Kwamamaza

2010-2016:Abantu 987 bamaze guhamwa n’ibyaha bya ruswa

Yanditswe kuya 4-09-2016 saa 10:45' na Ezechiel Mbananabo


Urwego rw’Umuvunyi rwashyize ahagaragara urutonde rw’abantu 987 bamaze guhamwa n’ibyaha bya ruswa kuva mu 2010 kugeza uyu munsi.

Nk’uko biteganywa n’ingingo ya 3 y’itegeko nimero 17/2005 rihindura kandi ryuzuza itegeko nimero 25/2003 ryo ku wa 15/08/2003 rigena imiterere n’imikorere y’Urwego rw’Umuvunyi, uru rwego rufite inshingano yo gukora no gutangaza urutonde rw’abahamwe n’icyaha cya ruswa n’ibifitanye isano na yo n’ibihano bahabwa.

Urutonde rushya rugaragara ku rubuga rw’Urwego rw’Umuvunyi rugaragaza umwirondoro w’abahamwe n’ibyaha bya ruswa n’ibihano bahawe hakiyongeraho amazina y’ababyeyi bombi ba buri muntu n’aho atuye.

Harimo abari abanyamabanga Nshingwabikorwab’imirenge,abakoraga mu tugari, inyagamugayo za gacaca, abakoraga mu nkiko, abapolisi, abashinzwe umutekano mu midugudu ndetse n’abaturage basanzwe batari mu nzego z’ubuyobozi bwa Leta.

Aba bose hagaragazwa amafaranga bakiriye n’ibihano bahawe biri hagati y’igifungo cy’umwaka umwe kuzamura,ndetse n’ihazabu y’amafaranga ahwanye n’ibyaha bakoze.

Nk’uko bigaragara kuri uru rutonde ruswa nto yatanzwe ihwanye n’amafaranga y’u Rwanda 1000 mu gihe iruta izindi ingana n’ibihumbi 54 by’amadolari ni ukuvuga miliyoni zisaga 43 z’amanyarwanda.

Guverinoma y’u Rwanda yafashe ingamba zikomeye zo kurwanya ruswa kuko imunga ubukungu bw’igihugu.

Izi ngamba zirimo gutangaza mu ruhame amazina y’abahamwe n’icyaha cya ruswa no kutongera gukorera Leta ukundi, zatumye mu mwaka wa 2015 abakozi ba Leta 118 bahamwe n’icyaha cya ruswa birukanwa burundu muri Leta
Urwego rw’Umuvunyi rwemeza ko uyu mubare wagabanutse kuko abahamwe n’icyaha cya ruswa mu 2014 bari 157.

Icyo gihe Umuvunyi Mukuru Aloysie Cyanzayire, yavuze ko kwirukana burundu umukozi wa Leta ntazongere kuyibonamo akazi bizarinda umutungo wa Leta.

Imibare yo muri Kamena uyu mwaka igaragaza ko guhera mu 2002, urwego rwa Polisi y’igihugu ari rwo ruyoboye izindi mu kwirukana abapolisi benshi bangana na 557 kubera ruswa n’andi makosa mu kazi. Rukurikirwa n’icyahoze ari EWSA yirukanye abakozi 300 na RSSB yirukanye abagera kuri 41 kubera imyitwarire mibi.

Mu rwego rw’ubucamanza, imibare yatanzwe muri Gashyantare uyu mwaka igaragaza ko Kuva mu mwaka wa 2005 kugeza 2015, abacamanza n’abakozi bo mu nkiko 32 bahanwe bazira ruswa n’ibindi bifitanye isano na yo.

Raporo y’Umuryango Transparency International urwanya ruswa n’akarengane yashyizwe ahagaragara muri Mutarama uyu mwaka, ishyira u Rwanda ku mwanya wa mbere mu karere ka Afurika y’i Burasirazuba mu bijyanye no kurwanya ruswa . U Rwanda kandi ruza ku mwanya wa 4 muri Afurika, n’umwanya wa 44 ku Isi.

Umuvunyi Mukuru Aloysie Cyanzayire

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved