Ab’i Rwamagana bahangayikishijwe n’imbwa zihajugunywa zikarya amatungo n’abantu

Yanditswe na Hakizimana Jean Paul
Kuya 30 Ukwakira 2019 saa 09:54
Yasuwe :
0 0

Abaturage bo mu Murenge wa Muyumbu mu Karere ka Rwamagana bahangayikishijwe n’ikibazo cy’imbwa zishaje bivugwa ko zizanwa n’Abanya-Kigali mu masaha y’ijoro bakazijugunya Rugende zikazamukira mu ngo zabo abo zihuye na bo zikabarya, zikanigabiza amatungo yabo.

Iki kibazo kivugwa cyane mu mirenge ya Muyumbu na Nyakariro, abaturage bavuga ko muri ibi bice nta bantu benshi bakunda korora imbwa ariko ngo muri iyi minsi hagaragara izikuze zirirwa zigenda genda.

Mu buhamya bw’abahatuye bakeka ko ngo izo mbwa zizanwa n’abantu baturutse i Kigali babona zishaje batakizitunze bakazijugunya Rugende.

Mukankurahije Janvière utuye mu Mudugudu wa Gasave avuga ko ubwa mbere zamuririye ihene yendaga kugurisha ngo atange mituweli, ubwa kabiri zirya umwana uri mu kigero cy’imyaka umunani.

Yagize ati “ Ihene yanjye zayiriye mu kwezi kwa gatandatu ubwo twari dutangiye kwishyura mituweli, baraje bampa ibihumbi 18 000 Frw ngo bayigure mbabwira ko nshakamo 20 000 Frw; bukeye za mbwa ziyisanga aho nari nayiziritse ziba zirayiriye mba ndahombye. Hashize iminsi mike indi mbwa y’umuturanyi nayo indira umwana none yanze no kumfasha kumuvuza.”

Yasabye ubuyobozi kumufasha kuvuza umwana we wariwe n’imbwa no gukemura ikibazo cy’izirya amatungo.

Niyomwungeri Claudine utuye mu Mudugudu wa Ryabahesha mu Kagari ka Ntebe yavuze ko imbwa zamuririye ihene akabura uwo aregera.

Yagize ati “Ni imbwa zirirwa zirukanka zikarya icyo zihuye nacyo cyose, ihene yo mu rugo zarayiriye ziyisanze mu gisambu aho twari twayiziritse, ntituzi ba nyirazo ahubwo twumva bavuga ko ari Abanya-Kigali bazijugunya hariya ku muhanda nazo zikangara.”

Mukamuhoza Judith utuye mu Mudugudu wa Kanyinya we yagize ati “Ziratubangamiye rwose, inkoko irarenga igipangu gato ikaba ihuye n’imbwa ikayirya. Mu minsi ishize zariye ihene eshatu z’umuturanyi wanjye zihita ziruka zirigendera arahomba, ubuyobozi budufashe rwose bazirwanye kuko ziraturembeje.”

Umuyobozi w’Akarere ka Rwamagana wungirije ushinzwe Iterambere ry’Ubukungu, Mudaheranwa Regis, yavuze ko bari gukorana n’Ikigo gishinzwe Iterambere ry’Ubuhinzi (RAB) mu kubaha imiti bakoresha bica izo mbwa.

Yagize ati “Twakoranye na RAB baduha umuti hanyuma umuganga w’akarere afatanyije na Polisi ikorera mu karere kacu bahise bategura gahunda yo kuzica iri bukorwe mu minsi mike iri imbere. Umuti urahari n’abazabikora barahari.”

Yakomeje avuga ko bakangurira abantu batunze imbwa gushaka uko bajya bagenza imbwa zishaje batazigunye mu baturage.

Ati“Turashaka gukangurira abantu cyane cyane abo mu Mujyi wa Kigali bajya bafata imbwa zishaje bakaza kuzijugunya mu nzira mu ijoro, hari n’uwo irondo ryafashe, turabasaba ko bajya bazicira mu rugo iwabo cyangwa bakareba ukundi babigenza.”

Icyemezo cyo kwica izo mbwa zizerera zitagira aho ziba cyafashwe nyuma y’amakuru yatanzwe ko zirya abantu n’amatungo y’abaturage.

Umuyobozi w’Akarere ka Rwamagana wungirije ushinzwe Iterambere ry’Ubukungu, Mudaheranwa Regis, yijeje ko ikibazo cy'imbwa zirya abantu n'amatungo y'abaturage kiri kwigwaho
Mukankurahije Janvière yavuze ko imbwa zamuririrye ihene yendaga kugurisha ngo atange mituweli ndetse zinarya umwana we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza