IGIHE.com > Amakuru > U Rwanda
Arakekwaho kwica umugabo we abifashijwemo n’umuhungu we

Arakekwaho kwica umugabo we abifashijwemo n’umuhungu we


Yanditswe kuya 8-03-2013 - Saa 11:35' na Isaie Mbonyinshuti

Kuva ku ya karindwi Werurwe 2013, sitasiyo ya Polisi ya Busogo mu Karere ka Musanze mu Ntara y’Amajyaruguru icumbikiye umugore witwa Bayavuge Agnes n’umuhungu we Ntakiyimana Innocent bakurikiranyweho kwivugana Ntawukizwanuwe Jean de Dieu wari umugabo wa Bayavuge n’umubyeyi wa Ntakiyimana.

Uyu mwana na nyina bo mu Kagari ka Murago mu Murenge wa Gataragara muri aka Karere ka Musanze ntibemera iki cyaha, kuko buri wese ashinja undi bagasobanura ko uwishwe yatashye yasinze umugore atekereza ko ari bumugirire nabi yitabaza umuhungu we, umuhungu aje akubita se ahita anamuhambira.

Aha ni ho Bayavuge w’imyaka 47 ahera ashinja umuhungu we kuba yaramwiciye umugabo, nyamara umuhungu akavuga ko ari nyina wamwishe kuko yamusize ari muzima akisubirira kwa nyirakuru aho yari asanzwe aba.

Spt Francis Gahima, umuvugizi wa Polisi mu Ntara y’Amajyaruguru akaba n’umukuru w’ubugenzacyaha muri iyi ntara, avuga ko iyo umuntu yasinze aba atagifite ubwenge bwose ahubwo aba akwiye ubufasha ; nyamara aba bo bakaba bataramufashije. Ati “Uriya musaza kuba yari yasinze ntabwo bivuze ko bagomba kumuhungabanyiriza umutekano. Bagomba kumufasha bakabungabunga umutekano we kugeza igihe agaruriye ubwenge. Gusinda ntibivuze guhohoterwa.”

Akomeza avuga ko baramutse bahamwe n’iki cyaha umusore yahanwa n’ingingo y’141 yo mu gitabo cy’amategeko ahana mu Rwanda imuhamya icyaha cy’ubwicamubyeyi, naho umugore agahanwa n’ingingo y’142 imuhamya icyaha cyo kwica uwo basezeranye ; zombi zikabagenera igifungo cya burundu.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO