Ab’i Kayonza bahawe amashanyarazi mu mushinga wa Akon

Yanditswe na Evariste Nsengimana
Kuya 9 Nzeri 2018 saa 01:38
Yasuwe :
0 0

Abaturage bo mu Mirenge ya Ndego na Rwinkwavu mu Karere ka Kayonza, bashyikirijwe ibikorwa remezo birimo amashyanyarazi akomoka ku zuba, imbangukiragutabara eshatu n’amazi meza bifite agaciro k’ibihumbi 250$ (asaga miliyoni 220 Frw).

Babishyikirijwe kuri uyu wa Gatandatu n’abagiraneza barimo Samba Bathily; Umuhanzi w’umunyamerika ukomoka muri Sénégal, Akon na Thione Niang binyuze mu mushinga wabo ’Akon Lighting Africa’.

Akon Lighting Africa ni umushinga wo gucanira ibihugu bya Afurika bigizwemo uruhare n’ikigo Solektra International; Akon na Thione bafitemo imigabane.

Ibyo bikorwa remezo aba baturage babigejejweho ku bufatanye n’Ikigo cy’Igihugu cy’Iterambere, RDB, muri gahunda yacyo yo gusangiza abaturage umusaruro ukomoka ku bukerarugendo.

RDB ishimangira ko uretse gukundisha abaturage ubukerarugendo na Pariki, iyi gahinda inazamura imibereho y’abaturage.

Umuyobozi wa Solektra, Samba Bathily, yavuze ko ibyo bikorwa bahawe biri mu gice cya mbere cy’umushinga bateganyiriza abaturage ba Kayonza, ufite agaciro k’ibihumbi 250$ naho igice cya kabiri bazagezwaho mu mezi atatu ari imbere, kizashorwamo ayikubye ayo kabiri.

Samba wari wanitabiriye umuhango wo Kwita Izina abana b’ingagi wabaye ku wa 7 Nzeri 2018, yashimiye Leta y’u Rwanda ku buryo yaborohereje gutegura no gushyira mu bikorwa uyu mushinga.

Ati "Twabivuganye na Perezida Kagame ubushize twitabiriye inama ya Smart Africa. Hari RDB n’itsimda rya Smart Africa nibo bahaduhitiyemo, duhita dutangira. Ibi mureba ni umusaruro w’ibyo twagezeho."

Igice cya mbere kigizwe no gutanga amashanyarazi akomoka ku mirasire y’izuba azajya acanira imihanda, imbangukiragutabara no gutunganya amazi y’ikiyaga akazajya akoreshwa n’abaturage.

Ati "Igice cya kabiri tuzabafasha kubaha uburyo bugezweho bwo kuhira, tuzakoramo gahunda z’ubuvuzi no guhugura abazazikoramo, biri mu gice turi guteza imbere. Turifuza ko ingufu z’izuba ziba ishingiro ry’iterambere kuko muzi ko ufite ingufu ugera ku iterambere vuba."

Shingiro Innocent wo mu Murenge wa Ndego, yashimye ibi bikorwa begerejwe agira ati "Tubonye Ambulance ariko hari n’izindi twari dusanganywe. Ibyo byose turabikesha Leta nziza n’aba bafatanysabikorwa."

Umunyamabanga wa Leta muri Minisiteri y’Ibikorwa Remezo, Germaine Kamayirese, yavuze ko ayo mashanyarazi azafasha abaturage kongera amasaha yo gukora no kwirindira umutekano.

Ati " Leta ishinzwe kubagezaho ibikorwa remezo ariko namwe mugasabwa kubibungabunga."

Binyuze mu mushinga ‘Akon Lighting Africa, Abanyafurika bagera kuri miliyoni 600 batuye mu bice bitaragezwamo umuriro w’amashanyarazi, mu bihugu birenga 14 bazawuhabwa.

Abaturage b'i Kayonza bahawe amazi meza azabasha mu bikorwa byabo bya buri munsi
Umuyobozi w'Akarere ka Kayonza, Murenzi Jean Claude, ubwo yagezaga ijambo ku bitabiriye umuhango wo gutaha ibi bikorwaremezo
Samba Bathily yavuze ko kujyana ibi bikorwa i Kayonza, ari igitekerezo bahawe na RDB

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza