IGIHE.com > Amakuru > U Rwanda
Amadovize yinjizwa n’amabuye y’agaciro azikuba incuro 3 mu 2017

Amadovize yinjizwa n’amabuye y’agaciro azikuba incuro 3 mu 2017


Yanditswe kuya 8-03-2013 - Saa 05:22' na Marie Chantal Nyirabera

Amabuye y’agaciro yoherezwa mu mahanga biteganijwe ko mu mwaka wa 2017 amadovize yinjiza imbere mu gihugu azikuba incuro eshatu, kuko azava ku madolari ya Amerika Miliyoni 136.6 yinjijwe mu 2012 akagera kuri Miliyoni 409 z’amadolari ya Amerika.

Minisitiri w’Intebe Dr Pierre Damien Habumuremyi ku wa 7 Werurwe 2013 yagejeje ku Nteko Ishinga Amategeko imitwe yombi, gahunda ya Leta y’ubucukuzi bw’amabuye y’agaciro na za kariyeri.

Minisitiri w’Intebe yavuze ko ubucukuzi bw’amabuye y’agaciro bwinjije amadorari menshi mu mwaka ushyize wa 2012 aho bwinjije miliyoni 136,6 z’amdolari ya Amerika, ni ukuvuga miliyari zisaga 87 z’amafaranga y’u Rwanda. Mu 2017 biteganyijwe ko hazinjizwa amadovize agera kuri Miliyoni 409 z’amadolari ya Amerika ni ukuvuga agera kuri Miliyari 261 z’amafaranga y’u Rwanda.

Yakomeje avuga ko umusaruro woherezwa hanze udatunganyijwe, imirimo yo kuwutunganya ikorerwa hanze abayagura akaba ari bo bakuramo inyungu cyane.

Ibi ngo ni byo byatumye Guverinoma itangira kwiga uburyo uyu musaruro watunganyirizwa mu Rwanda ukoherezwa hanze utunganyije.

Minisitiri w’Intebe kandi yagarutse ku kuba amabuye y’agaciro yaraje kumwanya wa kabiri mu kwinjiriza u Rwanda amadovize nyuma y’ubukerarugendo. Ubucukuzi kandi ngo bwatanze akazi ku Banyarwanda basaga ibihumbi 20, hatarimo abakora muri za kariyeri.

Muri uyu mwaka hazitabwaho gukora amakarita manini azerekana ahari amabuye y’agaciro. Umusaruro kandi uziyongera inshuro eshatu, urwego rw’ubucukuzi narwo rwongererwe amikoro, hanavugururwe itegeko n’amabwiriza ku bucukuzi na kariyeri.
Abacukuzi nabo ngo bazahabwa amahugurwa mu rwego rwa tekiniki n’ibindi bizafasha mu gutunganya ubucukuzi.

Hagaragaye imbogamizi

Minisitiri w’intebe yavuze ko mu bucukuzi hagaragayemo imbogamizi, zirimo umubare muto w’abacukuzi, amakuru adahagije, nokutorohera abashoramari b’Abanyarwanda mu bucukuzi.

Hari kandi amabuye y’agaciro yoherezwa hanze adafite umutekano aho ku cyambu cya Dar es Salaam hari ayibwe, hakaba hari n’ahakiri bucukuzi bw’akajagari.

Amabuye ari mubushakashatsi harimo umuringa, Marbre akoresha mu gukata inyubako aboneka mu kirwa cya Mbabara mu Karere ka Karongi, amabuye ya Granite akorwamo amakaro, ibumba ryiza n’ingwa byakorwamo amadongo n’umusenyi wakorwamo amadongo n’ibirahure yo aboneka hirya no hino mu gihugu.

Rulindo, Muhanga, Nyamagabe na Burera niho hacukuwe bwa mbere

Amabuye y’agaciro yabanje gucukurwa mbere mu Rwanda yari ubutare bwari bwiganje muri Rulindo, i Muhanga, i Nyamagabe na Burera.

Nyuma yaho haje kuvumburwa andi arimo zahabu na kolombeti. Kuva 1997 haza ikigo cya Mine na gewoloji gikora neza iyi mirimo y’ubucukuzi, aho kugeza ubu hatanzwe impushya 472 zo gucukura no kurambagiza ahari amabuye.

Amabuye y’agaciro acukurwa mu Rwanda avamo ibikoresho n’imitako. Gasegereti ivamo ibyuma bikoresha mu busudizi, Kolombeti ivamo ibikoresho bikoresha mu ikoranabuhanga bya telefoni na za mudasobwa, zahabu yo ikoresha mu gukora imirimbo n’ imitako.

Ubushakashatsi ku mabuye y’agaciro bwatangiye gucukurwa mu Rwanda mu 1909 kugeza bugaragaza asasaga 21.Ibirombe byacukuwe mbere byagaragaye ko bifite amabuye menshi ni ibya Rwinkwavu, Rutongo naGatumba hacukurwaga Wolfram na Gasegereti.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO