n’ikibazo cy’abantu bitaba Imana, ese SIM Card bari bafite bigenda bite? zibikwa he ? amakuru yazo bigenda gute ? ibyo nabyo turi kubikoranaho na Minaloc ndetse n’ikigo gishinzwe gutangwa irangamuntu.”

Nyuma yo gusohoka kw’aya mabwiriza mashya, MTN Rwanda yavuze ko yiteguye gushyira mu bikorwa ibyo agena bitarenze ku wa 1 Nzeri 2021.

Mu itangazo yashyize hanze yavuze ko “Mu rwego rwo gukaza umutekano wa SIM Card, ibikorwa byo kuzibarura no gukora swap bizajya bikorerwa gusa kuri MTN service centers, ku maduka azwi nka ‘connect shops, no ku maduka y’aba-agent babifitiye uburenganzira.”

MTN yibukije abakiliya bayo ko ntawe uzongera kubona serivisi yo kubaruza no gukoresha swap binyuze ku aba-agent bo ku muhanda.

Yatangaje ko mbere y’ishyirwa mu bikorwa ry’ibi byemeze, izategura ubukangurambaga bugamije kumenyesha abakiliya bayo ahantu hashya bazajya basanga izi serivisi.

Kugira ngo umukiliya ahabwe izi serivis, MTN Rwanda yatangaje ko azajya abanza gusabwa kopi y’indangamuntu, kopi y’indangamuntu ihabwa umunyamahanga, ikarita y’ubuhunzi cyangwa pasiporo. Ku muntu shaka gukorerwa swap we hazajya hiyongeraho kumufata ifoto kugira ngo hemezwe koko ko ariwe nyiri SIM Card yabuze.

Aba-agent bambuwe ububasha bwo kubarura no gukorera ‘swap’ SIM Card

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .