Kwamamaza

2015-2016: Umubare w’abana bata ishuri wagabanutseho 4.6 ku ijana

Yanditswe kuya 10-11-2016 saa 14:24' na Philbert Hagengimana


Minisiteri y’Uburezi mu Rwanda (MINEDUC) iratangaza ko kuva mu mwaka ushize umubare w’abana bata ishuri wagabanutseho 4.6%.

Raporo yashyizwe ahagaragara na Minisiteri y’Uburezi mu Rwanda (MINEDUC),igaragaza ko kuva mu mwaka ushize habaye impinduka nziza mu rwego rw’uburezi, aho umubare w’abana bata ishuri wagabanutseho 4.6%.

Byatangarijwe mu nama ya kabiri yahuje iyi Minisiteri, abafatanyabikorwa n’abaterankunga bayo, yabaye kuri uyu wa Kane tariki 10 Ugushyingo, hagamijwe gusuzumira hamwe ibyagezweho, imbogamizi bahuye na zo n’ahashyirwa imbaraga mu mwaka utaha w’ingengo y’imari mu rwego rw’uburezi.

MINEDUC yamurikiye abitabiriye iyo nama, igaragaza ishusho rusange y’uburezi mu Rwanda kuva mu mashuri y’incuke kugeza mu makuru na za kaminuza, haba amashuri yigenga ndetse n’aya Leta.

Iyo raporo igaragaza ko imibare y’amashuri y’incuke yiyongereyeho 216 ahwanye na 8.3%, aho yavuye ku 2,618 mu mwaka w’amashuri wa 2015 agera ku 2,834 mu 2016. Abanyeshuri muri icyo cyiciro bo biyongereyeho 6,455 bahwanye na 3.5%, bavuye ku 183,645 bagera ku 190,100.

Ubwitabire bw’amashuri y’incuke muri rusange bwazamutseho 3.5%, aho bwavuye kuri 20.2% mu 2015 bugera kuri 23.7% mu 2016.

Mu mashuri abanza, ibigo by’amashuri byiyongereyeho 90 bihwanye na 3.3%, aho byavuye ku 2,752 bigera ku 2,842 mu 2016. Umubare w’abanyeshuri bo muri icyo cyiciro wo wazamutseho 93 689 bahwanye na 3.8%, bavuye ku 2,450,705 mu 2015 bakagera kuri 2 544 394 uyu mwaka.

Muri iki cyiciro, ubwitabire bw’ishuri muri rusange bwazamutseho 4.2%, dore ko bwavuye ku 135,3% bugera ku 139,5%.

Icyakora ibi ngo si ibyo kwishimira, kuko hakiri inzira ndende ngo intego y’uko ubwo bwitabire buzaba bugeze ku 106% mu mwaka wa 2017 igerweho, cyane ko ngo kuba bikiri kure cyane ya 100%, bigaragaza ko hakiri imibare myinshi y’abiga mu mashuri abanza barengeje imyaka iteganyijwe ku mwana wiga muri ayo mashuri, biterwa n’ubukererwe bwo kugana ishuri n’ikigero cy’abasibira kikiri hejuru.

Abarangiza amashuri abanza bo bazamutseho 4.8%, aho bavuye kuri 60.4% mu 2015 bakagera kuri 62.2% mu 2016. Gusa ngo icyo kigero kiracyaciriritse ugereranyije n’intego y’umwaka wa 2017, aho biteganywa ko abarangiza amashuri abanza bazaba bari ku kigero cya 74%.

Icyakora ikindi Minisiteri y’Uburezi n’abafatanyabikorwa bayo bishimira, ngo ni uko ikigero cy’abana bata ishuri mu mashuri abanza cyagabanutse, aho cyavuye ku 10.3% mu 2015 kigera kuri 5.7% mu 2016 (bingana na 4.6%), bikaba byaranarenze intego bari bihaye yo kuzaba bageze kuri 7,6%.

Nubwo abasibira bakiri benshi, dore ko banagira uruhare mu gutuma umubare w’abagana ishuri ukiri hejuru cyane, iyi raporo igaragaza ko uyu mwaka baragabanutse ku kigero cya 2.3%, aho mu 2015 bari 20.7%, none ubu bakaba ari 18.3%.

Mu cyiciro rusange cy’amashuri yisumbuye, ubwitabire bw’abanyeshuri bwagabanutseho 3.4%, aho bwavuye kuri 45.9% mu 2015, bugera kuri 42.5% mu 2016, bityo byatumye intego y’uko bazaba bageze kuri 78.0% itagerwaho.

Muri iki cyiciro, umubare w’abana bata ishuri waragabanutse, aho bavuye kuri 14.4% mu 2014, bakagera kuri 6.5% mu 2016, intego yari yihawe yo kuba bageze kuri 12.1% barayirengeje. Icyakora ikigero cy’abasibira cyo nticyahindutse, kuko haba mu 2014 cyagumye ari 11.6% kimwe no mu 2016, bituma intego bari biahye yo kuba bageze kuri 3.1% itagerwaho.

Mu cyiciro gikuru cy’amashuri yisumbuye (upper secondary), ikigero cy’ubwitabire bw’abanyeshuri cyaragabanutse, aho cyavuye kuri 33.3% mu 2015 kigera kuri 28.4% mu 2016.

Mu mashuri makuru na Kaminuza, ubwitabire bwazamutseho 4.8% mu 2016, aho abanyeshuri bavuye ku 86.315 bagera ku 90,463. Abiga mu mashami atari aya tekiniki ni 32,184 mu mashuri makuru na Kaminuza bya Leta, mu gihe mu yigenga ari 49,799. Abiga Tekiniki bo ni 6,901 mu mashuri ya Leta na 1,579 mu mashuri yigenga.

Hanabayeho iterambere rigaragara mu mubare w’abakuru bagana ishuri ryo kubara, gusoma no kwandika, aho amasomero (Centers) yiyongereyeho 198 ahwanye na 4.6%, avuye ku 4,313 mu 2015 agera ku 4,511 mu 2016. Abayigamo na bo biyongereyeho 24,991 bahwanye na 26.1%, aho bavuye ku 95,829 bakagera ku 120,820 mu 2016.

Uburezi mu mwaka w’ingengo y’imari wa 2014/2015, Leta y’u Rwanda yari yabugeneye miliyari 214.4 z’amanyarwanda, mu gihe mu mwaka wa 2015/2016 bwagenewe miliyari 220.6, aho yazamuweho miliyari 6.3 zihwanye na 3%.

Minisitiri w’Uburezi, Dr Musafiri Papias Malimba, yatangaje ko intambwe uburezi bw’u Rwanda bwateye ari iyo kwishimirwa, ariko ngo ntiharagerwa ku ntego yifuzwa, bityo hakaba hakiri byinshi byo gukora.

Ati “Nk’uko twabibonye muri raporo, tugendeye ku bipimo, hari byinshi twagiye tugeraho nko kugabanya umubare w’abana bata ishuri, kongera umubare w’abava mu mashuri abanza bajya mu yisumbuye, ndetse n’abava mu cyiciro rusange bajya mu gikurikiyeho kimwe n’abajya mu mashuri y’ubumenyi ngiro. Muri rusange imibare yagiye izamuka nubwo tutaragera ku gipimo twifuza.”


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved