IGIHE.com > Amakuru > U Rwanda
AERG n’Abanyarwanda ntibashobora gukorana n’ibirohwa-Perezida Kagame

AERG n’Abanyarwanda ntibashobora gukorana n’ibirohwa-Perezida Kagame


Yanditswe kuya 26-11-2012 - Saa 16:03'

Ubwo yasozaga ku mugaragaro ingando y’abanyeshuri 478 bo mu Muryango w’Abanyeshuri barokotse Jenoside yakorewe Abatutsi mu 1994 (AERG), Perezida Paul Kagame yibukije urubyiruko ko n’ubwo amateka y’igihugu arimo agahinda, bagomba kutaba ibirohwa.

Perezida Kagame yagize ati “Igitumye turi hano ni amateka no guhangana n’ingaruka zayo tukareba n’ukuntu dutera imbere. N’ubwo amateka yacu arimo agahinda, imikorere n’imitekerereze yacu ntabwo irimo ububwa n’ubugwari. Hari abo nigeze kwita ibigarasha. Muzi iyo uyunguruye amazi? Biriya bisigara byitwa ibirohwa. Hari abatwiyomoyeho byabananiye gukomezanya na twe inzira y’iterambere. Mwe ntimuri ibirohwa rero kuko mwanze gupfa kabiri.”

Yongeyeho ati “AERG n’Abanyarwanda nti bashobora gukorana n’ibirohwa kuko kuri mwe gutera imbere bibarimo. Mwakoze ibitoroshye kuko abafite agahinda ni bo bafashe iya mbere bifuza kukarenga.”

Agaruka ku bibazo uru rubyiruko rwagaragaje ruhura na byo, Perezida Kagame yababwiye ko ubwabo bagomba kwishakamo ibisubizo kuko ngo niba barashoboye kwanga gupfa bwa kabiri, nta mpamvu ibindi byabananira ndetse abizeza n’ubufatanye.

Aha Perezida Kagame yabashishikarije guhindura imyumvire ku byerekeye ku bifuza kwiga bakaminuza, aho yabahaye ingero z’ibihugu bitandukanye byatejwe imbere no kwigisha ubumenyi-ngiro (TVET).

Yagize ati “Reka nkosore gato n’ubwo ari imyumvire Abakoloni badushyizemo. Ariko si amakosa yanyu. Kuki bavuga ko ari ngombwa kwiga ukaminuza kandi ugasanga nta murimo bashobora gukora? Ibyo babyita gusinziriza. Ubumenyi-ngiro ni bwo bukenewe cyane kurusha ibindi. Amateka agomba guhinduka ariko icya mbere ni imitekerereze."

Perezida Kagame yagarutse ku kibazo cy’abacitse ku icumu aho yavuze ko atumva impamvu kidakemuka ahubwo kikiyongera, bityo asaba ababishinzwe ko babyihutisha kigakemuka vuba.

Umuhuzabikorwa wa AERG ku rwego rw’igihugu, Rukundo Constantin yavuze ko uyu muryango ubafitiye akamaro kuko ngo bafatanya mu myigire kandi muri iyi ngando baganiriye kuri byinshi birimo ingorane bahura na zo mu buzima ndetse biga n’uburere mboneragihugu.

Rukundo yavuze ko biyemeje ko kwiga bashyizeho umwete, kandi bakazabwira isi yose imenye ukuri kuri Jenoside yakorewe Abatutsi mu 1994.

Iyi ngando yari ifite insanganyamatsiko igira iti "Rubyiruko: Duharanire imbere heza twihesha agaciro", yatangiye tariki 14 Ugushyingo i Nkumba mu Karere ka Burera, ikaba yari imaze ibyumweru bibiri, yitabirwa n’abanyeshuri 478 bahagarariye abandi mu gihugu hose.

AERG (Association des Etudiants et Eleves Rescapés du Génocide) yavutse mu 1996 muri Kaminuza Nkuru y’u Rwanda (NUR) nyuma igenda yaguka mu yandi mashuri makuru ndetse n’ayisumbuye aho kugeza ubu ifite abanyamuryango basaga 43,000 kandi ikaba ihuriwemo n’urubyiruko rwacitse ku icumu ndetse n’abandi bifuza gufatanyiriza hamwe mu kwiyubaka.

AERG yatanze miliyoni 4 mu kigega Agaciro

Foto/Village Urugwiro

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO