AB Bank yafunguye ishami rishya i Musanze abayigannye bayivuga imyato

Yanditswe na Ishimwe Israel
Kuya 8 Ukwakira 2016 saa 08:36
Yasuwe : XX
0 0

Mu ntego yihaye yo korohereza abacuruzi bato n’abaciriritse, AB Bank yafunguye ku mugaragaro ishami ryayo i Musanze yizeza abayigana ko izabafasha kwiteza imbere irushaho kubaha serivisi zinoze.

Mu gikorwa cyo gufungura ku mugaragaro iri shami rishya kuri uyu wa Gatanu, tariki ya 7 Ukwakira 2016, Umuyobozi Mukuru wa AB Bank mu Rwanda, Arah Sadava yasezeranyije abayigana ko izakomeza kuborohereza mu rwego rwo kubafasha kugera ku iterambere.

Yagize ati “Intego yacu nyamukuru ni ukwegera no korohereza abacuruzi bato, tuzabikomeza kandi tubakangurire kwizigama no kumenya neza gukoresha inguzanyo biteze imbere nabo babe ba rwiyemezamirimo bakomeye.”

Mbabazi Jean Paul, umukozi wa Banki Nkuru y’Igihugu yasabye iyi banki kurushaho kwegera abaturage bakabasobanurira ibyo bakora, barushaho gukangurira abasanzwe bakorana na yo kuba inyangamugayo bagakoresha neza inguzanyo bahabwa birinda ubuhemu n’igihombo.

Bamwe mu bakorana n’iyi banki bemeza ko mu gihe gito bakoranye yabafashije guteza imbere ubucuruzi bwabo.

Mukaruhindi Collette yagize ati “Mbere navaga gucuruza mu isoko nka saa kumi nagera kuri banki ngasanga hari abantu benshi cyane, nakerewa gato amafaranga nkayatahana ugasanga nayakoresheje ibyo ntateganyije ariko ubu ndakora nkarenza ayo masaha kandi naza nkarara nyabikije.”

Nzayisenga Sylvestre ukora ubucuruzi buciriritse muri Musanze we yashimangiye ko iyi banki ifite umwihariko wayo ugereranyije n’izindi banki.

Yagize ati “Nabonye uburyo iyi banki ikora bitandukanye n’izindi nakoranaga nazo kuko hano gusaba inguzanyo birihuta cyane kandi iyo hari ikibura mu bisabwa bakumenyesha kare ukabyuzuza, ibi rero bidufasha mu bucuruzi bwacu.”

Yakomeje asaba izi banki kurushaho kwegera abaturage no kubaha ibisobanuro byimbitse ku mikorere bafite.

Ati “Banki nizirusheho kwegera abaturage zibasobanurire ibyo zibafitiye kandi babafashe no kutagendana amafaranga yabo ku mufuka ahubwo babatoze uburyo bwo kuyahana hifashishijwe ikoranabuhanga. Abahabwa inguzanyo nabo babe inyangamugayo bazikoreshe neza, bishyure kuko nibyo bizatuma abakenera amafaranga bayabona ahagije.”

Ishami AB Bank yafunguye i Musanze ni irya gatanu nyuma y’irya Nyamirambo, Nyarugenge, Gisozi na Kimironko.

Bafungura ku mugaragaro ishami rishya rya AB Bank mu Karere ka Musanze
Ishami rya AB Bank i Musanze rizorohereza abacuruzi bato n'abaciriritse kwiteza imbere
Nzayisenga Sylver ukorera ubucuruzi muri Musanze yemeza ko iyi banki itanga serivisi nziza
Umuyobozi Mukuru wa AB Bank mu Rwanda, Arah Sadav yatangaje ko bazafasha abakiriya babo kwiteza imbere
Mukaruhindi Colette yatangaje ko AB Bank imufasha mu bucuruzi bwe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE