IGIHE.com > Amakuru > U Rwanda
Amashuri agomba gutanga ubumenyi bukemura ibibazo by’abaturage-Minisitiri Biruta

Amashuri agomba gutanga ubumenyi bukemura ibibazo by’abaturage-Minisitiri Biruta


Yanditswe kuya 9-02-2013 - Saa 08:02' na Emmanuel Kanamugire

Minisitiri w’Uburezi Dr Biruta Vincent, arasaba amashuri gukora ibishoboka byose ubumenyi atanga bukagira uruhare mu gukemura ibibazo by’abaturage cyane cyane abaturanye na yo.

Ibi yabitangaje kuri uyu wa gatanu tariki ya munani Gashyantare 2013, ubwo yasuraga ishuri ryigisha ubumenyingiro ryo mu Ntara y’Amajyaruguru (Tumba College of Technology) mu ruzinduko rwari rugamije kumenya ibyo iri shuri rimaze kugeraho n’ibibazo rifite.

Minisitiri Biruta abwira abayobozi b'ishuri ko ibyo bigisha bigomba kugera ku bo baturanye

Minisitiri Biruta yashimye inyigisho zitangwa zirimo gukora amashyiga arondereza ibicanwa, ibicanwa bikorwa mu myanda, kubyaza mudasobwa zishaje inzima n’ibindi. Yasabye iri shuri gukorana n’abaturage ku buryo bwa hafi, kuko ngo byatuma ubuzima bwabo buhindurwa n’amasomo aritangirwamo. Ati “Abaturage bakwiye kwigishwa uko bakora amashyiga arondereza ibicanwa, bakayakoresha.Ishuri nirifashe abaturage byerekeye kugira ubumenyi mu ikoranabuhanga, gukoresha ‘internet’ n’ibindi.”

Abanyeshuri bashyira mu bikorwa ibyo bize mu magambo

Yavuze kandi ko Minisiteri y’Uburezi izakomeza gushyira ingufu mu kongera abarimu babifitiye ubushobozi, no gukurikirana ikorwa ry’umuhanda uhagana ufatwa nk’inzitizi ku rujya n’uruza rw’abanyeshuri n’abarimu.

Avuga ku mikoranire n’abaturage mu buryo buzana impinduka zigaragara, umuyobozi w’iri shuri Gatabazi Pascal yavuze ko zimwe mu mpamvu ari izishingiye ku myumvire y’abaturage ariko ko ishuri rizafatanya n’ubuyobozi bw’akarere byaba ngombwa bakabishyira mu mihigo.

Abanyeshuri biga mu ishami ry’Itumanaho rya kure (Telecommunication) bagaragaje ko ibigo bibakira mu gihe cy’imenyerezamwuga bikiri bike, ubuyobozi bw’ikigo giteza imbere ubumenyingiro bubemerera kuzagirana amasezerano n’ibigo by’itumanaho mu Rwanda bikazajya bibakira.

Minisitiri Biruta na bamwe mu bayobozi ba Tumba College of Technology

Ishuri ry’ikoranabuhanga rya Tumba ryatangiye mu mwaka wa 2007, abagera kuri 600 bakaba bamaze kurihahamo ubumenyi. Ubu rifite abanyeshuri 547, biga mu mashami atatu ya ‘Telecommunication’, ‘Information Technology’ na ‘Energy’.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO